Nkalata Kufuma Ku Jibumba Jitangijila
Ku Balongo ne Banyenga:
“BUPE bwikale ne anweba ne mutende bifuma kwi Lesa Tata wetu ne kwi Nkambo Yesu Kilishitu.” (1 Ko. 1:3) Byo tutongapo kimye bintu byonse bipema kyo bikapana kwi Yehoba lutotelo lwamufwainwa! (Sala. 150:6) Byo tubena kukipembelela joja juba jikatampe, tutwajijila na kusampanya mambo awama a Bufumu bwa Lesa ne kulenga baana ba bwanga.
Mwingilo wa busapwishi ye mwingilo mukatampe wa Yehoba ubena kwingijiwa panopantanda. (Mako 13:10) Na mambo akuba twayukishatu’mba Yehoba wamutemwa uno mwingilo, tulomba kwi aye kuba’mba etukwashe tumwingile, mambo twayuka’mba muntu yense uji na jishuko ja kumwenamo mfweto mu lunengezho lwa bukuzhi. (Lum. 14:6, 7, 14, 15) Kine, tupita mu makatazho, bino tusanta bingi mambo ‘twavwikwa na bulume bwa mwiulu’ kuba’mba tupwishe uno mwingilo!—Luka 24:49.
Kileta bingi lusekelo umvwe twamona byaingijiwe mwingilo mwaka wapwa ne kulanguluka pa mingilo yoaingila Yehoba kupichila mu bakalume banji bakishinka. Byo batangijilwa na mupashi wazhila, bantu ba Lesa bamwesha butemwe bujipo na Kilishitu, bwa kushinda lupato mwaya ntanda yonse. Butemwe bwa uno mutundu bwamwekejile pa kupwila kwetu kukatampe. Kutatula mu June shoo kufika ne mu December 2003, bantu kufuma mu byalo byakilaila pa kitota kimo bayile na kutanwa ku kupwila kukatampe 32 kwa mikoka kwaubijiwe mu mapunzha apusana pusana mwaya ntanda yonse. Bamishonale, bamingilo bengijila mu byalo bingi, ne bengijila pa Betele mu byalo bingi bebepwizhenga mepuzho pa kupwila kwa nkambi ne kwa mikoka.
Pa kuno kupwila, twatambwijile mabuku “Monai Kyalo Kyawama” ne Sambilila Kuli Kasambilisha Mukalamba. Kabiji kyabijikilwe ne kuba’mba buku wa Sukulu ya Mwingilo wa Bupainiya wanembululwa jibiji, wanengezhewa kukatendeka kumufunda pa kupwa kwa mwaka wa mwingilo wa 2004. Mu kuya kwa kimye, bapainiya baingila myaka yavula, batanwapo kala ku sukulu, bakekala pamo mu sukulu na bapainiya bakatataka.
Bukwasho bwa Lesa ne bumpanyi bwa bantu bwalengela kuba’mba Mazubo a Bufumu avula atungiwe, kikatakata mu byalo biyanji. Mu byalo byavula babena kubaishako misampi mambo bantu bavula babena kukeba kajo ka ku mupashi. Buloshuwa wa Ilemenai Bumi Pano Pantanda Myaka Yonse! pano luno wanembwa mu milaka 299, upulintwa kibelengelo kyafika ku 139 milyonyi; Kuyuka Kutangijila ku Bumi Bwa Myaka wakilaila kibelengelo kya 93 milyonyi mu milaka 161; ne buloshuwa wa Nanchi Lesa Ukebaka Kwiatweba? wakilaila kibelengelo kya 200 milyonyi mu milaka 267.
Twibatambwila na muchima umo bonse 258,845 bepaine abo bene kupichila mu lubatizhilo lwa mu mema mwaka wapwa wa mwingilo! Nangwa kyakuba kutundaika kwenu kwa Bufumu bwa Lesa kwimulengela kushikwa kwi Satana, bino kwimulengela kwikala bantu Yehoba boapesha ne kuzhikijilwa ku mupashi kimye kyo mubena kunyema kapela ko bemutongwela. (Hebe. 12:1, 2; Lum. 12:17) Ee, ketekelai’mba ‘aye wimulama kechi ukakunuka ne.’—Sala. 121:3.
