Kingdom News No. 35

Nanchi Bantu Bonse Beketemwa Bene Na Bene Nyi?

Butemwe Bwa Kutemwa Mukwenu Bwakepa

Mamililyoni a bantu bavula beumvwa kukabilwa ne kukakilwa, pa kubula kwikala na kumo kobakonsha kutana bukwasho. Mwana mukazhi umo wajinga musulushi waambile’mba: ‘Juba jimo mwana mukazhi mukamfwilwa waikalanga kubukonde bwa nzubo yami wakonkonsheshe ku kinzhilo kyami ne kumbula’mba naumvwa bingi kitendwe. Namubujile na mushingi kwa kubula kumupita mumbaji namba nji na mingilo. Kepo alombele lulekelo lwa mambo konji pa kunkabisha ne kuya waile.’

Ku kya bulanda, bufuku bwa jonkajo juba, uno mukamfwilwa wikujikile. Panyuma ya byobyo, uno mwana mukazhi wajinga musulushi waambile’mba “kino kintu kya njimwine.”

Kubula butemwe bwa kutemwa mukwenu javula kulengela bingi bulanda bukatampe. Kimye kya bulwi bwa pakachi ka mishobo mu Bosnia ne mu Herzegovina, byalo byajinga kala kulubaji lwa kyalo kya Yugoslavia, bantu bakila pa milyoni umo bebaswatawile mu mazubo abo kabiji ne bantu bitota biumbi byavula baipaiwe. Kuba ñanyi? Nsongwakazhi ye baswatwile pa muzhi wabo wakumbwile saka abena kujila kuba’mba “ku botwikala nabo kwipi. Kabiji twibayukile.”

Mu Rwanda bantu biumbi bitota byavula baipaiwe, javula ku bo bekala nabo kwipi. The New York Time yashimwine kuba’mba “Bahutu ne Batutsi [baikalangatu] pamo sabesongola Muhutu ne Mututsi, kwakubula nangwa kutakotu muchima nangwa kuyuka ñanyi wanjinga mu Hutu nangwa mu Tutsi ne.” “Kubazhimukatu ponkapo bwikalo bwaalukile, ne kwiipaya kwatendekele.”

Byonkabyo, Bayudea ne bena Alebya bekalatu pamo mu kyalo kya Isalela, pano bino bavula beshikwa bene na bene. Bino byubilo byobyo biji ne ku Bakatolika ne Bapolotesitanti bavula baji mu kyalo kya Ireland, kabiji ne mpendwa ya bantu bakwabo ibena kuvujilako mu byalo bikwabo. Kala mu bwikalo bwa bantu kechi mwajingapo kubula butemwe byonka byo kiji lelo ne.

Nanchi Mambo ka Butemwe Bwakutemwa Mukwenu Kyo Bwakepela?

Mulenga wetu wakumbula. Baibolo, Kyambo kyanji, kitela ano moba otujimo amba “moba akapelako.” Kino kyo kimye bungauzhi bwa Baibolo kyo bwamba’mba, bantu kechi bakekala na “muchima wa bumuntu” ne. Pa mambo a bino “bimye byakatazha,” kabiji bitelwa mu Byanembwa amba “mpelo ya byubilo bya bintu,” [NW] Yesu Kilishitu waambile kuba’mba “butemwe bwa bavula bukayanga na kukepa.”—2 Timoti 3:1-5; Mateo 24:3, 12.

Onkao mambo kubula butemwe lelo, lubaji lwa kiyukilo kimo kya kuyukilako kuba’mba tuji mu moba apelako a ino ntanda. Nalusekelo, kino kyalumbulula kuba’mba ino ntanda ya bantu babula kwakamwa Lesa bukumotu ikapingishiwepo na ntanda ipya ya bololoke ikalamwa na butemwe.—Mateo 24:3-14; 2 Petelo 2:5; 3:7, 13.

Nanchi abya kine kine tujipo na kishinka kya kuketekela kuba’mba lupimpu lwa uno mutundu lukekalako—lwa kuba’mba bantu bakonsha kwitemwa bene na bene ne kwikala pamo mu mutende nyi?

Butemwe Bwakutemwa Mukwetu—Kine Bukekalako

LOYA umo mu kimye kya myaka kitota kitanshi waipwizhe Yesu kuba’mba “nanchi mukwetu ye ñanyi?” Kwakubula nangwa kuzhinaukane waketekejile Yesu kukumbula’mba, ‘Bakwenu ba Yudea.’ Bino mu kishimpi kya mwina Samaliya waikalanga pepi, Yesu wamwesheshe kuba’mba bantu bonse ba mu byalo bikwabo nabo bakwetu.—Luka 10:29-37; Yoano 4:7-9.

Yesu waambishepo na mukoyo kuba’mba kya bubiji ku butemwe bwa kutemwa Lesa, butemwe bwakutemwa mukwetu bwafwainwa kulama bumi bwetu. (Mateo 22:34-40) Nanchi abya kwajingapo kipanyi kya bantu batemenwe bakwabo nyi? Bena Kilishitu batanshi batemenwe bakwabo! Bayukanyikilwe na butemwe bwakutemwa bakwabo bobajinga nabo.—Yoano 13:34, 35.

