Lufuunjisho 5

Ñanyi Mulanguluko Lesa Yeajinga Nanji Pakulenga Ntanda?

Yehoba walengejileka ntanda? (1, 2)

Mamboka ntanda byoyabujila kwikala paladisa pa kino kimye? (3)

Kika kikamwekela bantu batama? (4)

Kulutwe na lwendo, kika Yesu kyoakobila babeela? bakote? ne bafu? (5, 6)

Pa kuba mba mukekalemo nalubaji mu mashuuko aji kulutwe mwafwayinwa kuba byepi? (7)

1. Yehoba walengele ino ntanda kuba mba bantu beyowe kwikalamo kikupu. Wakebele ntanda mba ikale kimye kyonse na bantu baoloka, kabiji bansagalala. (Masalamo 115:16; Isaya 45:18) Ntanda kechi ikonaunwa ne; ikekala myaka ne myaka.—Masalamo 104:5; Musapwishi 1:4.

2. Lesa sakaakyangye kulenga muntu ne, Wasajile mpunzha icheche ya ntanda ne kwiyalula ke paladisa wawama. Wiitumbile mba bujimi bwa Edena. Muno momo abikile mwaana mulume ne mwaana mukazhi mutanshi, Adama ne Evwa. Mulanguluko wa Lesa wajinga wakuba’mba baseme baana ne kuyuzha ntanda yonse. Mukupita kwa kimye nge baalwile ntanda yonse kwikala ke paladisa.—Ntendekelo 1:28; 2:8, 15.

3. Adama ne Evwa balengele mambo kimye bazhilulwijilemotu muzhilo wa Lesa. Panyuma ya byobyo Yehoba wibapangilemo mu bujimi bwa Edena. Paladisa watailwe. (Ntendekelo 3:1-6, 23) Pano bino Yehoba kechi walubako mulanguluko wanji wa ino ntanda ne. Walaya kuba mba ukeyalula ke paladisa, mukekala bantu myaka ne myaka. Ukoba byepi bino?—Masalamo 37:29.

4. Ino ntanda sakaikyangye kwikala paladisane, bantu batama bakebangatamo. (Masalamo 37:38) Kino kikamweka pa Amagedonyi, ayo iji nkondo ya Lesa ikapwisha bubi. Kikalondelapo, Satana bakamukasa myaka 1,000. Kino kyalumbula mba kafwako bantu batama bakashala na konauna ntanda ne. Bantu bakwa Lesa bobakapulukatu.—Lumwekesho 16:14, 16; 20:1-3.

5. Yesu Kilishitu ukalela nobe Mfumu ino ntanda pa myaka 1,000. (Lumwekesho 20:6) Pachepache ukangatamo bundengamambo mu milanguluko ne mu mibiji yetu. Tukekala balumbuluka byonka byajinga ba Adama ne Evwa sakabakyangye kulenga mambo ne. Ponkapo kechi kukekale jibiji bikola, bukote, ne lufu ne. Babeela bakabukwa, ne bakote bakabwela ku bwanyike jibiji.—Yoba 33:25; Isaya 33:24; Lumwekesho 21:3, 4.

6. Kimye kya Bufumu bwa Yesu bwa Myaka Kiumbi, bantu bakishinka bakengilanga kwalula ino ntanda yonse kwikala paladisa. (Luka 23:43) Kabiji, mamilyonyi a bafu akasangwilwa ku buumi panopantanda. (Byubilo 24:15) Inge bakobenga kyaswa muchima wa Lesa, bakatwajijila kwikala na buumi panopantanda kikupu. Inge ne, bakonaunwa kikupu.—Yoano 5:28, 29; Lumwekesho 20:11-15.

7. Mulanguluko mutanshi Lesa yeajinga naye pakulenga ino ntanda ukafikizhiwa. Nanchi mubena kukeba kwikalamo na lubaji muano mashuuko akulutwe nyi? Inge ibyo, mwafwainwa kutwajijila kufuunda Yehoba ne kukokela mafuunde anji. Kuya na kupwila ku Nzubo ya Bufumu ya Bakamonyi bakwa Yehoba iji kwiipi na komuji kisa kwimukwasha kuba byonkabyo.—Isaya 11:9; Bahebelu 10:24, 25.

[Kipikichala pa peja 10]

Paladisa watayilwe

[Bipikichala pa peja 11]

Panyuma ya Amagedonyi, ntanda yikaluka ke paladisa