Kinembelo kya mwaka wa 2004 kyaamba’mba, “Labainga mukenkentenga ... Mwikale ba kutengelela jimo” kyafikilatu pa kimye kyawama. (Mat. 24:42, 44) Bena Kilishitu balondololwa mu Byambo bya Lesa amba, bañenda baji mu buno bwikalo bubena kuya ku lonaiko. (1 Pe. 2:11; 4:7) Onkao mambo, twafwainwa kutesha muchima ku bintu bya ku mupashi, kupeezha bwikalo bwetu ne kupima michima yetu bulongo. “Nsuñunyi mukatampe” ukeba kwituja, ne kuba’mba twikale mu buno bwikalo bwanji.—Lum. 12:9.
Kutanga Baibolo kimye kyonse kwanema bingi mambo kwakonsha kwitukwasha kwikala balaba. Yakonsha kwitukwasha kuba’mba ‘kwitaba kwetu kwikala ee, ee,’ ne ‘kulama bulongo ntendekelo ya luketekelo lwetu kasa twakoselamo ne ku mpelo.’ (Yako. 5:12; Hebe. 3:14) Kutanga Baibolo kimye kyonse kwitulengela kuyuka kyalo byo kyakana mizhilo ya Lesa ibula kwaluka. (Mala. 3:6; 2 Timo. 3:1, 13) Maana a mu Baibolo akonsha kwitukwasha kukana ‘kulondela bishimitu,’ poso kwikala bakishinka kwi Yehoba.—2 Pe. 1:16; 3:11.
Anweba bansemi, byo mubena kukomesha baana benu na kwibafunjisha ne kwibajimuna monka mwaswila aye Yehoba, nanchi mubena kwibakwasha kwibikila bikonkwanyi bya ku mupashi ne kuba’mba ‘balabenga ne kukenkenta’ nyi? (Efi. 6:4) Abya mubena kwibafunjisha kumona kimye kyabo kya kulutwe byonka Yesu wajinga muntu wakilamo maana byoamwenenga kimye kyanji kya kulutwe nyi? Yesu wakonsheshe kwikala kalipentala mukatampe, wayuka kulenga bintu, nangwa dokotala waya nkuwa, bino aye wasajilepo kwingila mwingilo wa kimye kyonse. Mwane kya kumwenako kyanji kimutundaike kuba’mba mukwashe baana benu batangizhengako Bufumu mu bwikalo bwabo.
Atweba Jibumba ja kalume wa kishinka, jaimenwako na Jibumba Jitangijila, tubena kusanchila bingi “jibumba jikatampe” pa kwitukwasha kwingila mwingilo wetu wa ‘ano mambo awama a bufumu kusapwilwa panopantanda ponse mwa kwibashimwina.’ (Lum. 7:9; Mat. 24:14, 45) Anweba batemwe muji na mulaye kufuma kwi Yehoba wakuba’mba aye uvuluka ‘mwingilo wenu ne butemwe bo mwijimwesha jizhina janji, byo mwibengijilenga bazhijikwa banji, kabiji ne pano mukibengijila byonkabyo.’ (Hebe. 6:10) Byo musakutanganga byakumwenako biji pa mapeja aji mu 2004 Yearbook ne kuyuka byafuminemo pa mambo a kwingila kwenu na ngovu, yukai’mba mwaingila lubaji lwabaya bingi mu kushimuna bukine mwaya ntanda yonse.
Mwane ikalai na luketekelo lwa kimye kya kulutwe byo mubena kutwajijila ‘kutala ku mfweto yo mukafwetwa,’ kwakubula kuleka muntu nangwa demona uji yense emwangate ino mfweto ne. (Hebe. 11:26; Kolo. 2:18) Ee, ketekelai mwi Yehoba, ne kushiinwa’mba ukakwasha bonse bamutemwa kuba’mba bakekale na bumi bwawama.—Yoa. 6:48-54.
Yukai’mba tuji bingi na lusekelo pa kwingijila pamo ne anweba mu kupana lukumo kwi Yehoba.
Atweba balongo benu,
Jibumba Jitangijila ja Bakamonyi ba kwa Yehoba