Bintu ka Byo Baitabilamo?

BAKAMONYI BA KWA YEHOBA baitabila mwi Lesa Wa bulume bonse, aye Yehoba Mulenga walengele jiulu ne ntanda. Bilengwa bya kukumya biji mu kulengwa konse bimweshatu patoka’mba Mulenga wa maana kabiji wa bulume bwakila, ye wibilengele. Byonkatu mingilo ya banabalume ne banabakazhi byo imwesha byubilo byabo byo biji, ne mingilo ya Yehoba Lesa nayo imwesha byo aji. Baibolo witubula’mba, ‘byubilo byanji bibula kumweka byamwekesha ne ku ntendekelo ya panopantanda kasa bimweka monka mu byo alengele.’ Kabiji kwakubula jiwi nangwa kyambo “bya mwiulu byamba mambo a lukumo lwa Lesa.”—Loma 1:20; Salamo 19:1-4.

Bantu kechi balenga mapuki, malangalanga (TV), ne makompyuta kwakubula ine nkebelo ne. Byo biji ne ntanda ne bichi kabiji ne banyama, kechi byaikelakotu amba twibikumyenga ne. Mubiji wa muntu byo alengwa na maselo (cells) a kukankalwa kubala, kyakatazha bingi kumuyuka bulongo byo aji—kabiji bongo nabo bwalengwa mu jishinda ja kukumya. Umvwe bintu byo balenga bantu biji ne nkebelo yabyo, ko kuba’mba Yehoba Lesa naye wajinga na nkebelo pa kulenga bintu bya kukumya! Byambo bya Mana 16:4 byaamba’mba: “Byonse byalenga Yehoba biji ne mwabyo mo byatala.”

Yehoba wajinga na nkebelo pa kulenga ntanda, o ene mambo o aambijile bamulume ne mukazhi batanshi amba: “Semainga ne kusemununa, muvule ne kukumbana ponse pa ntanda . . . , mwikale na bunkambo bwa pa masabi a mu mema, ne bwa pa bañonyi bapita mwiulu, ne bwa pa byumi byonsetu byenda pano pa ntanda.” (Ntendekelo 1:28) Byo babujile lukokelo, bano bamulume ne mukazhi, bakankalwe kuyuzha ntanda na bisemi bya bantu baoloka bafwainwe kulama bulongo ntanda, bijimwa ne banyama. Bino kino kechi kikalengela Yehoba kubula kufikizha nkebelo yanji ne. Panyuma ya kupitapo myaka yavula, kyanembelwe’mba: ‘Lesa wabumbile ntanda . . . kechi wiilengele ke yavulañanatu ne.’ Wiilengele “yafwainwa kwikalapo bilengwa byanji.” Kabiji kechi ikonaika ne, bino ‘ikayayangatu.’ (Isaya 45:18; Musapwishi 1:4) Nkebelo ya Yehoba ku ino ntanda ikafika: ‘Abya byo nafuukula kuba bikekala kikupu, kabiji nkoba byonse byo nasaka.’—Isaya 46:10.

Onkao mambo, Bakamonyi ba kwa Yehoba baitabila’mba ntanda ikekalangatu kikupu ne kuba’mba, bantu bonse bomi ne bafwa bakafwainwa kwikala mu ntanda kwesakana na nkebelo ya Yehoba, bakekalangamo myaka ne myaka. Bantu bonse baswana bumbulwakoloka kufuma ku ba Adama ne Evwa, o ene mambo o baikela bandengamambo. (Loma 5:12) Baibolo witubula’mba: “Mfweto ya bundengamambo lo lufu.” “Bomi bayuka’mba tukafwa, bino bafu kafwako kyo bayuka ne.” “Awa muntu ulenga mambo—ye ukafwa.” (Loma 6:23; Musapwishi 9:5; Ezikyo 18:4, 20) Pano bakekala byepi bomi jibiji ne kumona bintu byawama panopantanda? Bakekala bomi jibiji kupichila mu kitapisho kya bukuzhi bwa Yesu Kilishitu mambo aye waambile’mba: “Amiwa yami lusanguko ne bumi: awa wangitabila amiwa, nangwa afwe, ukamona bumi.” ‘Bonse baji mu bilende bya kivuluko bakomvwa jiwi janji, kepo bakafumamo.’—Yoano 5:28, 29; 11:25; Mateo 20:28.

Nga kino kikobiwa byepi? Kyalondololwa mu “mambo awama a bufumu” Yesu o asapwilanga kimye kyo ajinga panopantanda. (Mateo 4:17-23) Bino Bakamonyi ba kwa Yehoba lelo jino babena kusapwila mambo awama mu jishinda jingi.

[Chart on page 13]

BINTU BYO BAITABILAMO BAKAMONYI BA KWA YEHOBA

Lwitabilo Binembelo mo Lwafuma

Babi bakebonauna kikupu Mat. 25:41-46; 2 Tesa. 1:6-9

Kujitu jishinda jimo jaya ku bumi Mat. 7:13, 14; Efi. 4:4, 5

Helo ke bilende ko bazhika bafu Yoba 14:13; Lum. 20:13, 14

Lwitabilo Binembelo mo Lwafuma

[Picture on page 12]

NTANDA . . . Yehoba ye wiilengele . . . bantu kwiilama bulongo . . . ne kwikalamo myaka ne myaka