Kitango 122

Kwi Pilato ne kwi Heloda Kabiji Bamubwezhezhe Jibiji

NANGWA kya kuba Yesu kechi wifile kwi Pilato amba mfumu ne, walumbulwile’mba Bufumu bwanji kechi bwasatukijile bufumu bwa bena Loma ne. Yesu waambile’mba: “Bufumu bwami kechi bwa pano pa ntanda ne. Umvwe bwajinga bwa pano pa ntanda, inge bakalume bami bajikundwilako kuba amba babule kunsolola ku Bayudea. Pakuba bufumu bwami kechi bwa pano pa ntanda ne.” Onkao mambo, Yesu waambile jisatu amba uji na Bufumu nangwa kya kuba kechi bwa pano pa ntanda ne.

Nangwa byonkabyo, Pilato wamushikishe amba: “Nanchi obewa wi mfumu nyi?” Mu jishinda jikwabo wamushikishenga amba, nanchi wi mfumu nangwa kya kuba Bufumu bobe kechi bwa pano pa ntanda nenyi?

Yesu walengejile Pilato kuyuka’mba waamba bingi bulongo byo amubujile’mba: “Anwe bene yenu mwaamba amba ne mfumu. Na mambo a kushimuna bukine, kyo kyo nasemekejilwe ne kwiya pano pa ntanda. Yense watemwa bukine umvwa jiwi jami.”

Ene mambo Yesu o aishijile pano pa ntanda ke a kushimuna “bukine,” bwa pa mambo a Bufumu bwanji. Yesu winengezhezhe kwikala wakishinka ku buno bukine nangwa kya kuba bwamwipaishe. Nangwa kya kuba Pilato washikishe’mba: “Nanchi bukine bo bu ka?” kechi wakebele kumulumbulwila ne. Waumvwine byavula byo akonsheshe kuchibilapo mambo.

Pilato walupukile pangye ya kipango pajinga jibumba. Kyamweka walupukile ne Yesu kabiji wabujile bañanga bakatampe ne bo bajinga nabo amba: “Uno muntu kechi namutana na mambo ne.”

Jibumba byo jazhingijile na mo achibijile mambo, jakoselepotu na kwamba’mba: “Bintu byo afunjisha bantu mu Yudea monse, kutatwilatu ku Ngalilea kufika ne kuno, byaleta makatazho avula.”

Bano Bayudea balengejile Pilato kukumya bingi. Onkao mambo, bañanga bakatampe ne bakulumpe byo batwajijile na kubijika, Pilato watajile Yesu ne kumushikisha’mba: “Nanchi kechi ubena kumvwa bintu byavula byo babena kukushiina nenyi?” Yesu kechi wakumbwile ne, waubiletu nzoo. Byo abujile kukumbula pa mambo o bamupelengamo, kyalengejile Pilato kukumya bingi.

Pilato byo ayukile’mba Yesu mwina Ngalilea, wakebelepo jishinda jakwifumishamo mu mambo. Mfumu wa mu Ngalilea aye Heloda Antipasa (mwana wa kwa Heloda Mukatampe) wajinga mu Yelusalema pa Kijiilo kya Lupitailo. Onkao mambo, Pilato watumine Yesu kwi aye. Heloda Antipasa ye wachibile Yoano Mubatizhi mutwe, kabiji Heloda waakaminwe bingi byo aumvwine mingilo ya kukumya yaubilenga Yesu. Kabiji waakaminwe amba Yesu ye wajinga Yoano wasangukile ku bafu.

Pa kikye kimye, Heloda watemenwe bingi byo amwene Yesu. Kechi watemenwe na mambo a kuba’mba watele muchima ku bwikalo bwa kwa Yesu nangwa kukeba kuyuka umvwe mambo o bamupelengamo ajinga a kine nangwa ne. Bino wakebelenga amba Yesu obepo kya kukumya.

Nangwa byonkabyo, Yesu wakaine. Kabiji Heloda byo amushikishe kechi wakumbwile ne. Byo amulengeshe bumvu, Heloda ne bashilikale banji bamwendelekelenga Yesu. Bamuvwikile kivwalo kyabekelenga ne kumuseka. Kepo bamubwezhezhe kwi Pilato. Na mambo a kino, Heloda ne Pilato bajinga kala balwanyi, baikele ke balunda.

Yesu byo abwelele, Pilato waichile bañanga bakatampe, bantangi ba Bayudea ne bantu ne kwibambila’mba: “Mwaletele uno muntu kwi amiwa amba utundaika bantu kusatuka. Pano namupesapesa ku meso enu, bino kechi namutana na mambo o mubena kumushiina ne. Ne Heloda naye kechi wamutana na mambo ne, mambo wamubwezha kwi amiwa kabiji kafwako mambo o alenga a kumwipayilapo ne. Onkao mambo, nsakumuzhipaula ne kumukasulula.”

Onkao mambo, pa bimye bibiji Pilato waambile’mba Yesu kechi wamutanapo na mambo ne. Wakebeshe bingi kumukasulula mambo wayukile’mba kichima kyo kyalengela bañanga kumuleta kwi aye. Pilato byo akebeshe kukasulula Yesu, bamubujile ne kintu kyamulengejile kukebesha kuba kino. Byo aikele pa kipona kya kuchibilapo mambo, mukazhanji watumine muluwe amba: “Kange mumukatazhe awo muntu waoloka ne, naji kumanama bingi lelo mu kiloto [kyamweka kyafumine kwi Lesa] na mambo a aye.”

Pano Pilato wakonsheshe kukasulula byepi uno muntu wabujile mambo, byo ajinga na lūsa lwa kuba kino? Yoano 18:36-38; Luka 23:4-16; Mateo 27:12-14, 18, 19; 14:1, 2; Mako 15:2-5.

▪ Yesu wakumbwile byepi bwipuzho bo bamushikishe pa mambo a bufumu bwanji?

▪ Ñanyi “bukine” Yesu bo ashimwinenga byo ajinga pano pa ntanda?

▪ Pilato wachibile byepi mambo, kabiji bantu baubilepo ka, kabiji Pilato waubilepo byepi pe Yesu?

▪ Heloda Antipasa wajinga ñanyi, kabiji mambo ka o atemejilwe pa kumona Yesu, kabiji waubilepo ka pe aye?

▪ Mambo ka Pilato o akebeshe kukasulula Yesu?