Lufuunjisho 8

Buumi Bwakisemi Butookesha Lesa Pamuchima

Ñanyi lubaji luji na wamulume mu kisemi? (1)

Wamulume wafwainwa kulama byepi mukazhanji? (2)

Mingilo ka shetu yoaji nayo? (3)

Ñanyi lubaji luji na wa mukazhi mu kisemi? (4)

Lesa ukebaka ku bansemi neku baana? (5)

Baibolo yambapo ’mba ka palwa kwabana ne kwikana? (6, 7)

1. Baibolo yamba’mba wamulume ye mutwe wakisemi kyanji. (1 Kolinda 11:3) Wamulume wafwainwa kwikala na wamukazhi umotu. Bafwainwa kwisongola mwaila muzhilo.—1 Timoti 3:2; Titusa 3:1.

2. Wamulume wafwainwa kutemwa mukazhanji byonka byoetemwa aye mwine. Wafwainwa ku mulama byonka bilama Yesu baana banji ba bwanga. (Efisesa 5:25, 28, 29) Kechi wafwainwa kupuma mukazhanji nangwa ku muyanjisha nangwa pachechetune. Mukifulo kya byobyo, wafwainwa ku mukinjika ne kumupa mushingi.—Kolose 3:19; 1 Petelo 3:7.

3. Shetu wafwainwa kwingila nangovu kubamba asunge kisemi kyanji. Wafwainwa kumwena mukazhanji ne baana banji kajo, bivwalo, ne nzubo. Kabiji shetu wafwainwa kukokozhela kisemi kyanji bikebewa ku mupashi. (1 Timoti 5:8) Wafwainwa kutangijila mu kukwasha kisemi kyanji kufuunda pa lwa kwa Lesa ne kukeba Kwanji.—Mpitulukilo ya mu Mizhilo 6:4-9; Efisesa 6:4.

4. Wamukazhi wafwainwa kwikala nkwasho wawama ku mwatawanji. (Ntendekelo 2:18) Wafwainwa ku kwasha mwatawanji kufuunjisha ne kukomesha baana babo. (Byambo bya Mana 1:8) Yehoba ukeba wamukazhi kusunga ba mukisemi kyanji na butemwe. (Byambo bya Mana 31:10, 15, 26, 27; Titusa 2:4, 5) Wafwainwa kwikala na mushingi mukatampe ku mwatawanji.—Efisesa 5:22, 23, 33.

5. Lesa ukeba baana kumvwina bebasema. (Efisesa 6:1-3) Kabiji ukeba bansemi kufuunjisha ne kulungika baana babo. Bansemi bafwainwa kwikala na kimye kya kwisamba na baana babo ne kufuunda nabo Baibolo, sabebafuunjisha bya kumupashi ne kwibamwesha butemwe. (Mpitulukilo ya mu Mizhilo 11:18, 19; Byambo bya Mana 22:6, 15) Bansemi kechi bafwainwa kufuunjisha baana babo na bukaji nangwa kwibashintaukila ne.—Kolose 3:21.

6. Kimye bantu besongola baikala na lukatazho lwa kubula kumvwañana, bafwainwa kwingijisha byamba Baibolo. Baibolo itukambizha kumwesha butemwe ne kwilekela mambo. (Kolose 3:12-14) Mawi a Lesa kechi atundaika kwabana nobe jo jishinda ja kupwishishamo lukatazho lucheche ne. Bino wamukazhi wakonsha kusalapo kusha mwatawanji inge (1) mwatawanji wakanishatu kusunga kisemi kyanji, (2) washinta kyakuba butuntulu ne buumi bwanji buji pa bulwanyi, nagwa (3) mapata anji akatampe abena kumulengesha kukankalwa kupopwela Yehoba.—1 Kolinda 7:12, 13.

7. Bantu besongola bafwainwa kwikala bakishiinka ku umo ne mukwabo. Bukende ke mambo kwi Lesa ne ku mwina kwenu. (Bahebelu 13:4) Kwilaala kungye ya masongola o ene mambotu a Mubyanembwa akwikainamo ne kukasongola ungi. (Mateo 19:6-9; Loma 7:2, 3) Yehoba washikwa bantu bekana kwakubula ene mambo a Mubyanembwa ne kukasongola ungi.—Malaki 2:14-16.

[Bipikichala pa peja 16, 17]

Shetu wa butemwe usunga kisemi kyanji ku mubiji ne ku mupashi

[Kipikichala pa peja 17]

Lesa ukeba bansemi kufuunjisha baana babo ne kwibaluñamika