Kamwale Wakwashishe Mwine Kiyangala

NANCHI wayuka byaambilengapo uno kamwale nyi? Waambijilenga mwanamukazhi pa mambo a ngauzhi wa Yehoba, aye Elisha kabiji ne bintu byawama bya mukwashishenga Yehoba kuba. Mwanamukazhi kechi wamuyukile Yehoba ne, mambo kechi wajinga mwina Isalela ne. Pano akitwaya tumone ene mambo kamwale kyo aikejile mu nzubo ya uno mwanamukazhi.

Uno mwanamukazhi wajinga mwina Silya. Mwata wanji wajinga Nemani, mukulumpe wa nzhita ya bena Silya. Bena Silya bakwachile uno kamwale ne kumuleta ku mukazhanji Nemani amba ekale wa mwingilo wanji.

Nemani wajinga na kikola kyatama kya mbumba. Kino kikola kyakonsha ne kunyomauna mubiji wa muntu. Onkao mambo, kamwale wabujilenga mukazhanji Nemani amba: ‘Kyakonsha kuwama bingi umvwe kya kuba bankambo baya kwi ngauzhi wa Yehoba mu Isalela. Wakonsha kwibabuka mbumba yabo.’ Palutwe kacheche, mwata wanji bamubujile bino byambo.

Nemani byo akebeshe bingi kumubuka, wafuukwilepo kuya ku Isalela. Byo afikile kokwa, wayile ku nzubo ya kwa Elisha. Elisha waambijile kalume wanji kubula Nemani kuya na kowa jitanu na jibiji mu Mukola wa Yodano. Kino kyalengejile Nemani kuzhingila, ne kwamba’mba: ‘Mikola ya kwetu ko twafuma yawama kukila mikola yonse ya mu Isalela!’ Pa kupwisha kwamba bino, Nemani wafutulukile keaye.

Bino kalume wanji umo wamwambijile’mba: ‘Nkambo, umvwe Elisha wajikwimwambila kuba kintu kikatampe, inge mwikyuba. Pano nga mambo ka o mwakonsha kukankalwa kuyatu na kowa, monka mo aambila?’ Nemani waumvwijile kalume wanji ne kuya wayile na kowa jitanu na jibiji mu Mukola wa Yodano. Byo apwishishe kowa, mubiji wanji wawamine ne kwikala wakosa bulongo!

Nemani wasangalele bingi. Wabwelele kwi Elisha ne kumwambila’mba: ‘Pano nayukisha namba Lesa wa mu Isalela ye yenkatu wa kine pano panshi ponse. Onkao mambo, tambulai buno bupe bwami.’ Bino Elisha wakumbwile’mba: ‘Ine, kechi nebutambule ne.’ Elisha wayukile’mba kechi kyamufwainwe aye kutambula bobwa bupe ne, mambo Yehoba ye wabukile Nemani. Pano bino, kalume wa kwa Elisha, aye Gehazi wakebelenga bobwa bupe.

Bino byo byaubile Gehazi. Nemani byo ayile, Gehazi wamupupijile. Gehazi waambile’mba: ‘Elisha wantuma’mba nemwambile’mba ubena kukebapo bupe bumo bwa kupa balunda nanji baiya na kumufwakashisha.’ Buno bwajinga bubela bwine. Bino Nemani kechi wayukile’mba bubela ne; onkao mambo, wamupele Gehazi bya bupe bimo.

Gehazi byo abwelele ku nzubo, Elisha wayukile byo aubile. Yehoba wamubujile. Waambile’mba: ‘Na mambo a kuba wauba kino kintu kyatama, mbumba ya kwa Nemani isakukutuntulukila obewa.’ Kabiji ponkapotu, mbumba yamutuntulukijile!

Ki ka kyo twakonsha kufunjilako ku kino? Kitanshitu, twafwainwa kwikala nobe kamwale ne kubulako bantu pa mambo a Yehoba. Kino kyakonsha kwibakwasha bingi. Kya bubiji, kechi twafwainwa kwitota byonka bitotelenga Nemani patanshi ne, bino twafwainwa kukokela bakalume ba Lesa. Kya busatu, kechi twafwainwa kubepa bubela byonka byaubile Gehazi ne. Nanchi kechi twakonsha kufunda byavula kupichila mu kutanga Baibolo nenyi?