NANCHI MWAYUKA NYI?

Mambo ka Yosefwa o atendejile nsuki saka akyangye kumonañana ne Felo?

Kwesakana na jishimikila ja mu buku wa Ntendekelo, Felo wakambizhe’mba Yosefwa kaili Muhebelu bamulete kwi aye amulotolweleko biloto byamukatezhenga. Pa kikye kimye, Yosefwa saka bamukasa myaka yavula mu kaleya. Nangwa kya kuba Felo wakambizhe’mba bamulete bukiji, Yosefwa wakitendele nsuki patanshi. (Ntendekelo 39:20-23; 41:1, 14) Wanembele jino jishimikila jibena kwamba pa bintu bibena kumweka kubula kunema, ubena kumwesha’mba wayukile bisho bya bena Ijipita.

Kulama myevu yavula kyajinga kisho kya bisaka byavula byajingako kala, kuvwangakotu ne Bahebelu. Muntu wa jizhina ja McClintock ne buku wa Strong’s Cyclopedia of Biblical, Theological, ne Ecclesiastical Literature waamba’mba, “bena Ijipita ba kala kyo kisakatu kyonka kyalamanga myevu yavula.”

Nanchi batendangatu myevu nyi? Magazini wa Biblical Archaeology Review waamba’mba bisho bya bena Ijipita bimo byakebanga muntu kwinengezha bulongo saka akyangye kuya kwi Felo byonkatu byo afwainwa kuba pa kutwela mu nzubo ya Lesa. Onkao mambo, Yosefwa watendele nsuki yonse ya mu mutwe ne pa mubiji.

Jishimikila ja mu buku wa Byubilo jaamba’mba bashanji Timoti bajinga Bangiliki. Nanchi akino kibena kulumbulula’mba bafumine ku kyalo kya Gilisi nyi?

Ine. Mu nkalata yo anembele na lutangijilo lwa mupashi, mutumwa Paulo wapusanyanga Bayudea na Bangiliki nangwa’mba Bahelena kwingijisha Bangiliki kwimenako bonse babujile Bayudea. (Loma 1:16; 10:12) Kyo aubijile bino ke na mambo a kwingijisha mulaka ne bisho bya Bangiliki byakumbene mu mapunzha mwasapwilanga Paulo.

Bañanyi bo bamonanga kala amba bo Bangiliki? Mu myaka kitota kya buna, shayuka Isocrates mwina Atene waambile bingi pa kisho kya Bangiliki kyakumbenenga ntanda yonse. Waambile’mba, “bebatongolanga’mba Bangiliki mambo bafunjile pa masukulu abo, nangwa kya kuba kechi bafumine ku kyalo kya Gilisi ne.” Kyamweka bashanji Timoti babujile Bayudea ne bantu bakwabo baambilepo Paulo amba Bangiliki, bayukiletu bisho bya Bangiliki kechi bajinga Bangiliki ne.—Byubilo 16:1.