Kitango 72

Yesu Watumine Baana ba Bwanga 70

MWAJINGA mu mwaka wa 32 C.E., Yesu mo afikizhe myaka isatu kufuma kimye kyo abatizhiwe. Aye ne baana banji ba bwanga batainwe ku Kijiilo kya Tente wa Lusambakeno kyajinga mu Yelusalema, kabiji kampe bakijinga kwipi na Yelusalema. Yesu waingijile mwingilo wanji pa bañondo batanu na umo bashajileko kampe mu Yudea nangwa ku bushiya bwa Mukola wa Yodano mu kibunji kya Pelia. Ino nyaunda nayo bafwainwe kwingijilamo.

Ibyo kuba’mba panyuma ya Kijiilo kya Lupitailo mu 30 C.E., Yesu wasapwijile mu Yudea pepi bañondo batanu na basatu. Bino Bayudea byo bakebelenga kumwipaya pa Kijiilo kya Lupitailo mu 31 C.E., wafunjishenga mu Ngalilea mwaka umo ne kichika. Pa kyokya kimye, wafunjishe jibumba ja basapwishi bavula, jo abujile kwikala najo patanshi. Onkao mambo, pa kikye kimye watatwile mukwekele wapeleleko wa kusapwila mu Yudea.

Yesu watatwile uno mukwekele kupichila mu kusalulula baana ba bwanga 70 ne kwibatuma babiji babiji. Onkao mambo, mabumba onse ajinga 35 a basapwishi ba Bufumu a kwingijila mu nyaunda. Ano mabumba atangijileko kuya mu mizhi yonse ne mpunzha kwakebelenga kuya Yesu na batumwa banji.

Mu kifulo kya kwambila baana ba bwanga 70 kuya mu mashinagoga, Yesu wibabujile kuya mu mazubo a bantu ne kwibambila’mba: “Mu nzubo monse mo mukatwela, patanshi ambai amba: ‘Mutende ekale mu ino nzubo.’ Kabiji umvwe mulunda wa mutende mo aji, mutende wenu ukekala pe aye.” Ñanyi byambo byo basapwijilenga? Yesu wibabujile’mba: ‘Mukebabule amba Bufumu bwa Lesa bwimufwenyenya pepi.’ Buku umo waamba pa byaingijile baana ba bwanga 70 amba: “Byonkatu byajinga Nkambo yabo, konse ko bayile basapwijile ku nzubo ku nzubo.” (Matthew Henry’s Commentary)

Mikambizho Yesu yo apele baana ba bwanga 70 yajingatu pamo na yoya yo apele batumwa banji 12 kimye kyo ebatumine na kusapwila mu Ngalilea pepi mwaka umo wapichilepo. Yesu kechi wajimwinetu baana ba bwanga 70 pa mambo a kwibashikwa, bya kusapwila ku bena mazubo ne, bino wibakambizhe ne kubuka bakolwa. Onkao mambo, Yesu byo afikile, bavula bakebeshe bingi kumonañana na Nkambo wa baana ba bwanga baubilenga bya kukumya.

Mwingilo waingijile baana ba bwanga 70 ne Yesu wajingatu wa kakimye kacheche. Ponkapotu mabumba 35 a basapwishi ba Bufumu abwelele kwi Yesu. Baambile na lusekelo amba: “Nkambo, ne bandemona babena kwitukokela na mambo a kwingijisha jizhina jenu.” Uno sawakya wawama wa mwingilo wasangajikile bingi Yesu, mambo waambile’mba: “Namona Satana wapona kala mwiulu nobe kubesha kwa mvula. Nemupa lūsa lwa kunyanta pa miloolo ne tuminye.”

Yesu wayukile’mba panyuma ya kusemwa kwa Bufumu bwa Lesa mu kimye kya ku mpelo, Satana ne bandemona banji bakebapangamo mwiulu. Bino akwa kupanga bandemona babula kumweka kwaubilenga bantu, kwamwesheshenga’mba kino kintu kine kikobiwa. Onkao mambo, Yesu waambilenga pa kupona kwa kwa Satana kufuma mwiulu mu kimye kya kulutwe kuba’mba kukobiwa. Ko kuba’mba kyajinga mu kifwanyikizho baana ba bwanga 70 mo bebapelejile lūsa lwa kunyanta pa miloolo ne tuminye. Pano bino, Yesu wibambijile’mba: “Kange musekele na mambo a kuba amba bandemona babena kwimukokela ne, bino sekelai mambo mazhina enu anembwa mwiulu.”

Yesu wasangalele bingi ne kutota Lesa patoka na mambo a kwingijisha bakalume bepelula kwingila ino mingilo ya kukumya. Byo aalulukijile ku baana banji ba bwanga wibambijile’mba: “Bo balusekelo aba bamona bintu byo mubena kumona. Mambo nemwambila namba: Bangauzhi ne bamfumu bavula bakebelenga kumona bintu byo mubena kumona, pano bino, kechi bebimwene ne, kabiji bakebele kumvwa bintu byo mubena kumvwa bino kechi bebyumvwine ne.” Luka 10:1-24; Mateo 10:1-42; Lumwekesho 12:7-12.

▪ Yesu wasapwijile kwepi kimye kya mwingilo wanji wa myaka isatu, kabiji nyaunda ka yo aingijilemo bañondo batanu na umo bapeleleko?

▪ Kwepi Yesu ko akambizhe baana ba bwanga 70 kutana bantu?

▪ Mambo ka Yesu o aambijile’mba wamwene Satana saka apona kufuma mwiulu?

▪ Mu ñanyi jishinda baana ba bwanga 70 mo banyanchijilenga pa miloolo ne tuminye?