Sekelai Mubyonka Byomuji Nabyo
1 Binembelo bitukambizha kukebela bamunzubo yetu bikebewa kumubiji, pano bino kino kechi kyokintu kyanemesha mubwikalo bwetune. Twafwainwa kutangizhako bintu byakumupashi. (Mat. 6:33; 1 Timo. 5:8) Kyashupa bingi pakuba’mba twesakanye bintu bulongo mubino “bimye byakatazha.” (2 Timo. 3:1) Kika kiketukwasha kuba byobyo?
2 Londai Byaamba Baibolo: Byambo bya Lesa bitujimunako’mba kukebesha byabunonshi kwakonsha kwitonawina bumupashi. (Sapwi. 5:10; Mat. 13:22; 1 Timo. 6:9, 10) Kimye kyakatazha kyotujimo, kyakonsha kwituletela malwa umvwe twakizhamo kutemwa nkito yakumubiji nangwa kutemwa mali kyakuba twabika mingilo yakumupashi nabiji kupwila, kufunda, nemwingilo wamubujimi, byaikala byakibiji mubwikalo bwetu. (Luka 21:34-36) Mukifulo kyabyobyo, Baibolo itujimunako’mba: “Pa kwikala na kajo ne bivwalo, byonkabyo tukasekela monka.”—1 Timo. 6:7, 8.
3 Kino kechi kilumbulula’mba bena Kilishitu bayande-yandengatune. Luno lujimuno lwitukwasha kuyuka bintu byakumubiji bikebewa nabiji kajo, byakuvwala, nenzubo yawama kwikalamo. Umvwe bintu bikebewa mubwikalo tuji nabyo, kechi twafwainwa kusakisha kwikala nabintu byavula byabula nenkitone. Pakukeba kupota kintu nangwa kwingilako mingilo ikwabo, patanshi twafwainwa kukiipuzha atweba bene’mba: ‘Abya kino kintu kyombena kukeba kyammfwainwanyi, inyine?’ Kuba kino kwakonsha kwitukwasha kumvwina lujimuno lwanembeshiwa namupashi amba: “Mwikale ba kubula kutemwa mali; sekelai mu byonka byo muji nabyo.”—Hebe. 13:5.
4 Umvwe twaketekela mwi Yehoba, uketukwasha. (Mana. 3:5, 6) Nangwa kyakuba’mba twafwainwa kwingila nangovu nakukeba bintu byotukeba pajuba pajuba, kechi tutesha muchima kubino bintune. Nangwa twikale natucheche nangwa byavula, tuketekelatu mwi Yehoba kwitupa byotukeba. (Fili. 4:11-13) Kifumamo, twikala nalusekelo lupana Lesa pamo nebukwasho bukwabo bwavula.
5 Londai Lwitabilo Lujipo Nabakwenu: Nsemi umo wamukazhi wakomeshenga mwananji wamukazhi mubukine wailenga nakupeezhako bwikalo bwanji pachepache. Nangwa kyakuba wajinga nabintu byavula munzubo ikatampe, wavilukijile munzubo icheche, nekyapeleleko wavilukijile mukazubo kakibamba kimotu. Kino kyamukwashishe kukepeshako maawala oaingilanga nkito yakumubiji kuba’mba ekalengako nakimye kikatampe kyakuya mumwingilo. Mwananji wamukazhi byoakomene nekusongolwa, bainanji balekejile nkito pakachi myaka yabo yakulekelapo nkito saikyangye kufikila, nangwa kyakuba kino kibalengejile kutambula mali acheche kukila obafwanyijilwe kutambula. Uno nyenga yetu luno ubafikizhe kemyaka 7 mumwingilo wabupainiya bwakimye kyonse kabiji kechi ulangulukapo amba nalushile bintu byami byakumubiji byonasankijilepo nekutangizhako Bufumu palutwe mubwikalo bwanjine.
6 Mukulumpe mukipwilo umo nemukazhanji baingijile bupainiya pamyaka yavula bingi aku sabakomesha baana babo basatu. Kisemi kyonse, bafunjile kutondwa nabya kumubiji bikebewa mubwikalo kukila kusakisha bintu byakisangajimbwe byabula nenkitotune. Uno mulongo waambile’mba: “Twaikele bwikalo bwapela bingi. Bino nangwa bimye bimo twashupikwanga, Yehoba witukwashanga kumona byonse byotwakajilwenga... . Byommona kisemi kyami nakutangizhako bintu bya Bufumu byonkabye, neumvwa kuba’mba kino ee byobyo kyafwainwa kwikala, kabiji mmona namba naingila.” Mukazhanji naye wanungilepo’mba: “Nntemwa bingi umvwe namona [bamwata wami] sabapayankana nabintu byaku mupashi.” Baana nabo batemwa bingi pakuba’mba bansemi yabo basajilepo kwingijila Yehoba mumwingilo wakimye kyonse.
7 Aba bonse basalapo uno mwingilo wakwingijila Lesa mukifulo kyakukebesha bintu byakumubiji, Baibolo ibalaya mfweto ikatampe muano moba nemoba akeya.—1 Timo. 4:8.