‘Mwikale Bazhila’

¹ “Buzhile bo bwa Yehoba.” Bino byambo bya lutundaiko byanembelwe kuba’mba bonse bebimonenga, byanembelwe pa kyela kya ngolode yawamisha kyakashilwe pa kitebo kyavwalanga ñanga mukatampe wa bena Isalela. (Lupu. 28:36-38, NW) Byavulwilengako bena Isalela amba bapopwela Lesa wazhila kechi balesa bandochi bobapopwelanga mu mitundu ingi ne.

² Mizhilo ya Lesa yapainwe kwi Mosesa yakebelenga kuba’mba bantu banji bekale bazhila ku mubiji ne ku mupashi. Ino mizhilo yo yalengejile bena Isalela kusalululwa ne kwikala mukoka wazhila. Buno bwikalo bwa butooto bwaletele munema kwi Lesa ne kukwasha bena Isalela kwikala bulongo.—Levi. 11:35, 36; 15:1-11; Isa. 52:11.

³ Mu ano moba Yehoba ukeba bantu bamupopwela kulanguluka byonka byo alanguluka pa mambo a kwikala ba butooto. Mutumwa Petelo wanembele bino: “Monka mwaikajila wazhila aye wimwita, monkamo ne anweba nenuwa mwikale bazhila mu misango yonse ya bwikalo bwenu; mambo kyanembwa’mba, [mwikale bazhila, NW]; mambo ne amiwa nazhila.” (1 Pe. 1:15, 16) Kwikala bazhila kulumbulula ka? Mu Baibolo kulumbulula ‘kukema, nyowanyi, ne butooto.’ Mosesa walumbulwile Yehoba amba wa butooto, wabula bubi, kabiji ubula kukeba bubipisho bonse.—Ha. 1:13.

⁴ Butooto kyo kiyukilo kya kuyukilako bantu ba Yehoba. Umvwe bantu ba butooto ke bamupopwele, Yehoba unemekwa. Nanchi Lesa ubula kukeba bubipisho bonse wakonsha kuleka bantu bandochi kabiji ba busaji kumupopwela? Abya twafwainwa kutopeka Lesa inge wakanya bantu babi kutwela mu paladisa ibena kwiya yatoka ya biyampe nyi? Bakonsha kwiitamisha, mambo kechi byo asaka ne. Lesa wa butooto kabiji wazhila ukebatu bantu batoka kabiji bazhila kuba’mba bamupopwelenga! Vulukai waamba’mba “[Mwikale, NW] bazhila; mambo ne amiwa nazhila.”

⁵ Mibiji, bya kuvwala, mazubo ne mabanza atoka ke lubaji lwa mpopwelo yetu. Bisapwila bine kwakubula byambo. Byo byafuma mu kuvwala bumuntu bupya. (Kolo. 3:9,10) Kyaketekelwa’mba bantu ba butooto bekala na mazubo ne mapunzha o bapopwelamo Lesa atoka kabiji alamwa bulongo kubikapo ne mapunzha a kupwila kukatampe. Pa kuba’mba kino kyubiwenga, mupopweshi yense wafwainwa kwikala wa butooto kimye kyonse. Umvwe twaikala ba busaji, Yehoba waamba’mba ‘uketuvundamina.’—Mpitu. 23:14.

⁶ Kwikala ba Butooto pa Kupwila Kwetu Kukatampe: Balongo bengila bingi na ngovu kuwamisha ne kutolaula biswaswa byatayaika bantu ba ku kyalo mu bibanza ne bipaka byo tusonkela pa kupwila kukatampe. Bano bantu kechi batako muchima ku busaji ne, kabiji kechi batako muchima’mba kwafwainwa kwikala muntu wakuwamisha busaji bo basha ne. Nanchi twakonsha kuketekela bapopweshi ba Yehoba kwikala na byubilo bya yeo mutundu? Ajo jipuzho jakumbulwa pa Malakai 3:18 amba: “Kepo mukayuka jibiji mo bapusena ... aye umwingijila Lesa, ne yewa ubula kumwingijila.” Pafwainwa kwikala lupusano ku betumona. Kwikala ba butooto nobe Yehoba kwitupusanyako. Luno ke lubaji lwa kupopwela kwetu.

