Bupopweshi Bwakine Bwakonsha Kwimukwasha Myaka Nemyaka!

1. Kika kikamweka umvwe ‘twafwenya kwipi ne Lesa’?

YEHOBA watemwa boba bamwingijila. Umvwe samumupopwela Yehoba, ukemupesha muano moba nemumoba akeya. Baibolo yamba’mba: “Fwenyai kwipi ne Lesa, kabiji ne aye ukafwenya kwipi ne anweba.”—Yakoba 4:8.

2. Twakonsha kufwenya byepi kwipi ne Lesa, kabiji kino kikalengela milombelo yetu kwikala byepi?

² Pakufwenya kwipi ne Lesa, mwafwainwa kufunda nekwingijisha Byambo byanji. Umvwe mwalomba mwayila kyaswa muchima wanji, Yehoba ukomvwa milombelo yenu nekwimukumbula. Mutumwa wabwina Kilishitu Yoano wanembele’mba: “Luno lo luketekelo lo tuji nalo mwi aye [Lesa], amba, umvwe twalomba kintu, nangwa ki ka, mwayila muchima wanji, aye witumvwa. Kabiji umvwe twayuka namba, aye witumvwa byonse byo twalomba, twayuka namba, tuji nayo aya milombelo yo twalomba kwi aye.”—1 Yoano 5:14, 15.

3-7. Twakonsha kwikala byepi namaana a Lesa, kabiji akonsha kwitukwasha byepi?

³ Kabiji byomutwajijila kufwenya kwipi ne Lesa, ukemupa maana akupwisha makatazho apajuba nejuba. Baibolo yamba’mba: ‘Umvwe mwi anweba muji umo wabula maana, epuzhe Lesa.’—Yakoba 1:5.

⁴ Maana afuma kwi Lesa akonsha kwimukwasha byepi? Akonsha kwimukwasha kuyuka bintu bifichisha Yehoba pamuchima. Kabiji mwafwainwa nekuyuka ene mambo bino bintu kyobyatamina nebyomwafwainwa kuba pakuba’mba mwibichinuzhuke. Maana auno mutundu akonsha kwimukwasha kufuma mumakatazho ayanjishapo bantu bonse. Kyakumwenako, kumvwina lujimuno lwa Lesa lwakwikala bantu babyubilo byawama kuzhikijila bantu ba Lesa kubula kwimita memi akubula kukeba, mashiki asambuzhana mu bulalelale, nekwikala mumasongola abula lusekelo nangwa kupwisha masongola.

⁵ Bika bikwabo maana apana Lesa byoakonsha kwimubila? Akonsha kwimukwasha kwikala bwikalo bwenu bulongo. Akonsha kwimukwasha kufuukula bintu bulongo mubintu bimo bikebewa, nabiji byakusunga mali enu. Mukalondalonda bintu byanema nekukana kuba byatuutu.

⁶ Maana a Lesa akonsha nekwimukwasha byakwikala nabakwenu. Mwakonsha kwikala nalusekelo mukisemi. Mwakonsha kukomesha nekwikala nabulunda bwawama nabakwenu, kukinjikwa nekubantutu babula kwingijila Lesa.

⁷ Kunungapo, kwikala namaana a Lesa kukemukwasha kwingila mingilo yawama mubwikalo. Akemukwasha kupwisha makatazho amubwikalo nebimufichisha kumuchima. Kabiji, mukekala namilangwe yawama pamambo akimye kyakulutwe. Kabiji milangwe yawama, ikemukwasha kwikala namilanguluko yawama nebutuntulu bwamubiji bwawama.—Byambo bya Mana 14:30; Isaya 48:17.

8. Umvwe kemwingijile Lesa, kika kyomukabula kuchina?

⁸ Umvwe kemwingijile Lesa wakine, mukakasululwa ku bintu bichina bantu babula kumwingijila. Pakuba byomwayuka’mba bafwa kechi bajipo nabumi mubilende mobajine, kechi mukachina bafune. Mambo akuba mwaketekela mumulaye wa Lesa wakusangula bafu, kechi mukachina kufwane. Kabiji byomwayuka’mba Lesa ye wabulume bonse, kechi mukachina bulozhi nangwa bwangane.—Yoano 8:32.

