Banabalume Batungile Kyamba Kikatampe

PAPICHILE myaka yavula bingi. Baana babalume ba kwa Nowa bajinga na baana bavula. Baana babo nabo byo bakomene basemene baana bavula. Ne bantu bavujile bingi panopantanda.

Muntu umo wajinga Nimalode munkanununa wa kwa Nowa. Wajinga muntu watama bingi kabiji kibinda waipayanga banyama ne bantu. Kabiji Nimalode witongwele mwine kwikala mfumu wa bantu. Lesa kechi wamutemenwe Nimalode ne.

Pa kyokya kimye bantu bonse baambilengatu mulaka umo. Nimalode wakebelenga bano bantu bonse kwikala pamo kuba’mba ebalamenga. Pano wayuka byo aubile nyi? Waambijile bantu kutunga muzhi ne kyamba kikatampe. Tala pa kipikichala byo babena kufyatula matafwali.

Kino kishimikwa kechi kyatokesheshe Yehoba Lesa ku muchima ne. Lesa wakebelenga bantu kupalañenamo ne kukumbana panopantanda ponse. Bino bantu baambile’mba: ‘Twayai, twitungile muzhi ne kyamba kyalepesha, kikafike ne mwiulu. Kabiji tukatumbalala.’ Bantu bakebelenga kwitumbijika abo bene kechi kutumbijika Lesa ne.

Onkao mambo Lesa walengejile bantu kuleka kutunga kyamba. Nanchi wayuka byo aubile kino nyi? Walengejile bantu kutendeka kwamba milaka yapusana pusana, mu kifulo kya kwambangatu mulaka umo. Bano bantu balekele kumvwañana. O ene mambo muzhi wabo kyo atelejilwe’mba Babela nangwa’mba Babilona, kilumbulula’mba ‘Kuvulañana.’

Kepo bantu bapalañenejilemo kufuma mu Babela. Mabumba a bantu monka mo baambijilenga mulaka umo bayile na kukekala mu mapunzha akwabo a panopantanda.