Kitango 117

Muchima Wamukatezhe Bingi mu Bujimi

YESU byo apwishishe kulomba, aye ne batumwa banji 11 bakishinka baimbile nyimbo ya kutota Yehoba. Byo bapwishishe kwimba, bafuminemo mu kibamba kya peulu ne kuya mwafita kabiji babwelele baabuka jibiji Kinkunenke kya Kidelona kyajinga na ku Betani. Byo bakiyilenga, baimene pa mpunzha yo atemenwe, ko kuba’mba bujimi bwa Ngesemani. Buno bujimi bwajinga pa Mutumba wa Olebeta nangwa kwipi na yenka uno mutumba. Yesu javula wasambakenanga na batumwa banji ku ino mpunzha mu bichi bya maolivi.

Byo ashile batumwa banji batanu na basatu kampe kwipi na kibelo kya bujimi, wibakambizhe amba: “Ikalai pano byo nakiya na kulomba.” Kepo asendele batumwa basatu, ba Petelo, Yakoba ne Yoano ne kuya nabo mu bujimi. Muchima wamukatezhe bingi Yesu ne kuba bulanda. Wibabujile’mba: “Naumvwa bingi bulanda nsaka ne kufwa. Shalai ponka pano mulabenga pamo ne amiwa.”

Byo aendeleko pacheche byobya, Yesu wakuvumene panshi ne kutatula kulomba na mukoyo amba: “Tata, umvwe kyakonsheka, kano katomeno kampitaile. Bino kechi kyo kyaswa muchima wami ne, poso kyaswa muchima wenu.” Watazhizhe mu ka? Mambo ka ‘o aubile bulanda kya kuba kasake ne kufwa’? Nanchi wakebele kusankilapo byo afuukwilepo kufwa ne kubula kunengezha bukuzhi nyi?

Ine! Yesu kechi walombelenga amba abule kufwa ne. Nangwatu byamwambijile Petelo amba kechi ukafwa lufu lwa bukitapisho ne, Yesu kechi wateleko muchima ku bino byambo ne. Muchima wamukatezhenga mambo waakaminwe amba lufu lo asakufwilamo nobe kapondo, lukaleta mwenga pa jizhina ja Shanji. Wamwene’mba mu maolatu acheche basakumupopa pa kichi kyalumanamo nobe muntu watama ko kuba’mba uba mwenga Lesa! Kino kyo kyalengejile muchima kumukatazha.

Byo alombele pa kimye kyabaya, Yesu wabwelele ne kutana batumwa banji basatu balaala. Waambijile Petelo amba: “Nanchi anweba kechi mwakonsha kulaba pamo ne amiwa pa jiola jimo nenyi? Labainga ne kukenkenta ne kulombanga kwa kubula kuzhikilwa kuba amba mubule kuponena mu lweseko.” Nangwa byonkabyo, byo ayukile lukatazho lo bajingamo ne byo bwaijile, waambile’mba: “Kine muchima wakebesha, pakuba mubiji wakoka.”

Yesu wayile ja bubiji ne kulomba kwi Lesa amba afumye kwi aye “kano katomeno,” ko kuba’mba, mwingilo Yehoba ye amupele nangwa’mba kyaswa muchima wanji kwi aye. Byo abwelele jibiji, wataine bano basatu balaala bino abo bafwainwe kulombanga kuba’mba babule kuponena mu lweseko. Yesu byo ebambijile, bakankelwe ne kya kwamba.

Kyapeleleko, kimye kya busatu, Yesu wayile palepako byobya kabiji wafukamine ne kujijisha ne kulomba amba: “Tata, umvwe mukeba, fumyai kano katomeno kwi amiwa.” Kine, Yesu wajinga mu misongo ikatampe na mambo a mwenga ukeya pa jizhina ja Shanji byo akafwa nobe kapondo. Kumupamo mambo nobe muntu uba mwenga Lesa ke kintu kyamukatezhe bingi!

Nangwa byonkabyo, Yesu watwajijile kulomba amba: “Kyaswa muchima wenu kyubiwe kechi kyami ne.” Yesu wakokejile kuba kyaswa muchima wa Lesa. Ponkapo, malaika waishile kufuma mwiulu na kumukosesha ne kumutundaika. Kyamweka malaika wabujile Yesu amba waitabilwa kwi Shanji.

Kine, Yesu wajinga na mwingilo mukatampe bingi! Bumi bwanji bwa myaka ne myaka ne bwa bantu bonse bwaimenejile pe aye. Muchima wamukatezhenga bingi. Onkao mambo, watwajijile kulomba na mukoyo ne masulwila anji aalukile nobe mashi abena kunokela panshi. Buku umo waamba’mba: “Nangwa kya kuba kino kintu kechi kimwekamweka ne, masulwila aluka nobe mashi . . . umvwe muntu ubena kukatazhiwa mu milanguluko.” (The Journal of the American Medical Association)

Byo apwishishe kulomba, Yesu wabwelele ja busatu ku batumwa banji, napo wibataine balaala. Bakokele na mambo a bulanda. Waambile’mba: “Mambo ka o mwalaajila ne kukokoloka pa kimye kyanema nobe kino? Talai! Kimye kyafika kuba amba Mwana muntu bamusolole ku maboko a bandengamambo. Imanai; twayai tuyenga. Talai! Wakunsolola wafika kala.”

Yesu byo akyambilenga, Yudasa Isakaliota waishile na jibumba jikatampe saka basenda bimunyi, malampi ne bilwilo. Mateo 26:30, 36-47; 16:21-23; Mako 14:26, 32-43; Luka 22:39-47; Yoano 18:1-3; Bahebelu 5:7.

▪ Byo balupukile mu kibamba kya peulu, kwepi Yesu ko atwajile batumwa banji kabiji ñanyi kintu kyo aubile kokwa?

▪ Yesu byo alombelenga, batumwa banji baubilenga ka?

▪ Mambo ka Yesu muchima o amukatezhenga, kabiji ñanyi kintu kyo alombele kwi Lesa?

▪ Ñanyi kintu kyalengejile masulwila a kwa Yesu kwaluka nobe mashi abena kunokela panshi?