Nanchi ibyepi lelo? Nanchi butemwe na biji bwakwa Kilishitu bujipo ku yense nyi? Encyclopedia Canadiana yaamba kuba’mba: “Mwingilo wa Bakamonyi bakwa Yehoba ye wasangula ne kwikajika jibiji bwina Kilishitu butanshi bwajinga ne Yesu ne bana banji ba bwanga . . . Bonse pamo banabankazhi.”

Nanchi kino kyalumbulula ka? Kyalumbulula kuba’mba Bakamonyi bakwa Yehoba—kechi bashikwa bakwabo na mambo akupusana kwa mitundu, byalo, nangwa bisho byobakomenamo ne. Kabiji kechi bakepaya nangwa muntu ungitu ne, mambo mukifwanyikizho babunda mapoko abo ne kwialula ke bya kujimako ne mafumo abo bealula ke mapoko a kutokeshako mu bichi. (Isaya 2:4) Kabiji Bakamonyi, bayukanyikwa na mambo a kubangijila kukwasha bakwabo.—Ngalatiya 6:10.

Kyo kine kintu jashi ja jinga mu Sacramento Union wa California kyo jaambile kuba’mba: “Kyawaina kwamba’mba inge bantu bonse balaminwe na lufunjisho lwa Bakamonyi bakwa Yehoba, kwipayañana ne lupato inge byapwa, ne butemwe inge bwavula. Munembeshi wa magazini wa Hungary Ring wanungilepo kuba’mba: “Nafika pa kuyuka kine kya kuba’mba Bakamonyi bakwa Yehoba inge bobonkatu baikalanga panopantanda, inge makondo apwa, kabiji ne mingilo ya bakapokola inge ya kutalatu pa mafunde a kwenda kwa myotoka mu mikwakwa ne kupana ma pasipoti.”

Inge kya kuba’mba bantu betemwe bene na bene, pa bena kukebewa lupimpu lukatampe panopantanda ponse. Nanchi luno lupimpu lukeyako byepi? (Mwane namba monai pa peja ya panyuma.)

Kimye Bantu Bonse Kyo Baketemwa Bene Na Bene

LULOMBELO Yesu lo afunjishe lumwesha kuba’mba lupimpu lukatampe lwafwenya kala pepi. Mu Busapwishi bwanji bwa pa Mutumba, Yesu witufunjishe kulombela amba: “Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.”—Mateo 6:10.

Nanchi Bufumu bwakwa Lesa bo buka? Bufumu bwakwa Lesa kamfulumende wa kine, ulama kufuma mwiulu. Oene mambo o butongwelwa amba “bufumu bwa mwiulu.” Yesu Kilishitu, aye “Mfumu wa mutende” ye wasalwa na Shanji kwikala Kalama.—Mateo 10:7; Isaya 9:6, 7; Masalamo 72:1-8.

Kimye kikeya Bufumu bwakwa Lesa, kika kikobiwa ku ino ntanda yavulamo lupato? ‘Buno Bufumu,’ bukalalaula ne ‘kupwishatu shata’ ano makamfulumende atama onse a panopantanda. (Danyela 2:44) Baibolo yalumbulula kuba’mba: “Kabiji panopantanda pakapita . . . pakuba aye uba kyaswa muchima wa Lesa ukekala myaka ne myaka.—1 Yoano 2:17.

Pa mambo a ntanda ipya yakwa Lesa, Baibolo yaamba kuba’mba: “Baoloka bakaswana ntanda, Ne kwikalamo myaka ne myaka.”(Masalamo 37:9-11, 29; Byambo bya Mana 2:21, 22) Kashika akyo kimye byokikawamapo! “Lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.” (Lumwekesho 21:4) Ne bafu nabo bakekala na bumi jibiji, kabiji ne ntanda yonse ikalulwa ke paladisa wa kine kine.—Isaya 35:1, 2; 11:6-9; Luka 23:43; Byubilo 24:15.

Pakwikala mu yoyo ntanda ipya yakwa Lesa, twafwainwa kufunda kwitemwa atwebene na bene, byonka Lesa byo etufunjisha. (1 Tesalonika 4:9) Musambi umo wa Baibolo wa ku byalo bya Kumusela waambile’mba: “Byonka byalaya Baibolo, mbena kupembelela kimye bantu bonse kyo bakekala bafunda kwitemwa bene na bene.” Kabiji twakonsha kusumininwa kuba’mba Lesa ukafikizha milaye yanji! Mambo waamba kuba’mba, “Abya byo naamba nkebifikizha.”

Bino pakuba’mba mwiyowe mapesho a mu Bufumu bwakwa Lesa, mwafwainwa kufunda byamba Baibolo, byonka bibena kuba mamilyoni a bantu bakishinka panopantanda ponse. (Yoano 17:3) Buloshiwa wa mapeja 32 ujina mutwe wakuba’mba Nanchi Lesa Ukebaka Kwiatweba? usakwimukwasha. Potaiko kope imo kupichila mu kunemba mu ka kupashi kaji pa peja iji panyuma ne kwikatuma ku keyala iji kwipi na komwikala.

[Picture credit line on page 2]

Uloza bantu na buta ne kijilo mu kyalo kya Bosnia: Reuters/Corbis-Bettmann