Yesu Waishile Nobe Mfumu

PANYUMATU ya kubuka bampofu babiji bajinga balulombo, Yesu waishile mu muzhi mucheche wajinga kwipi na Yelusalema. Waambijile baana banji ba bwanga babiji amba: ‘Yainga mu yewa muzhi kabiji musakutana mwana mbongolo. Mumukasulule ne kumuleta kuno kwi amiwa.’

Byo bamuletele mbongolo kwi aye, Yesu waikajilepo. Ponkapo, watendekele kuya ku Yelusalema. Bino kechi palepele ne. Byo afikile kwipi na muzhi, jibumba jikatampe ja bantu jaishile na kumutundaila. Bavula bavujile malaya abo ne kwanshika mu jishinda. Bakwabo nabo bachibile mapambo a bisonga. Baajile ano mapambo a bisonga mu jishinda ne kubijika amba: ‘Lesa apeshe mfumu ubena kwiya mu jizhina ja Yehoba!’

Kala mu Isalela, bamfumu bakatataka batwelanga mu Yelusalema saka baikala pa mwana mbongolo kuba’mba bebamone ku bantu. Bino byo byaubile Yesu. Kabiji bano bantu bamwesheshenga’mba bakebelenga Yesu kwikala ke mfumu wabo. Bino kechi bantu bonse bamukebelenga ne. Twakonsha kumona kino kupichila mu kyamwekele kimye Yesu kyo ayile ku nzubo ya Lesa.

Byo ajinga ku nzubo ya Lesa, Yesu wabukile bampofu ne balemana. Baana ba bacheche byo bamwene kino, babijikilenga saka batotaika Yesu. Bino kino kyalengejile bañanga bakatampe kuzhingila, kabiji bamwambijile Yesu amba: ‘Nanchi mwaumvwa baana byo babena kwamba nyi?’

Yesu wakumbwile’mba: ‘Ee, naumvwa.’ Nanchi mukyangye kutangapo kala byambo bya mu Baibolo byaamba’mba: ‘Mu tunwa twa twanyike ne twana twa lukeke mo mwanengezhezhe kutota Lesa nyi?’ Onkao mambo, baana batwajijile na kutota mfumu wa kwa Lesa.

Ne atweba tukeba kwikala nobe boba baana, ke ibyo nenyi? Bantu bamo bakonsha kweseka kwitukanya kwamba pa bufumu bwa Lesa. Pano bino tukatwajijila kubulako bantu bintu byawama Yesu byo akobila bantu.

Yesu byo ajinga panopantanda, kechi kyajinga kimye kyanji kya kutendeka kulama pamo nobe mfumu ne. Nanchi ukatendeka kulama kimye ka? Baana ba bwanga ba kwa Yesu bakebelenga kuyuka. Tusakutanga pa kino mu kitango kyalondelapo.