Mepuzho Afuma ku Batanga

Nanchi kulabijila muntu ko baambapo pa 2 Tesalonika 3:14 kubiwa na bakulumpe mu kipwilo nyi, inyi na basapwishi?

Mutumwa Paulo wanembejile bena Kilishitu ba mu Tesalonika amba: “Umvwe muntu wabula kukookela byambo byetu biji mu ino nkalata, mumulabijile.” (2 Tesa. 3:14) Kala twaambanga kuba’mba uno mukambizho bapeletu bakulumpe mu kipwilo. Inge muntu watwajijila kubula kulondela mafunde a mu Baibolo nangwa kya kuba bamukwasha pa bimye byavula, bakulumpe mu kipwilo bakonsha kwamba jashi ja kujimunako balongo ne banyenga mu kipwilo kuchiina’mba bakebongola ku yewo muntu. Inge baamba jino jashi, basapwishi mu kipwilo baleka kubila pamo bintu bimo na muntu ye balabijila nabiji kukaya ne kwikala nanji pamo pa tubimye twa kukokoloka.

Nangwa byonkabyo, twamona kuba’ma twafwainwa kupimpulako. Kyamweka bino byambo bya lujimuno byaambile Paulo bibena kwamba pa bena Kilishitu bonse pa muntu pa muntu byo bafwainwa kufuukulapo kuba kwesakana na bintu byo biji. Onkao mambo, bakulumpe mu kipwilo kechi bafwainwa kwamba jashi ja kujimunako balongo ne banyenga pa yewo muntu ne. Pano mambo ka o twapimpwila? Akilangulukai pa bine bintu Paulo byo aambilengapo byo apaine luno lujimuno.

Paulo wamwene kuba’mba bantu bamo mu kyokya kipwilo ‘baendelenga kyendeende.’ Kechi balondejilenga bintu byo bebakambizhe mu mambo a Lesa ne. Pa lwendo lwanji lwafumineko, wibakambizhe’mba: “Umvwe muntu wakana kwingila, kange mumuleke aje ne.” Nangwa byonkabyo, bantu bamo batwajijile kukaana kwingila pa kuba’mba bamonenga mwakwikwashisha nangwa kya kuba bajinga na bulume bwa kuba bino. Kabiji bebikilenga mu mambo a bakwabo. Bena Kilishitu bafwainwe kumonanga byepi bantu ba uno mutundu?​—2 Tesa. 3:6, 10-12.

Paulo waambile’mba “mumulabijile.” Kyambo kine kya Kingiliki kilumbulula kuyuka bulongo muntu wa uno mutundu kuchiina’mba wakemongola. Paulo wapaine uno mukambizho ku balongo ne banyenga bonse, kechi ku bakulumpe mu kipwilo bonkatu ne. (2 Tesa. 1:1; 3:6) Inge mwina Kilishitu yense pa muntu pa muntu wamona mwina Kilishitu mukwabo wa uno mutundu ubena kubula kulondela mafunde a mu Baibolo, aye mwine wakonsha kufuukulapo “kuleka kupwanañana” na uno muntu kyendeende.

Nanchi Paulo walumbulwilenga’mba bafwainwe kumonanga muntu wa uno mutundu nobe muntu ye bafumya mu kipwilo nyi? Ine, mambo Paulo wanungilepo’mba: “Saka mumufunda byo aji mulongo.” Onkao mambo, bena Kilishitu bonse pa muntu pa muntu bakonsha kutwajijila kupwila nanji pamo ne kwingila nanji mu mwingilo, pano bino kechi bafwainwa kukaya ne kwikala nanji pamo pa tubimye twa kukokoloka ne. Mambo ka? Paulo waambile’mba “pa kuba’mba kimulenge bumvu.” Inge twaleka kupwanañana nanji mu jino jishinda, kyakonsha kumulenga bumvu ne kupimpula byubilo byanji.​—2 Tesa. 3:14, 15.

Bena Kilishitu lelo jino bakonsha kulondela byepi luno lujimuno? Patanshi twafwainwa kushiinwa kuba’mba uno muntu kine “kyendeende” byonka byalumbulwile Paulo. Kechi waambilenga pa bantu bakonsha kupusenamo pa kuba bintu na mambo a jiwi jabo ja mu muchima nangwa na mambo a bintu byo batemwa ne. Kabiji kechi waambilenga pa bantu bakonsha kwitukozha ku muchima ne. Pakuba Paulo waambilenga pa bantu babula kukookela mafunde a mu Baibolo kya nshiji.

Lelo jino, inge twamona mwina Kilishitu mukwetu utwajijila kubula kukookela lujimuno lwa mu Baibolo,a twakonsha kwifuukwilapo atweba bene kubula kukaya ne kwikala nanji pamo pa tubimye twa kukokoloka. Byo kiji kuba’mba twafwainwa kwifuukwilapo atweba bene kuba bino, kechi twafwainwa kubuulako bantu babula balongo betu byo twafuukulapo kuba ne. Kabiji tukatwajijila kupwila na uno muntu ne kwingila nanji mu mwingilo. Inge wapimpula byubilo byanji, po po tukatendeka kukaya ne kwikala nanji pamo pa tubimye twa kukokoloka.