BYA KUBA NA MITENGO YA BINTU IBENA KUKANJIJILAKOTU

Sekelainga na Bintu byo Muji Nabyo

Bantu basekela mu bintu byonka byo baji nabyo, batwajijila kwikala na lusekelo mu bwikalo bwabo. Kabiji inge kya kuba bintu mu bwikalo bwabo byapimpulwa, nabo bapimpulako bwikalo bwabo pa kuba’mba bapotenga bintu byaesakana na mali o baji nao.

ENE MAMBO O KYANEMENA KUSEKELA NA BINTU BYO MUJI NABYO

Shayuka aye Jessica Koehler wakebele kebele bishinka pa bantu basekela mu bintu byonka byo baji nabyo kabiji wataaine’mba bekala bingi na lusekelo. Bano bantu kechi bobila bakwabo kichima ne. O ene mambo bantu basekela mu bintu byonka byo baji nabyo o bekela na lusekelo kabiji kechi babambisha michima ne. Kwambatu kine, bantu bajitu na bintu bicheche bo baji bingi na lusekelo mu bwikalo. Kabiji bantu batesha muchima ku bintu byanemesha mu bwikalo, nabiji kwikalako na kimye kya kwikala pamo na kisemi nangwa na balunda, bo bekala na lusekelo.

“Byo tuji na kajo ne bivwalo, tusekela mu bino bintu.”—1 Timoti 6:8.

BYO MWAFWAINWA KUBA

Kange mwesakanyenga bintu byo muji nabyo ku biji na bakwenu ne. Inge kemwesakanye bintu bicheche byo muji nabyo ku bintu byavula bya mutengo biji na bakwenu kechi mukekala na lusekelo ne. Kabiji mukatendeka kubila bakwenu kichima. Mukalangulukanga’mba bantu baji na bintu bya mutengo byavula bo banonshi. Pano bino, bamo baji na bino bintu baji na nkongole yavula. Nicole wikala ku Senegal waambile’mba: “Kwikala na bintu byavula kechi ko kundetela lusekelo ne. Kusekela mu bintu byonka byonji nabyo ko kundetela lusekelo nangwa kya kuba bakwetu baji na bintu byavula kukila byonji nabyo.”

Esekai bino: Chinuzhukainga kuya pa makeyala a pa intaneti paji bantu bemwesha’mba baji na mali avula bingi nangwa’mba baji na bintu bya mutengo byavula.

“Muntu nangwatu ekale na bintu byavula, bintu byo aji nabyo kechi byo bimulengela kwikala na bumi ne.”—Luka 12:15.

Santainga. Bantu basanta basekela mu bintu byonka byo baji nabyo kabiji kechi balanguluka’mba bafwainwa kwikala na bintu byavula ne. Ba Roberton bekala mu Haiti baambile’mba: “Ngikalako na kimye kya kulanguluka pa bintu byawama bya ngubila bakwetu ne byo baubila kisemi kyami. Kepo nebasanchila pa bintu byo bangubila. Kabiji mfunjisha mwanami uji na myaka itanu na isatu kusanchila muntu yense wa mupapo kintu.”

Esekai bino: Pa juba pa juba, nembainga bintu byawama bimubila Lesa byo mwafwainwa kumusanchilapo, nabiji butuntulu bwa mubiji bwawama, balongo benu, balunda nenu nangwa juba byo jimweka bulongo pa kuzhika.

“Awa uji na muchima wa lusekelo utwajijilatu na kusangalala nobe uji na kijiilo.”—Byambo bya Maana 15:15.

Atweba bonse kimye kimo kitukatazha bingi kusekela mu bintu byonka byo tuji nabyo. Bino kyanema bingi kusekela mu bintu byo tuji nabyo. Inge saka tusekela mu bino bintu tukatwajijila kwikala na lusekelo. Luno lusekelo kechi twakonsha kwilupota na mali ne.