Tumusanchila Bingi Lesa ne Kilishitu pa Kukasuluka Kuji Kulutwe

Ñanyi makatazho o mupitamo pa juba pa juba? Nanchi mwi mutwe wa kisemi uji na mutembo wa kukebela bya mu bwikalo ba mu kisemi kyenu nyi? Nanchi mwi nsemi uji bunke ubena kwingila bingi na ngovu kumwena ba mu kisemi bya mu bwikalo nyi? Nanchi wi mwanyike ye bendeleka ku bakwenu ku sukulu nyi? Nanchi mubena kumanama na kikola nangwa na misongo ya mu bukote nyi? Atweba bonse tuji na makatazho. Bena Kilishitu bavula babena kumanama na bya malwa byavula bingi. Nangwa byonkabyo, twayuka kuba’mba katatakatu Yehoba aketupokolole ku ano makatazho onse.—2Ko 4:16-18.

Pa kino kimye, tutundaikwa bingi pa kuyuka kuba’mba Yehoba wayuka makatazho onse o tupitamo. Kabiji wanemeka bingi bukishinka ne kuchinchika kwetu. Witulaya bintu byawama bingi biji kulutwe. (Ye 29:11, 12) Yesu naye wituta bingi muchima. Byo twatwajijila kwingijila Lesa mu bukishinka, witulaya amba: “Nji nenu.” (Mat 28:20) Inge ke tulanguluke pa bwana bwa bene buji kulutwe, kimye kikalamanga Bufumu bwa Lesa pano pa ntanda, luketekelo lwetu lukosa bingi kabiji kitukwasha kuchinchika makatazho o tubena kupita pa kino kimye.—Lo 8:19-21.

TAMBAI VIDYO WA KUBA’MBA TAJISHAINGA KWI YESU LUVULA BYO LUBENA KWIYA!—MAPESHO A BUFUMU AJI KULUTWE, APA BINO MUKUMBULE ANO MEPUZHO:

• Bantu bebafuminye byepi kwi Lesa, kabiji ñanyi bintu byafuminemo?

• Ñanyi bintu byawama bikeyowa boba batwajijila kwikala bakishinka kwi Yehoba?

• Ñanyi kintu kikalengela’mba kukekale ano mapesho?

• Ñanyi mapesho akekala mu ntanda ipya o mutengela bingi?