Kitango 73

Mwina Samaliya Wakwashañene

KYAMWEKA Yesu wajinga kwipi na Betani palepele makilomita asatu kufuma ku Yelusalema. Muntu wayukile Mizhilo ya Mosesa waishile kwi aye ne kumushikisha’mba: “Mufunjishi, ñanyi kintu kyo nafwainwa kuba pa kuba amba nkekale na bumi bwa myaka?”

Yesu wayukile’mba awa shabyambo kechi wakebelengatu kuyuka bintu ne, bino wamwesekelenga. Shabyambo wakebelenga amba Yesu akumbwile mu jishinda ja kulengela Bayudea kuzhingila. Onkao mambo, Yesu wakebele’mba shabyambo ekumbwile mwine, wamushikishe amba: “Ñanyi kintu kyanembwa mu Mizhilo? Utangamo amba ka?”

Shabyambo wakumbwile kupichila mu kutongola Mizhilo ya Lesa iji mu Mpitulukilo ya mu mizhilo 6:5; Bena Levi 19:18 ne kwamba’mba: “‘Wafwainwa kutemwa Yehoba Lesa wobe na muchima wobe yense, na mweo wobe yense, na bulume bobe bonse, ne na maana obe onse’ ne ‘kutemwa mukwenu byonka byo witemwa obe mwine.’”

Yesu wamubujile’mba: “Wakumbula bingi bulongo; ‘twajijila kuba byonka bino kabiji ukekala na bumi.’”

Nangwa byonkabyo, shabyambo kechi watondelwe na uno mukumbu ne. Mukumbu wa kwa Yesu kechi washinkamikile uno muntu ne. Uno shabyambo wakebele kwiumvwina mwine kwi Yesu kuba’mba mweno yanji ya bintu yawama kabiji waoloka mu byo aubilenga na bantu bakwabo. Onkao mambo, wamushikishe’mba: “Nanchi mukwetu ye ñanyi?”

Bayudea baitabijile amba kyambo kya kuba’mba “mukwetu” kingilatu ku Bayudea kwapwa byonkatu byaamba Bena Levi 19:18. Palutwe kacheche, mutumwa Petelo waambile’mba: “Mwayukishatu bulongo amba kechi kyafwainwa Muyudea kwinunga nangwa kwisamba na muntu wa mu kisaka kikwabo ne.” Onkao mambo, awa shabyambo kampe ne baana ba bwanga ba kwa Yesu, baitabijile amba umvwe saka bamwesha lusa bakwabo Bayudea ko kuba’mba baoloka. Kabiji bantu babujile Bayudea bebamonanga amba kechi bo bakwabo ne.

Kwa kubula kuzhingijisha bamutelekelenga, Yesu waolwele byepi ndangulukilo yabo? Wibabujile jishimikila kampe ja kintu kyamwekele. Yesu waambile’mba: “Kwajinga muntu umo [Muyudea] wafuminenga ku Yelusalema kuya ku Yeliko kabiji bamukwachile ku tupondo ne kumuvula, kumupuma ne kumusha saka apungila.”

Yesu watwajijile kwamba’mba: “Ponkapo ñanga wa Lesa waishilenga mu jishinda, byo amumwenetu, wamusezhezhe. Kabiji mwina Levi naye byo afikile pa ino mpunzha ne kumumona, wamusezhezhe. Bino mwina Samaliya umo wapichilenga mu jino jishinda byo afikile pe aye ne kumumona, wamubijile lusa.”

Bañanga bavula ne bankwasho babo bena Levi baingijilanga ku nzubo ya Lesa baikalanga mu Yeliko, palepele makilomita 23 kupita mu jishinda jatamine bingi jakunkulukile mamita 900 kufuma ko baingijilanga ku nzubo ya Lesa mu Yelusalema. Ñanga ne mwina Levi bafwainwe kukwasha awa mukwabo Muyudea watainwe mu lukatazho. Abo kechi bamukwashishe ne. Bino mwina Samaliya ye wamukwashishe. Bayudea bashikilwe bingi bena Samaliya kya kuba batukile ne Yesu kupichila mu kumutela’mba “mwina Samaliya.”

Ñanyi kintu mwina Samaliya kyo aubile pa kukwasha Muyudea? Yesu waambile’mba: “Wafikile ponka ne kumupomba pa bilonda byanji, waichilapo ne manyi ne binyu. Kepo amubikile pa nyama wanji ne kumuleta ku nzubo ya benyi na kumulama. Juba jalondejilepo, washikwile mandenali abiji ne kupa mwina nzubo ne kumwambila amba, ‘Mu mulame, byonse byo mukengijisha pe aye kununga pa ino, nkeya kwimupa pa kukabwela.’”

Yesu byo apwishishe kwamba jino jishimikila, waipwizhe awa shabyambo amba: “Pa bano bonse basatu, wepi ye wamona amba ye wajinga mukwabo wa yewa muntu ye bakwachile ku tupondo?”

Na mambo a kuba kechi watemenwe bena Samaliya ne, awa shabyambo wakumbwiletu amba: “Yenka wamubijile lusa.”

Yesu wamwambijile’mba: “Yanga ukobenga byonkabyo.”

Umvwe Yesu waambijile awa shabyambo mu kushinkamika amba bantu babujile Bayudea nabo bajinga bakwabo, uno muntu inge kechi wakainetu kuswa kino ne, bino ne bantu bavula inge bamutundaikile awa shabyambo kimye kyo esambilenga ne Yesu. Nangwa byonkabyo, jino jishimikila jimwesha patoka amba bakwetu kechi ba mu mukoka nangwa mutundu wetu yenka ne. Kine Yesu wayukile bingi kufunjisha! Luka 10:25-37; Byubilo 10:28; Yoano 4:9; 8:48.

▪ Ñanyi mepuzho shabyambo o aipwizhe Yesu, kabiji mambo ka o aipwizhizhe?

▪ Bayudea baitabijile amba bakwabo bo bañanyi, kabiji ñanyi kishinka kimwesha’mba baana ba bwanga nabo bajinga na ino ndangulukilo?

▪ Yesu waubile byepi pa kuba’mba akwashe awa shabyambo kwa kubula kukana?