Mamboka Otwafwainwa Kuchinuzhukila Miyebe?
1 Kyotukaina kutelekela kumiyebe nangwa kuyebekañana kekuba’mba tukeba kusangajika Yehoba, wakanya luntepentepe. Umvwe tukeba bibusa bya Lesa, kechi twafwainwa kuyebeka muntu nakumutongola mumisambo yetune.
2 Kulonda Satana Ne: Uno mulwanyi mukatampe wa Lesa wapewe jizhina jamufwainwa amba “Diabola” (mu Kingiliki, di·a’bo·los), jilumbulula’mba “waluntepentepe.” Kimye Evwa kyoaumvwijile byambo byamubujile Satana byabubela bwakubepela Lesa, bamulume nemukazhi batanshi bebapatwile kufuma kwi Mulunda nabo wapamuchima. (Nte. 3:1-24) Kechi twafwainwa nangwa pacheche kumvwina mashinda akwa Satana nekwitumpa mumisambo yakuyebekañana yakonsha kwitulengela kutalwa bibi kwi Yehoba Lesa Mulunda netu wapamuchima nekwitupatula kwiayene.
3 Kechi twafwainwa kumvwina bakanyamiyebene, mambo bakalwisha balunda. Javula bantu baluntepentepe, babaisha bintu, kwibyambila mungi, kubepa, nekuvuzha byambo byabubela. Mukifulo kyakwamba namuntu kilungi nakilungi, bambila kumbaji payewo muntu. Javula mukino momufuma nekwizhinauka. Mujino jishinda, “waluntepentepe wibabanya ba mulunda na muntu.”—Mana. 16:28.
4 Twafwainwa kujimuka nangwatu namiyebe imweka nobe icheche. Mamboka? Mambo byambo byakwambatu nobe kukaya byakonsha kukozha muntu kumuchima umvwe byaambiwa jibiji. Muntu wakonsha kwibilambisha nangwa kwibikondakanya byaonauna nenkuwa yamuntu unemeka Lesa, nekumonawina jizhina janji jawama. Umvwe kino kyamwekana, mwakonsha kwiumvwa byepi inge yenu mwatendekele jojo jashi nangwa yenu mwakumbenye bino byambo? Bantu bakonsha kwimumona nobe paji kintu kyatama kyomubena kukeba kuba, kabiji kino kyakonsha kwibalengela kuleka kupwañana neanweba.—Esakanyaiko Byambo bya Mana 20:19.
5 Miyebe Yakonsha Kwimulengela Kwikala Babubela: “Byambo bya wa luntepentepe byauba nobe tukajo twatobala, bimutwela munda awa wibyumvwa.” (Mana. 26:22) Ibyepi pano umvwe wasunga byambo byabubela nekwibishimununa kubangi? Nangwa kyakuba mubena kulanguluka’mba bino byambo byakine, umvwe kemwibikumbanyemo kilumbulula’mba mubena kubepa. Umvwe byatanyiwa’mba byabubela, bakemumona’mba mwibabubela. Nanchi mukeba’mba kino kikemumwekelenyi? Nanchi Lesa kechi ukapamo mambo bafunjishi bafunjisha byabubela mubupopweshi nenyi? Ee, kabiji ukapamo nebantu baluntepentepe mambo. Yesu wajimwine’mba: “Byambo byonse byatu byo baamba bantu, bakebitotolola mu juba ja kije. Mambo bakakubingisha ku byambo byobe, kabiji ku byonkabyo byambo byobe bakakufwisha nao.” (Mat. 12:36, 37) Pakuba “atweba bonsetu umo umo tukeambila mambo kwi Lesa,” nanchi mukeba’mba akemufwishe nao amba mwibaluntepentepenyi?—Loma 14:12.
6 Umvwe twakwasha muntu kuba’mba aleke miyebe, kokuba’mba tubena kuba kintu kyawama koaji. Kishimpi kyamaana kyamba’mba: “Awa walama bulongo kanwa kanji walama mweo wanji; pakuba awa uvuzha byambo byanji ukonaika.” (Mana. 13:3) Kine, kuji bishinka byawama byakuchiina miyebe neluntepentepe.