Bumfumu bwa Bañanyi bo Mukasala?
1. Mambo ka bena Kilishitu o basapwila?
1 Pa kuba’mba akwashe bantu kuyuka bukalama bwawama bo bafwainwa kusala, Yesu wakambizhe baana banji ba bwanga kusapwila “mambo awama a bufumu” mpelo ya buno bwikalo saka ikyangye kufika.—Mateo 24:14.
2. Mambo ka o twakonsha kwambila’mba bena Kilishitu byo batumbijika bufumu bwa Lesa kechi kilumbulula’mba mushingi bafwaye ku makafulumende a bantu ne?
2 Na mambo a kuba Bakamonyi ba kwa Yehoba batumbijika Bufumu bwa Lesa, kechi bevwanga mu bya bumulwilantanda nangwa kusatukila makafulumende a bantu ne. (Titusa 3:1) Tukwasha bantu bakeba bololoke kulondela mizhilo yawama ya mu Baibolo. Tweseka kikatakata kwibafunjisha byo bakonsha kulondela mafunde a mu Baibolo ne kuketekela mu Bufumu bwa Lesa amba bo bonkatu bukawamisha bwikalo bwa bantu.
3. Mambo ka kutundaika Bufumu bwa Lesa o kwawamina?
3 Bintu Byawama byo Bakamona Bangikazhi ba Bufumu: Kimye kyonse Yesu waubanga bintu monka mukebela Lesa. Onkao mambo, mu kifulo kya kukeba kwiimena ne kutundaika nangwa kuwamisha bwikalo bwajingako pa kyokya kimye kupichila mu bumulwila ntanda, waingijile na ngovu kutundaika bintu bya Bufumu bwa Lesa, mambo bo bonkatu bukapwisha makatazho onse panopantanda. Na mambo a kwikala wakishinka, bamwikajikile pa jitanda ja lukumo mwiulu. Kine mwane ke mfweto ikatampe bingi, mambo wakokejile Lesa!—Danyela 7:13, 14.
4. Nga bufumu bwa Lesa bukawamisha byepi bwikalo bwa bantu?
4 Bantu bavula lelo jino babena kulondela Yesu mu kutangizhako Bufumu bwa Lesa ne kukokela kyaswa muchima wanji, nabo bakekala na kya bupe kyakilamo kuwama—jishuko ja kwikala bangikazhi mu Bufumu bwa Lesa panopantanda. (Mateo 6:33) Mu bukalama bwa butemwe, bakekala ke bantu balumbuluka ne kwikala na luketekelo lwa bumi bwa myaka ne myaka. (Lumwekesho 21:3, 4) Yoano mutanshi 2:17 waamba’mba: “Panopantanda pakapita ne lwiso lwapo, pakuba aye uba kyaswa muchima wa Lesa ukekala myaka ne myaka.” Satana ne bantu banji byo bakebafumyapo kabiji ne panopantanda ponse byo pakekala ke paladisa mukabula mabano, bapoteshi bakichima ne bupopweshi bwa bubela, kikaletanga bingi lusekelo lukatampe kwikala panopantanda myaka ne myaka!—Salamo 37:29; 72:16.
5. Mambo ka mambo o tusapwila o atelelwa’mba “mambo awama”?
5 Ee kine, Bufumu bwa Lesa bo bonkatu bukawamisha bwikalo panopantanda, kabiji ne byambo byo bebubijikilamo bitelwa’mba mambo awama.