Kitango 18

Yoano Wabwelelenga Munyuma Yesu Wayijilengako Palutwe

PANYUMA ya Kijiilo kya Lupitailo mu kimye kya mwela wa mebele mu 30 C.E., Yesu ne baana banji ba bwanga bafumine mu Yelusalema. Pano bino, kechi babwelele ku mazubo abo mu Ngalilea ne, bayile mu kyalo kya Yudea mo babatizhenga. Yoano Mubatizhi waingijile uno mwingilo pepi mwaka umo, kabiji wakijinga ne na baana ba bwanga bo aingijilenga nabo.

Yesu kechi ye wabatizhenga aye mwine ne, bino baana banji ba bwanga bo babatizhenga monka mo ebabujile. Kuno kubatizha kwalumbulwilenga kintutu kimo na lubatizhilo lwabatizhenga Yoano lwajinga kiyukilo kya lulapilo lwa mambo a Bayudea o balengele na mambo a kuzhilulula lulayañano lwa Mizhilo ya Lesa. Pano bino, panyuma ya kusanguka, Yesu wakambizhe baana banji ba bwanga kubatizhanga lubatizhilo lwalumbulwilenga kintu kikwabo. Lubatizhilo lwa bena Kilishitu lelo jino ke kiyukilo kimwesha kwipana kwa muntu mwine kwingijila Yehoba Lesa.

Nangwa byonkabyo, ku ntatwilo ya mwingilo wa kwa Yesu, aye ne Yoano nangwa kya kuba kechi baingijilenga pamo ne, bafunjishenga ne kubatizha bantu balapijilenga. Bino baana ba bwanga ba kwa Yoano baubile kichima ne kunyinyita pe Yesu amba: “Mufunjishi, . . . monai ubena kubatizha, ne bonse babena kwiya kwi aye.”

Mu kifulo kya kuba kichima, Yoano wasekejile bingi pa mwingilo wa kwa Yesu kabiji wakebele ne baana banji ba bwanga nabo kusekela. Wibavulwilemo’mba: “Anweba mwayuka kushimuna kwami byo nemubujile namba kechi yami Kilishitu ne, bino bantuma kulutwe yanji.” Kepo aingijishe kino kishimpi kyawama amba: “Awa uji na musongwa ye musongoshi. Nangwa byonkabyo, mulunda wa musongoshi umvwe waimana kwipi na musongoshi ne kumvwa byo abena kwamba, wikala na lusekelo lukatampe na mambo a kumvwa jiwi janji. Onkao mambo, ne amiwa nasekela bingi.”

Yoano byo ajinga mulunda wa Musongoshi wasekejile bingi kimye kyo ayukanyikishe baana banji ba bwanga kwi Yesu saka papita kala bañondo batanu na umo. Bamo ba mwi abo baikele ke jibumba ja mwiulu ja musongwa wa Kilishitu jalengwa na bena Kilishitu bashingwa na mupashi wazhila. Yoano wakebelenga baana banji ba bwanga bo ajinga nabo pa kyokya kimye kulondela Kilishitu, mambo mwingilo wanji wajinga wa kunengezha jishinda ja kwingijilamo bulongo mwingilo wa Kilishitu. Byonkatu Yoano Mubatizhi byo alumbulula’mba: “Aye wafwainwa kuyilangako palutwe, pakuba amiwa nafwainwa kubwela munyuma.”

Mwana wa bwanga aye Yoano wajinga kala mwana wa bwanga wa kwa Yoano Mubatizhi wanembele pa mambo a kwafumine Yesu ne mwingilo wanji wanema wa kupulusha bantu byo aambile’mba: “Awa wafuma mwiulu wakila bantu bonse. . . . Shanji wamutemwa Mwana kabiji wamupa lūsa pa bintu byonse. Yense wamwitabila Mwana ukekala na bumi bwa myaka; pakuba awa ubula kukokela Mwana kechi ukekala na bumi ne, bino bukaji bwa Lesa bukekala pe aye.”

Kufuma kimye Yoano Mubatizhi po aambijile’mba mwingilo wanji ukabwela panyuma kechi papichile ne kimye kyabaya ne, bamukashile kwi Mfumu Heloda. Heloda wasongwele Helodyasa muka Filipa kolojanji kabiji Yoano byo amubujile’mba kechi wafwainwa kuba kino ne, Heloda wamutayile Yoano mu kaleya. Yesu byo aumvwine’mba Yoano bamukasa, wafumineko ku Yudea na baana banji ba bwanga ne kuya ku Ngalilea. Yoano 3:22–4:3; Byubilo 19:4; Mateo 28:19; 2 Kolinda 11:2; Mako 1:14; 6:17-20.

▪ Lubatizhilo lo babatizhenga monka mwi bakambizhizhe Yesu saka akyangye kusanguka lwalumbulwilenga ka? Ne panyuma ya kusanguka kwanji?

▪ Yoano wamwesheshe byepi amba kunyinyita kwa baana banji ba bwanga kechi kwayijilemo ne?

▪ Mambo ka Yoano o bamutayijile mu kaleya?