MUTWE WA PA NKUPIKO | ÑANYI UTUNDAIKA BINGELEKEZHA?
Kechi Mwafwainwa Kutemwa Bingelekezha Ne!
“Ano moba mafilimu avula muji bingi bingelekezha.”—“The Wall Street Journal.”
MAFILIMU mutanwa bingelekezha ano moba avula bingi. Bitanwa mu mabuku ne mu mavidyo apa kompyuta abena kulenga makampanyi. Mwakonsha kuba byepi?a
Shayuka aye Claude Fischer waamba’mba, “bantu bavula lelo jino mu America baketekela bingi mu bipuku. Kabiji banyike bavula mu kino kyalo pa kuba bintu bepuzha bantu baamba bikamweka kulutwe, baitabila mu bipuku kabiji baya ne mu bishimikwa mumwekela bino bipuku javula.”
Ano moba mashimikila aamba pa mipashi yatama iji na bantu asampukila ne pa katele. Ba Michael Calia banembele mu The Wall Street Journal amba: “Ano moba mu bisho bimo, bantu babena kwingijisha bingi bya mipashi byonka byo kyajinga kala.”
Sawakya umo waambile’mba, “bantu bavula mu ntanda lelo jino baitabila bingi mu bipuku, kabiji bino bipuku bebyambapo bingi mu mabuku a kisemwa aamba pa bisho bya bantu.” Kabiji kupesapesa kwaubile bashayuka ba Christopher Bader ne ba Carson Mencken bataaine’mba, “Bena America bavula baitabila bingi mu mipashi yatama.”
Nanchi kijitu bulongo kuketekela mu mipashi yatama nyi?
a Bingelekezha byo bika?: Kwesakana na dikishonale wa Merriam-Webster’s Learner’s waamba’mba, bingelekezha “kechi bakonsha kwibilumbulula ku basayansi nangwatu ku bantu ne.”