Ngivi mu Isalela

AKIMONA bibena kufya uno muntu panshi mu tente wanji! Ubena kufya kivwalo kyawamisha, kyela kya ngolode, ne mashekele a siliva. Wibisendele mu muzhi wa Yeliko. Pano ki ka kyafwainwe kubiwa ku bipe byajinga mu Yeliko? Abya ukivuluka nyi?

Bafwainwe kwibyonauna, kabiji ngolode ne siliva byafwainwe kupanwa mo balaminanga bya buneme mu nzubo ya Yehoba. Kibena kumwesha’mba bano bantu basatukijile Lesa. Baibile bintu bya Lesa. Uno muntu jizhina janji Akana, ne bo ajinga nabo ke ba mu kisemi kyanji. Twaya tumone kyaubiwe.

Akana byo aibile bino bintu, Yoshua watumine banabalume bamo kuya na kulwa na bantu ba mu muzhi wa Ai. Bino bebashinjile mu bulwi. Bamo bebepaile, kabiji bashajilepo banyemene. Yoshua waumvwine bingi bulanda. Waponene panshi kinkuvumene ne kulomba kwi Yehoba amba: ‘Mambo ka o mwalekela kino kwitumwekela?’

Yehoba wakumbwile’mba: ‘Imana! Bena Isalela balenga mambo. Bashikulapo bimo byapainwe ku lonaiko nangwa kwibipana ku nzubo ya Yehoba. Baibile kivwalo kyawamisha ne kwikifya. Kechi nemupeshe ne, kanatu mwibyonaune pamo ne mwine wasenda bino bintu.’ Yehoba waambile’mba ukamubula Yoshua pa mambo a muntu watama.

Kepo Yoshua akonkenye bantu bonse pamo, kabiji Yehoba wakwachile yewa muntu watama Akana. Akana waambile’mba: ‘Nalenga mambo. Namwene kivwalo kyawamisha kya buya, ne kyela kya ngolode, ne mashekele a siliva. Ponkapo nebikumbilwe ne kwibisenda. Musa kwibitana nebifya panshi mu tente wami.’

Bino bintu byo bebitaine ne kwibileta kwi Yoshua, wamwambijile Akana amba: ‘Mambo ka obewa wituletelela bya malwa? Lelo jino Yehoba ubena kukuletela bya malwa ne obewa.’ Kepo bantu bonse bamwashile mabwe Akana ne kisemi kyanji pamo, ne kufwa bafwile. Nanchi kino kechi kimwesha’mba kechi twafwainwa kusenda bintu byabula byetu nenyi?

Panyuma ya bino, bena Isalela bayile jibiji na kulwa na bena Ai. Pa kino kimye, Yehoba wakwashishe bantu banji, ne kushinda bashinjile bulwi.