Kebaimo Bantu Bafwainwa
1. Tumwesha byepi byo twanemeka mwingilo wa kusapwila?
1 Yesu waendanga miseke yalepa na kusapwila mambo awama a lutekenesho ku bakimote. (Isa. 61:1, 2) Byo tuji bantomesha bemenako Kilishitu, lelo jino twingila byonka byo aingijile mu mwingilo wanema wa kukebamo bantu bafwainwa mu nyaunda yetu yonse kwa kubula kukoka.—Mat. 10:11; 2 Ko. 5:20.
2. Paulo wamwesheshe byepi amba wayukile mwakwambila, kabiji ki ka kyafuminemo?
2 Yukai Mwakwambila: Mutumwa Paulo wayanga bingi ku nshinagoga na kusapwila ku Bayudea ne bealwile ke Bayudea. (Byu. 14:1) Aye wayile ne Silasa ku Filipa na kukeba bantu ‘ko balangulukile’mba apo ko kuntu ko balombela.’ Batendekele kushimuna bukine ku jibumba ja banabakazhi, ne Lidiya umo pa bano watambwijile bukine.—Byu. 16:12-15.
3. Kununga pa busapwishi bwa ku nzubo ku nzubo, kwepi kukwabo ko twakonsha kusapwila?
3 Kununga pa busapwishi bwa ku nzubo ku nzubo nanchi mwakonsha ne kusapwila ku bantu batanwa pa biteshenyi, ku mapunzha awama a kukokolokelako, ku maofweshi a mingilo, mu mikwakwa, mapunzha a busulu ne ku bisankanyi mu nyaunda yenu nyi? Kampe mwakonsha kusapwila na lamya nangwa kupichila mu makalata ku bimasamasa bya mazubo o babula kuswisha bantu kutwelatwelapo. Kukenkenta bulongo ne kuyuka mwakwambila na byo mwatana bantu mu nyaunda yenu bikemulengela “kwingijisha mwingilo wa Nkambo.”—1 Ko. 15:58.
4. Twakonsha kuba byepi umvwe nyaunda ya kipwilo kyetu yakepa?
4 Basapwishi bavula babaishako mwingilo wabo kupichila mu kuvilukila ku kipwilo kingi monka mu kyalo kyabo nangwa mu kyalo kingi. Bakwabo nabo bafunda mulaka ungi pa kuba’mba basapwilenga ku bantu bafuma mu kyalo kingi.
5. Mu ano moba o tujimo ki ka kyo twafwainwa kulabijila, kabiji twafwainwa kuba ka?
5 Atweba bonse twafwainwa kulabijila’mba “bujimi po panopantanda.” (Mat. 9:37; 13:38) Na mambo a kuba’mba mpelo ya buno bwikalo bubi yafwenya kala pepi, atweba bonse pa muntu pa muntu twafwainwa kulangulukapo bulongo pa bya bupe byetu, kimye ne pa mashinda mwa kubayishisha mwingilo wetu. Yehoba witulaya’mba inge saka tutangizhako bintu bya Bufumu, aye ukapesha kwibikako kwetu kwa kubaishako mwingilo wetu.—Mat. 6:33.