Kitango 127

Bamuzhikile pa Kitanu—Bamusangwile pa Mulungu

PAJINGA pa Kitanu mabanga kabiji juba ja Sabado Nisanyi 15 jatatwile pa kuzhika juba. Mubiji wa kwa Yesu wakijinga pa kichi, bino atwa tupondo tubiji to bapopele pamo ne aye twakijinga tumi. Pa Kitanu mute bepatelanga amba kimye kya Kunengezha Sabado mambo bantu po po banengezhenga kajo ne kupwisha mingilo yonse yo bafwainwe kubula kupembelela kwiingila panyuma ya juba ja Sabado.

Aja juba ja Sabado kechi jajingatu juba ja Sabado jo baubanga kimye kyonse (juba ja butanu na bubiji mu mulungu) ne, bino jajinga juba ja Sabado “jikatampe.” Bejitelanga bino mambo Nisanyi 15 jo jajinga juba jitanshi ja moba atanu na abiji a Kijiilo kya Bashinkwa Bakubula Mbizho (kabiji jaikalanga juba ja Sabado, pa juba jonse mu mulungu po jafikilanga) jaikejile pamo na juba ja Sabado jo baubanga kimye kyonse.

Kwesakana na Mizhilo ya Lesa mibiji kechi yafwainwe kukisha pa kichi ne. Onkao mambo, Bayudea baambijile Pilato amba bachimaune maulu aboba bo bapopele pa kichi kuba’mba bafwe bukiji. Bashilikale bachimawine maulu a tupondo tubiji. Bino maulu a kwa Yesu kechi beachimawine ne, mambo bamutaine wafwa kala. Kino kyafikizhe kinembelo kyaamba’mba: “Kafwako kikupa kyanji nangwa kimo kikachimunwa ne.”

Nangwa byonkabyo, pa kuba’mba bashiinwe amba kine Yesu wafwa, mushilikale umo wamwashile jifumo mu mbavu. Jino jifumo jakafikile ku muchima, ponkapo mashi ne mema apokomokele. Mutumwa Yoano wamweneko kino, waambile’mba kino kyafikizhe kinembelo kikwabo kyaamba’mba: “Bakatala ku yewa ye baashile jifumo.”

Kabiji akwa ko bapopejile Yesu pa kichi kwajinga ne Yosefwa wafumine mu muzhi wa Alimatea, kabiji wajinga muntu ye banemekele bingi mu Kije Kikatampe. Aye wakaine byafuukwile kije kuba byatama Yesu. Yosefwa wajinga mwana wa bwanga wa kwa Yesu, nangwa kya kuba kechi wisolwele ne, mambo wachiinenga. Pano bino, wachinchikile ne kuya kwi Pilato ne kulomba mubiji wa kwa Yesu. Pilato wakambizhe mukulumpe wa bashilikale kuya na kumona umvwe Yesu wafwa, byo ataine amba wafwa, Pilato wapele Yosefwa mubiji wa kwa Yesu.

Yosefwa wasendele mubiji ne kumupombakanya mu kisapi kyawamisha kya linenyi ne kunengezha kumuzhika. Bamukwashisheko kwi Nikodema mukwabo wa mu Kije Kikatampe. Nikodema naye wakankelwe kusolola lwitabilo lwanji mwi Yesu mambo wachiinenga kumufumyapo pa kifulo kyanji. Bino pa kikye kimye waletele mola na maalo bifwa mali avula binunka bulongo. Mubiji wa kwa Yesu bamupombakenye mu bisapi mo babikile bino binunka bulongo monka mwayijile kisela kya kuzhika kya Bayudea.

Mubiji wa kwa Yesu bamuzhikile mu kilende kya katataka kya kwa Yosefwa kyo basongele mu jibwe kyajinga mu bujimi pepi na po bapopejile Yesu. Kabiji baalumwijileko jibwe jikatampe ku kilende. Na mambo a kuba juba ja Sabado jajinga pepi, mubiji bamunengezhezhe bingi bukiji. Onkao mambo, Maliya Magadala ne Maliya inanja Yakoba Mucheche, kampe bakwashishenga kunengezha, bayile lubilo ku nzubo na kunengezha bintu binunka biya ne manyi anunka bulongo. Balangulukilenga amba panyuma ya juba ja Sabado, bakawamisha bulongo mubiji wa kwa Yesu kuba’mba akekale kimye kyabaya.

Juba jalondejilepo, ko kuba’mba pa Kibelushi (Juba ja Sabado) bañanga bakatampe ne Bafaliseo bayile kwi Pilato ne kumwambila’mba: “Anweba kitumbafumu, twavuluka bintu byaambile yewa mujimbijimbi saka akyangye kufwa amba, ‘Pa juba ja busatu nkasanguka.’ Onkao mambo, kambizhai kuba amba kilende bekisopenga kufikatu ne pa juba ja busatu, kuchina amba baana banji ba bwanga bakeya kumwibamo ne kwambila bantu amba, ‘Wasanguka ku bafu!’ kabiji buno bujimbijimbi bwapelako bukakilamo kutama kukila butanshi.”

Pilato wibambijile’mba: “Sendai bakasopa bakasopenga kilende.” Onkao mambo, bayile ne kushinkishako jibwe ku kilende ne kubikako bashilikale bena Loma bakwikisopa.

Lukelokelo pa Mulungu, Maliya Magadala ne Maliya inanja Yosefwa pamo ne Salome, Yoana ne banabakazhi bakwabo basendele binunka bulongo ne kuya ku kilende kuba’mba bakawamishe mubiji wa kwa Yesu. Byo bayilenga beambijilenga mulwabo amba: “Ñanyi usakwitwalumwinako jibwe ku kibelo kya kilende?” Bino byo bafikile, bamwene’mba kwaubiwa kitentanshi ne malaika wa Yehoba waalumunako jibwe. Bakasopa kechi bajingako ne. Kabiji kilende kyajinga kya kyashi! Mateo 27:57–28:2; Mako 15:42–16:4; Luka 23:50–24:3, 10; Yoano 19:14, Yoa 19:31–20:1; Yoa 12:42; Bena Levi 23:5-7; Mpitulukilo ya mu mizhilo 21:22, 23; Salamo 34:20; Zekaliya 12:10.

▪ Mambo ka pa Kitanu o bepatelelanga amba kimye kya Kunengezha Sabado kabiji juba ja Sabado “jikatampe” jo ji ka?

▪ Ñanyi binembelo byafikile pa mambo a mubiji wa kwa Yesu?

▪ Ba Yosefwa ne Nikodema baubilepo byepi pa mambo a kuzhikwa kwa kwa Yesu, kabiji Yesu wajinga ñanyi wabo?

▪ Bañanga bakatampe balombele ñanyi kintu kwi Pilato, kabiji wibambijile’mba ka?

▪ Ñanyi kintu kyamwekele pa Mulungu lukelo?