Bulume buji mu Mubiji wa Muntu bwa Kubuka Bilonda

BULUME buji mu mubiji bwa kubuka bilonda ne kuwamisha maselo aonaika kyo kimo kilengela’mba bantu bekale na bumi. Kuno kubukwa kutendekatu kimye muntu kyo ekozha.

Langulukai pa kino: Kuji maselo avula bingi alengela kuba’mba kwikale jino jishinda ja kubukilwamo.

• Maselo alengela mashi kuchimba eya kuzhokoloka kwapela kilonda ne kushinka pa mikotakota ya mashi yaonaika.

• Kuvimba kuzhikijila twishi kubula kutwela pa kilonda kabiji kulengela kuba’mba bintu byatwelelepo bifumepo.

• Pa moba achechetu, mubiji utendeka kuwamisha maselo aonaika, kulengela kilonda kuuma, ne kuwamisha mikotakota ya mashi yaonaika.

• Apa bino mukovu wawamisha pajinga kilonda ne kulengela kikoba kukosa.

Kufunda bichimba mashi kwalengejile bashayuka kulenga mapulasitiki akonsha kunungakana ene inge aikala na mulala. Abino bintu bebilenga na tumipila mo babika bintu biji nobe bupula biya na kutwela palajika pa kuba’mba kitendeke kunuñana. Kimye uno muchi kyo atendeka kuvwangakana utendeka kulenga kintu kyakosa pa mpunzha palajika apa bino patendeka kunungakana ne kushinkapo bulongo. Uno muchi byo atendeka kuuma, ulenga kintu kyakosa kilengela pulasitiki kunungakana ne kwikala bulongo. Shayuka umo waswa kuba’mba, jino jishinda ja kulengelamo mapulasitiki ja katataka bejikopela ku bilengwa.

Mwalangulukapo’mba ka? Nanchi bulume buji mu mubiji wa muntu bwa kubuka bilonda bwaishilekotu bwine nyi, inyi bwalengelwe?