Baoloka Bakaswana Ntanda

9-11. Bañanyi bakekala mu Paladisa, kabiji bañanyi bakabulamo?

⁹ Umvwe mwafwenya kwipi ne Lesa, kechi mukachina kimye kyakulutwene. Byonka byotwamona, Baibolo yaambijile jimo pamambo amakatazho otubena kumona panopantanda lelo jino. Yehoba witubula kuba’mba bino bintu byapakakimyetu kacheche, Bufumu bwa Lesa katatakatu bukalule ino ntanda ke paladisa.—Luka 21:10, 11, 31; 23:43.

¹⁰ Bonkatu bafwenya kwipi ne Yehoba nekumwingijila bobakekala mu Paladisa. Baibolo yamba’mba: “Pakishala pacheche ne babi bakekala ke kafwako: Ee kine, obewa ukatajishanga pantu panji kabiji aye ukekala ke kafwapo. Pakuba bakimote bakaswana ntanda. Kabiji bakasangalela mu kuvula kwa mutende.”—Masalamo 37:10, 11.

¹¹ Bonse batwajijila nakukana kukokela mizhilo ya Lesa yaoloka bakafwa kikupu. (2 Tesalonika 1:8, 9) Bakekala kekafwako. Bakonawinwa pamo na Satana nebademona banji mulufu lwamyaka nemyaka. (Lumwekesho 20:10, 14) Pakuba aba bayuka Yehoba nekumwingijila bakasangalala mu Paladisa panopantanda.

Kimye Kyakulutwe Byokyawamapo!

12. Baibolo yambapo’mbaka pamambo akimye kyakulutwe?

¹² Yehoba wibalamina bintu byawama bantu bonse bamutemwa! Akimonai byaamba Byambo byanji pamambo a bumi mu Paladisa panopantanda:

• Kuvula kwa kajo kakuja: “Kukekalanga kuvula bingi kwa kajo panopantanda peulu ya mitumba.”—Masalamo 72:16.

• Mazubo awama: “Bakashimika mazubo abo ne kwikalamo.”—Isaya 65:21.

• Mingilo yawama: “Bantu bami basalululwa bakamwenamo lusekelo myaka ne myaka mu mingilo ya maboko abo. Kechi bakengila kwakubula kumwenamone.”—Isaya 65:22, 23.

• Kafwako kukolwa: “Kafwako nangwa umo wikala mu yewa muzhi ukamba’mba; Nakolwa, ne.”—Isaya 33:24.

• Kafwako balemana: “Ponkapo meso a bampofu akalaba, ne matwi a bashinka matwi akashinkuka. Kabiji ne yewa walemana kulu ukakilauka nobe lupala [wamulume], ne kamama ukembanga na lusekelo.”—Isaya 35:5, 6.

• Kafwako misongo, bulanda, nelufu: “[Lesa] ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.”—Lumwekesho 21:4.

• Kafwako nkondo: “[Lesa] upwisha makondo nekwapela ntanda.”—Masalamo 46:9.

• Bumi bwamyaka: “Baoloka bakaswana ntanda, Ne kwikalamo myaka nemyaka.”—Masalamo 37:29.

13. Ñanyitu bunke wakonsha kwalula ino ntanda ke paladisa, kabiji mamboka?

¹³ Bantu kechi bakonsha kuletako bintu byaiwe mutundune, bino Yehoba uji nabulume bwakuba kintu kiji kyonse kyoaamba’mba usakwikyuba. Kafwako kyakonsha kumukanya kuba kiji kyonse kyoafuukula kubane. Baibolo yamba’mba: “Kapaji kyambo kifuma kwi Lesa kibula bulume ne.”—Luka 1:37.

14. Mwakonsha kwenda byepi mujishinda jaya kubumi bwamyaka nemyaka?

¹⁴ Kupichila mu Bakamonyi banji, Yehoba ubenakupa bantu kuji konse jishuko ja ‘kutwela pa kibelo kyakepa’ nekwenda mujishinda jaya kubumi bwamyaka nemyaka. Mwane ikalai nabantu balusekelo batambwila luno lwito. Ikalai mubupopweshi bwakine mukelemene mapesho a Yehoba myaka nemyaka!—Mateo 7:13, 14.