Fwanyikizhainga Mashimikila a mu Baibolo

Mu Baibolo muji mashimikila avula bingi o tufunjilako bintu byanema. Kufwanyikizha byamwekele biji mu ano mashimikila kwakonsha kwitukwasha kumvwisha byo tutanga mu Baibolo ne kufunjilako. Monai bino byalondelapo byo byakonsha kwimukwasha kufwanyikizha mashimikila a mu Baibolo.

• Tangainga na jiwi ja peulu. Kutanga Baibolo na jiwi ja peulu kukemukwasha kufwanyikizha byamwekele. Inge mubena kutanga Baibolo pamo na kisemi, mwakonsha kumvwisha jishimikila jo mubena kutanga inge mwaabanya ba mu kisemi bonse kutanga byepelo paamba bantu ba mu Baibolo bapusana pusana.

• Fwanyikizhainga bintu byo byajinga. Esekeshai kuyuka milanguluko ne byaumvwinenga ku muchima bantu bo baambapo mu jishimikila. Mwakonsha kwiipuzha amba: ‘Mambo ka uno muntu o aambijile nangwa kuba bintu mu jino jishinda? Inge najinga amiwa inge nalangulukilenga ne kumvwa byepi ku muchima?’

• Lengainga bipikichala. Kulenga bipikichala byaamba pa mashimikila a mu Baibolo, kwakonsha kwimukwasha kufwanyikizha ne kumvwisha bintu byamwekele nangwa kya kuba kipikichala kyo mwalenga kechi kibena kumweka bulongo ne.