Lufunjisho 11
Kanai Bupopweshi Bwa Bubela!
Satana ne bapashi babipa kechi basaka anweba kwingijila Lesa ne. Basaka kwalula muntu yense kufuma kwi Lesa inge bakonsha kwikyuba. Nanchi boba byepi byobyo? Jishinda jimo jo bengijisha ke ja kupichila mu bupopweshi bwa bubela. (2 Kolinda 11:13-15) Bupopweshi inge kechi bufunjisha bukine bwa mu Baibolo ne, bo bwa bubela. Bupopweshi bwa bubela bujitu pamo na mali a bubela—akonsha kumweka nobe a kine, nanchi atutu. Kabiji emulengela lukatazho.
Bupopweshi bwa bubela kechi bwakonsha kutokesha Yehoba, Lesa wa bukine pa muchima ne. Yesu byo ajinga pano pa ntanda, kwajinga kipanyi kya bapopweshi basakile kumwipaya. Balangulukile kuba’mba mpopwelo yabo yo yajinga yaoloka. Bamwambijile’mba: “Tujitu ne Shetu umo, yenka Lesa.” Nanchi Yesu waitabile nyi? Ine kechi waitabile ne! Wibakumbwile’mba: “Anweba mwi ba kwa shenu, Diabola.” (Yoano 8:41, 44) Ano moba bantu bavula balanguluka kuba’mba babena kupopwela Lesa, bino saka babena kwingijila Satana ne bapashi banji babipa!—1 Kolinda 10:20.
Byonka biji kichi kyabipa byo kipanga bipangwa byabipa, bupopweshi bwa bubela bulenga bantu kuba bintu byabipa. Ntanda yayula bya malwa na mambo a bintu byatama byuba bantu. Muji byubilo byatama, malwañano, bwivi, lumanamo, bumbanzhi, ne kulala babakazhi kya kwibakanjikizha. Bavula boba bino bintu byatama baji na bupopweshi nangwa byonkabyo bupopweshi bwabo kechi bwibatundaika kuba byawama ne. Kechi bakonsha kwikala balunda na Lesa ne, umvwe babula kuleka kuba bintu byatama.—Mateo 7:17, 18.
Bupopweshi bwa bubela bufunjisha bantu kulomba ku bankishi. Lesa wakanya kulomba ku bankishi. Kino kya kine. Nanchi mwakonsha kutemwa inge muntu kechi wisamba ne anweba ne, bino wisambatu na kipikichala kyenu nyi? Nanchi awo muntu wakonsha kwikala mulunda nenu wa kine nyi? Ine, kechi wakonsha kwikala mulunda nenu ne. Yehoba usaka bantu bakwisamba nabo kechi na nkishi nangwa kipikichala kyabula bumi ne.—Kulupuka 20:4, 5.
Bupopweshi bwa bubela bufunjisha kuba’mba kijitu bulongo kwipaya bantu bakwenu kimye kya nkondo. Yesu waambile kuba’mba balunda na Lesa baketemwa bene na bene. Kechi twipaya bantu bo twitemwa nabo ne. (Yoano 13:35) Kyatama ko tuji kwipaya nangwatu bantu babi. Balwanyi ba kwa Yesu byo baishile nakumukwata, kechi walekele bana banji ba bwanga kulwa nabo kuba’mba bamulamwineko ne.—Mateo 26:51, 52.
Bupopweshi bwa bubela bufunjisha kuba’mba bangubabibi bakamanyikwa mu mujilo wa helo. Nangwa kikale byonkabyo, Baibolo ifunjisha kuba’mba bundengamambo butangijila ku lufu. (Loma 6:23) Yehoba ye Lesa wa butemwe. Nanchi Lesa wa butemwe wakonsha kumanyika bantu myaka ne myaka nyi? Ine kechi kuba wikyuba ne! Mu Paladisa, mukekalatu bupopweshi bumo bonka bwaswishiwa na Yehoba. (Lumwekesho 15:4) Bonse bupopweshi bwalamwa na bubela bwa kwa Satana bukafumapo.