Byo Balekelanga Bantu Mambo Saka Kukyangye Kwikala Bukuzhi

Mambo etu akonsha kulekelwatu kupichila mu kitapisho kya bukuzhi kya kwa Yesu kyo apaine na mashi anji. (Efi. 1:7) Nangwa byonkabyo, Baibolo waamba’mba: “Lesa mu butekanye bwanji walekejilenga mambo alengelwe kala,” ko kuba’mba Yesu saka akyangye kupana bukuzhi (Loma 3:25) Yehoba wakonsheshe byepi kulekelako bantu mambo Yesu saka akyangye kupana bukuzhi ne kutwajijila kwikala Lesa wa bololoke?

Kwi Yehoba kyajingatu nobe wapana kala bukuzhi kufumatu kimye Yehoba kyo afuukwilepo kunengezha “mwana” ukapulusha bantu bakamwitabila. (Nte. 3:15; 22:18) Lesa wayukile’mba inge kimye kyanji kyo atongwele kyafika, Mwananji ukapana bukuzhi. (Nga. 4:4; Hebe. 10:7-10) Yesu byo ajinga pano pa ntanda, Yehoba wamupele bulume bwa kulekelako bantu mambo saka akyangye kupana bukuzhi. Yesu walekejilengako mambo boba bajinga na lwitabilo mambo wayukile’mba kitapisho kyo akapana kulutwe kyakonsheshe kufuuta mambo abo.​—Mat. 9:2-6.