Kitango 128

Yesu Ke Mumi!

BANABAKAZHI byo bataine kilende mo bazhikile Yesu kyashinkuka, Maliya Magadala wayile lubilo na kubula ba Petelo ne Yoano. Nangwa byonkabyo, kyamweka banabakazhi bakwabo bashajile ku kilende. Ponkapo malaika wamwekele kwi abo ne kwibeta kutwela mukachi.

Bano banabakazhi byo batwelele mukachi batainemo malaika mukwabo, kabiji malaika umo wibambijile’mba: “Kuba moyo ne, nayuka namba mubena kukeba Yesu ye bapopele pa kichi. Aye kechi uji kuno ne, mambo wasanguka kala monka mo aambijile. Iyai, monai po alaajile. Pelawizhai kabulai baana banji ba bwanga amba wasanguka kala ku bafu.” Onkao mambo, na mambo a moyo ne lusekelo lukatampe, bano banabakazhi nabo bafumineko lubilo.

Pa kikye kimye, Maliya wataine ba Petelo ne Yoano ne kwibabula’mba: “Nkambo bamufumyamo mu kilende, kabiji kechi twayuka ko bamubika ne.” Ponkapo bano batumwa babiji bayile lubilo. Yoano wajinga bingi na lubilo kampe mambo wakijinga mwanyike kabiji ye mutanshi wafikile ku kilende. Pa kikye kimye banabakazhi saka baya kala, onkao mambo ku kilende kafwako wajingako. Yoano byo abandamine ne kusumbila mu kilende wamwene bisapi, bino kechi watwelelemo ne.

Petelo byo afikile wapitayijile kutwela mukachi. Wamwene bisapi bya linenyi saka byalumbama ne kisapi kyo bapombele ku mutwe wa kwa Yesu. Kino kisapi kyajingatu pa bunke bwakyo saka bekivunga. Yoano naye watwelele mu kilende kabiji waswile byaambile Maliya. Pano bino, ba Petelo ne Yoano kechi bakwatakenye amba Yesu wasanguka ne, nangwa kya kuba wibabulanga javula amba ukasanguka. Byo bakankamene babwelele ku nzubo, bino Maliya wabwelele jibiji ku kilende, washajile konka.

Pa kikye kimye, banabakazhi bakwabo bayile na kubula baana ba bwanga amba Yesu wasanguka byonka malaika byo ebakambizhe. Byo bapimpaukilenga ne kunyema, Yesu wibasambakene ne kwibemuna amba: “Mutende mwane!” Bafukamine ne kumulambila. Kepo Yesu ebambijile’mba: “Kwakamwa ne! Yainga mukabule balongo bami kuba amba baye ku Ngalilea kabiji bakantana konkakwa.”

Byo kwaubiwe kitentanshi ne bamalaika byo bamwekele, bashilikale basopelenga baubile bingi moyo ne kwikala nobe bafwa. Byo bapupulukile, ponkapo batwelele mu muzhi ne kubula bañanga bakatampe kintu kyamwekele. Panyuma ya kwisambapo na “bakulumpe” ba Bayudea bafuukwilepo kuzhimañanya mambo kupichila mu kupa bashilikale mazhikakanwa. Bebakambizhe’mba: “Mwambe amba, ‘Baana banji ba bwanga baji kwiya bufuku ne kumwibamo mubiji saka twalaala.’”

Byo kyajinga kuba’mba bashilikale bena Loma bafwainwe kwibepaya na mambo a kulaala pa nkito, bañanga bakatampe bebalayile amba: “Kabiji umvwe kitumbafumu omvwe kino [sawakya wa kuba’mba mwaji kulaala], atweba tusakwisamba nanji ne kwimulamwinako.” Na mambo a kuba mazhikakanwa o bebapele abayile, bashilikale baubijile monka mo bebakambizhe. Na mambo a kino, sawakya wabubela wa kuba’mba mubiji wa kwa Yesu bamwibamo wakumbene ku Bayudea bonse.

Maliya Magadala washajile ku kilende waubile bingi bulanda. Kyamweka walangulukilenga amba, nanchi Yesu bamutwala kwepi? Byo abandamine amba asumbile mu kilende, wamwene bamalaika babiji saka bavwala bivwalo bitoka, bamwekele jibiji! Umo waikele ku mitwe ne mukwabo waikele ku maulu po babikile mubiji wa kwa Yesu. Bamushikishe’mba: “Inetu, mubena kujila ka?”

Maliya wibakumbwile’mba: “Bamufumyamo mubiji wa Nkambo, kabiji kechi nayuka ko bamubika ne.” Kepo aalulukile ne kumona muntu wabwezhezhepo bwipuzho buntutu bumo amba: “Inetu, mubena kujila ka?” Kabiji uno muntu wamushikishe’mba: “Ñanyi ye mubena kukeba?”

Maliya byo alangulukilenga amba awa muntu ye wamwingilo wa mu bujimi mwajinga kilende, wamwambijile amba: “Mwane, umvwe yenu mwamusenda, mbulai ko mwamubika kuba amba ngye nkamusende.”

Uno muntu wamwichile’mba: “Maliya!” Ponkapo wayukile jishinda Yesu jo amwichilangamo. Waitabile amba: “Laboni!” (pa kulumbulula ko kuba amba “Mufunjishi!”) Na mambo a lusekelo lukatampe wamukwachile. Bino Yesu wamwambijile’mba: “Kileke kunkwata. Mambo nkyangye kuya kwi Batata. Bino yanga ku balongo bobe ne kwibabula amba, ‘Amiwa mbena kuya kwi Batata, ne anweba bo Bashenu, ne kwi Lesa wami, ne anweba ye Lesa wenu.’”

Maliya wayile lubilo kwakonkenejile batumwa ne baana ba bwanga bakwabo. Wanungilepo pa sawakya waambile bakwabo banabakazhi byo bamwene Yesu wasangukile. Pano bino, bano banabalume kechi baswile byaambile banabakazhi batanshi ne, kampetu ne byaambile Maliya. Mateo 28:3-15; Mako 16:5-8; Luka 24:4-12; Yoano 20:2-18.

▪ Panyuma ya kutana kilende kyashinkuka, ñanyi kintu kyaubile Maliya Magadala kabiji banabakazhi bakwabo bamwene ka?

▪ Ba Petelo ne Yoano baubile byepi byo bataine kilende kyashinkuka?

▪ Ñanyi kintu kyamwekejile banabakazhi bakwabo bayilenga na kubula baana ba bwanga amba Yesu wasanguka?

▪ Ñanyi kintu kyamwekejile bashilikale basopelenga kilende, kabiji bañanga bebambijile’mba ka byo bebabujile kintu kyamwekejile aba basopelenga?

▪ Ñanyi kintu kyamwekele kimye Maliya Magadala kyo ajinga bunke ku kilende, kabiji baana ba bwanga baubilepo ka pa byo bebabujile ku banabakazhi?