Juba ja Yehoba Jijitu Pepi
1 Bena Kilishitu batengelela ne kusakisha bingi kwiya kwa juba ja Yehoba, jo akonawinamo buno bwikalo bujipo ne kupingizhapo ntanda ipya mukekala bololoke. (2 Pe. 3:12, 13) Na mambo a kuba kechi twayuka kimye kikafikilamo jino juba ne, twafwainwa kutwajijila na kulaba ne kukenkenta kabiji ne kukwasha bakwetu kuba byonkabyo. (Ezi. 33:7-9; Mat. 24:42-44) Kulanguluka languluka pa Mambo a Lesa a bungauzhi kwitukosesha kushiinwa’mba “juba jikatampe ja Yehoba jijitu pepi.”—Zefwa. 1:14.
2 Ndonda ya Bufumu Bukatampe: Byonka byo kyanembwa mu Lumwekesho 17:9-11, mutumwa Yoano watongola “bamfumu batanu na babiji” bemenako ndonda ya bufumu bukatampe butanu na bubiji. Kabiji watongola ne ‘mfumu wa butanu na busatu,’ ubena kwimenako United Nations luno. Nanchi twakonsha kuketekela’mba kukekalako ne bufumu bukwabo bukatampe nyi? Ine, bungauzhi bwaamba’mba uno ‘mfumu wa butanu na busatu “uya mu lonaiko,” ko kuba’mba panyuma ya uno mfumu kafwako bamfumu bakwabo ba panopantanda batongolwa ne. Nanchi buno bungauzhi bubena kwimukwasha kuyuka kimye kyo tujimo byo kiji nyi?
3 Danyela 2:31-45 witukwasha kumvwisha kwiya kwa juba ja Yehoba. Mu buno bungauzhi, lukipashañano mukatampe wamwene Nebukaneza mu kiloto wimenako ndonda ya bufumu bukatampe. Buno bonse bufumu bwamweka kala. Nga ano moba, bufumu ka bo tubena kwikalamo? Tubena kwikala mu bufumu bwaimenwako na maulu a yewa lukipashañano. Buno bungauzhi bwamweshatu bulongo kikalondelapo. Bukalama bwa bantu bukonaunwatu bonse pelu pakapingakene ne “Bufumu bo bakabula konauna.” Nanchi mwamona kino byo kibena kumwesha’mba juba ja Yehoba jijitu pepi nyi?
4 Bishinka Bikwabo: Tubena kwimwena na meso bintu bikwabo bibena kumwesha’mba juba ja Yehoba jijitu pepi. Tubena kumona kufikizhiwa kwa bintu byaambijile jimo mutumwa Paulo pa mambo a byubilo bya bantu mu “moba akapelako.” (2 Timo. 3:1-5) Kabiji tubena kwingilako ne mwingilo ubena kubiwa ntanda yonse wafwainwa kubiwa mpelo saka ikyangye kufika. (Mat. 24:14) Mwane kine mwingilo wetu wa kusapwila ku bantu kimye kyonse amweshenga kubijika kwa bukiji bukiji kwa malaika kwa kuba’mba: “Akamwai Lesa, mumupe lukumo; mambo kimye kya kije kyanji kyafika.”—Lum. 14:6, 7.