⁷ Kimye kya kufika mu kibanza mwa kupwila kukatampe kechi tukeba kukatanamo biswaswa, mapepala, mapulasitiki, tupendo ne bikotu bikwabo sabyalalazhama patoka ne, ke ibyo nyi? Mambo ka? Mambo twatemwa kupwila mu mapunzha atoka bulongo. Bipwilo biwamisha mpunzha motupwila kupwila kukatampe saka tukyangye kufika, kabiji tusanta bingi pa kino. Ne atweba twakonsha kusunga mpunzha sayatoka bulongo na kutolaula biswaswa ne kufunjisha baana betu kubula kutayaika biswaswa mu kibanza. Kechi kyawama balongo saka bapitañana mu kibanza na kutolaula biswaswa byetu ne. Muntu yense wafwainwa kusenda kisendwa kyanji ne kumona bulongo pa kwikala na mpunzha ya kubula biswaswa inemeka Yehoba Lesa wetu wa butooto. Dipatimenti itala pa butooto yafwainwa kumona’mba banengezha mangungulu nangwa masaka avula mwa kuba balongo sabatayamo biswaswa byabo. Mitumwa mwabula bintu kechi yafwainwa kushala saka yalalazhama patoka panshi ne. Umvwe mwajikwiileta po muna kupwila, mwafwainwa kwiibwezha ko mwaji kwiifumya. Monai kuba’mba anweba ne kisemi kyenu kechi mukatayaikenga kitaye-taye biswaswa kikale pa nzubo, mu mukwakwa, kikatakata pa Nzubo ya Bufumu nangwa pa kupwila kukatampe ne. Umvwe tukeba kwitabizhiwa na Yehoba twafwainwa kwikala ba butooto kimye kyonse.

⁸ Aba baji na nzubo nangwa kamusakuta pa mpunzha pa kupwila, twasansapo monai’mba mpunzha yenu yatoka kabiji yasungwa bulongo. Mwafwainwa kwela biswaswa ku mpunzha yakwibyelelako yanengezhewa na babena kunengezha kupwila. Bonse ba mu kisemi bakanemeka Yehoba umvwe bauba kino.

⁹ Nsungilo ya byolonyi lo lukatazho lutanyiwa javula pa mapunzha avula a kupwila. Bitama kya kuba ukankalwa ne kuyamo. Kafwako nangwa umo mukachi ketu ukeba kuya mu kyolonyi kyatama ne. Bonse twafwainwa kumona’mba byolonyi twibisunga butooto. Bakulumpe bafwainwa kutwala baana babacheche ku kyolonyi ne kuwamishamo pa nyuma ya kwibingijisha. Dipatimenti itala pa butooto yafwainwa kunengezha bya kuwamishishako pa mivumbo ya byolonyi. Twafwainwa kowa ku maboko pa nyuma ya kufuma mu kyolonyi. Kishupa bingi kukana lwimu lwa mu maboko lwa muntu yetwayuka mambo’mba wafuma ku kyolonyi kwakubula kowa ku maboko. Kyolonyi kyonse kyafwainwa kwikala na kinzhilo kuchina kwibatamba babena kuyamo. Laimu nangwa buto byafwainwa kwikalapo. Balongo ne banyenga bafwainwa kupewa uno mwingilo wa kuwamisha byolonyi. Twafwainwa kusangalala pa kusunga luno lubaji lucheche bino lwa kilamo kunema pa kupwila, ‘kubila bakwetu byonka byo tukeba abo kwitubila.’ Kechi pafwainwa kwikala muntu wa butolo, ushatu pa lwañenene bifuma munda kwa kubula kwibizhika ne. Ano ke mambo kwi Yehoba ne ku balongo betu kabiji kyakonsha kuleta bikola ne lufu.—Tangai Mpitulukilo ya mu mizhilo 23:12-14.

¹⁰ Ino mikambizho ke lubaji lwa kwitufunjisha byo tukekala mu kyalo kipya kabiji bonse bapopwela Yehoba bafwainwa kwiisunga. Mambo aye waamba’mba, “Bakebafunjisha bantu bami mo byapusena byazhila ne byabula kuzhila, ne kwibabula mwa kupusenya byabula kutoka ne byatoka.”—Ezi. 44:23.

¹¹ Bantu bakebesha kuba kyaswa muchima wa Lesa beseka na ngovu kwikala mwayila mizhilo ya Mulenga wetu ya kwikala ba butooto. Kino kibena kulumbulula’mba twafwainwa kupimpula milanguluko yetu ne kwikala ba butooto. Atweba bavula tubena kuba bingi bulongo mu kwikala ba butooto ne kumvwisha bulongo mfweto ijimo. Twimusanchila. Mwane, twayai tutwajijile kwikala batoka pa nzubo ne kufunjisha baana betu kwikala batoka. Apa bino ne kwikala batoka pa Nzubo ya Bufumu ne pa kupwila kwa nkambi, mambo kino kikekala ke lubaji lwetu mu bwikalo bwa bwina Kilishitu. Atweba bonse twafwainwa kwikala batoka ne kwisunga bulongo. Mambo ka? Mambo tukeba kwikala bazhila byonka biji Lesa ye tupopwela.