Bena Kilishitu Bekwasha Inge Kwamweka bya Malwa

BITENTANSHI, binkunkwila ne kutubika kwa mitumba bipaya bingi bantu mu Indonesia. Umvwe bino bya malwa byamweka, bantu ba Yehoba bapelawizha kukwasha boba baji mu makatazho kikatakata balongo ne banyenga. Mu 2005, kwamwekele kitentanshi kikatampe mu muzhi mukatampe wa Gunungsitoli uji pa Jikuji ja Nias ku North Sumatra. Bipwilo byajinga pepi na jikuji ja Sumatra ne ofweshi wa musampi byatumine bukwasho ku yoya mpunzha kwamwekejile kino kitentanshi. Kalama wa mwanzo wa konkakwa ne waimenejilengako ofweshi wa musampi, bayile pa jikuji na kutundaika balongo. Yuniman Harefa mukulumpe mu kipwilo kya Nias, waambile’mba, “Bantu bo twajinga nabo kipikipi baumvwine bingi moyo. Bino jibumba ja Lesa byo jitunyemejile, twayukile’mba kechi tuji bunke ne.”