KUFUMA MU BUTALA BWETU

“Twatundaikilwe Kutemwa Lesa ne Kusapwila na Mukoyo”

JUBA jimo mu September 1922 bantu 8,000 bapwijile mu kishimikwa lukelo. Mu kino kishimikwa mwatendekele kutwa kyuya. Wa ku mupando wabijikile’mba mu kino kipungu kya kupwila, muntu yense bamuswishishe kulupukamo, bino yense usakulupuka kechi basakumuswisha kutwela jibiji ne.

Baimbile nyimbo pa lubaji lutanshi lwa kuba’mba “Praise Service” (Lubaji lwa Nyimbo ya Kutota Lesa). Byo bapwishishe, ba Joseph F. Rutherford bayile ku kya kwambilapo. Bavula bajinga mu luonde kechi bayukile kisakulondelapo ne. Bamo bapitañenenga kuba’mba bapitweko mwela na mambo a kyuya. Ñambi wibatundaikile kwikala panshi ne kuteleka. Jashi byo jatendekele, bavula kechi bamwene kisapi kikatampe kyo bavungile bulongo peulu ne.

Mulongo Rutherford waambile jashi ja kuba’mba “Bufumu bwa mwiulu bwafwenya pepi.” Jiwi janji jakanza jaumvwanyikilenga mu kishimikwa kyonse byo alumbulwilenga bangauzhi ba kala byo basapwijilenga Bufumu kwa kubula moyo. Waambile jino jashi pa jiola jimo ne kichika. Jashi byo jafikile ku mpelo, waipwizhe’mba, “Nanchi mwaitabila’mba Mfumu wa lukumo watatula kulama nyi?” Bajinga mu luonde bakumbwile na jiwi jikatampe amba: “Ee!”

Mulongo Rutherford waambile’mba: “Nanchi yainga na kusapwila, anweba baana ba Lesa mwine wakila!” Kabiji Mulongo Rutherford waambile na jiwi ja bulume amba: “Monai, Mfumu ubena kulama! Anweba yenu bantu bo engijisha. Onkao mambo, tayai mbila, tayai mbila, tayai mbila ya Mfumu ne Bufumu bwanji.”

Ponkapo bavungulwile kisapi po banembele byambo bya kuba’mba: “Tayai Mbila ya Mfumu ne Bufumu Bwanji.”

Ba Ray Bopp bavulukile’mba: “Bajinga mu jibumba baumvwine bingi bulongo.” Ba Anna Gardner balumbulwile’mba: “Kishimikwa kyonse kyajikimine na mambo a kupopwela.” Ba Fred Twarosh baambile’mba: “Bonse bajinga mu luonde baimene po baikele.” Ba Evangelos Scouffas baambile’mba: “Kyajingatu nobe kwajinga kintu kitushikula kufuma pa bipona, kabiji byo twaimene twajijile ne mipolo ya lusekelo.”

Bavula baishile na kushonkena basapwilanga mambo awama a Bufumu. Pano bino, pa joja juba batundaikilwe kwingila na ngovu. Ba Ethel Bennecoff bashimikizhe’mba Bafunda Baibolo byo bafumine na kushonkena “batundaikilwe kutemwa Lesa ne kusapwila na mukoyo kukila byo baingilanga kala.” Ba Odessa Tuck bajinga na myaka 18 pa kyokya kimye, byo bafumine na kushonkena bafuukwilepo kukumbula lwito lwa kuba’mba “Ñanyi uketwambilako?” Baambile’mba: “Kechi nayukile kwa kuya na kusapwila ne bya kusapwila ne. Kintu kimo kyo nayukiletu ke kya kuba’mba nakebelenga kukumbula byakumbwile Isaya amba: ‘Amiwa bano! Ntumai!’” (Isa. 6:8) Ba Ralph Leffler baambile’mba: “Jino juba ja lusekelo, yo yajinga ntendekelo ya mukwekele wa kusapwila pa Bufumu wakumbana ntanda yonse lelo jino.”

O ene mambo kushonkena kwajingako mu 1922 mu Cedar Point, mu kibunji kya Ohio, o bekunemekela bingi kufikatu ne lelo jino. Ba George Gangas baambile’mba: “Akwa kushonkena kwandengejile kufuukulapo kubula kushalapo ku kushonkena nangwatu kumo.” Ne kya kine kechi bashajilepo ku kushonkena ne. Ba Julia Wilcox banembele’mba: “Ngikala bingi na lusekelo inge natanga mu mabuku etu kushonkena kwajingako mu Cedar Point mu 1922. Kimye kyonse ñamba’mba, ‘Nemusanchila anweba Yehoba pa kunswisha kutaanwako.’”

Ne atweba bavula lelo jino tuvuluka bingi kushonkena kwitusangajikile bingi ne kwitulengela kwikala na kizaku ne kutemwa Lesa wetu ne Mfumu wanji. Inge ke tulanguluke pa bintu byawama byamwekele pa kushonkena, bitulengela kwamba’mba, “Nemusanchila anweba Yehoba pa kunswisha kutaanwako.”

Lulombelo Lwabo Lwakumbwilwe mu Jishinda ja Kukumya

Ba Arthur Claus ne benakwabo ba Nellie bafikile bukiji kuba’mba bekale kulutwe. Ba Arthur baambile’mba: “Nateleko bingi muchima ku byambo byonse byaambiwenga.” Ponkapotu munda mwatendekele kukola. Balupukile pangye ya kishimikwa, bino saka bayuka’mba kechi basakutwelamo jibiji ne. Asha wibepwizhe’mba, “Mubena kukeba kusha kupwila pa kino kimye nyi?” Ba Arthur bayukile’mba bafwainwatu kulupuka.

Byo babwelelenga, ba Arthur baumvwine bajinga mu kishimikwa bapopwela. Byo bakebelenga kuba’mba bamonepo pasabika mu lubumbulu pa kuba’mba bamone kibena kumweka mukachi, bamweneko pa kukanjijila kuya mu musemi, palepele kukila pa mamita ana. Bakanjijile kuya pajinga kyeya po bashinkwile bipenze.

Ba Arthur bataaine balongo batanu na babiji saka babena kutala ñambi kabiji bapelelwa. Bebabuujile’mba bafwainwe kuchiba ntambo yo bakashijileko kisapi panembelwe byambo pa kuba’mba kivunguluke bulongo. Pano bino, pa kuba’mba bachibe ntambo yonse pa kimye kimo, kwakebewenga muntu mukwabo wajinga na mupenyi. Nanchi ba Arthur bajinga na mupenyi watwa ku fwangalito nyi? Balongo baumvwine bingi bulongo pa kumona’mba bajinga na mupenyi. Ba Arthur ne bakwabo benengezhezhe kuchiba ntambo inge ñambi wibapa kiyukilo. Mulongo Rutherford byo aambile ja bubiji amba “Tayai mbila!” bachibile ntambo.

Bataainwe ku kuno kushonkena balumbulwile kino kisapi panembelwe byambo bikatampe mu misombelo isatu byo kyavungulukile bulongo. Pakachi balengejilepo kipikichala kya kwa Yesu.

Byo bapwishishe, balongo balumbulwijile ba Arthur kuba’mba bakanjijile pa ndandalashi, bino beifumisheko. Kyo kyalengejile’mba bakankalwe kwikila panshi kuba’mba balombe bukwasho, onkao mambo, balombele kwi Yehoba kuba’mba atume mulongo uji na mupenyi. Bano balongo bashiinwe’mba Yehoba wakumbwile lulombelo lwabo mu jishinda ja kukumya.