Kitango 10

Yesu Uji Na Bulume Kukila Bandemona

UBENA kuvuluka malaika umo wa Lesa kyo aikejile Satana Diabola nyi?— Kichima kyanji kya kusakisha kumupopwela kyo kyamulengejile kusatukila Lesa. Nanchi bamalaika bakwabo bamulondejile Satana nyi?— Ee, bamulondejile. Baibolo wibatela’mba, ‘bamalaika ba kwa Satana,’ nangwa’mba bandemona.—Lumwekesho 12:9.

Nanchi bano bamalaika batama, nangwa’mba bandemona, baitabila mwi Lesa nyi?— Baibolo waamba’mba ‘bandemona baitabila’mba Lesa ko aji.’ (Yakoba 2:19) Pa kino kimye baji bingi na moyo. Bayuka kuba’mba Lesa ukebazhachisha na mambo a bintu byatama byo boba. Bintu ka byonkabyo?—

Baibolo wamba’mba bano bamalaika bashile mpunzha yabo yawama bulongo mwiulu ne kwiya na kwikala panopantanda mu bumuntu. Baubile bino mambo bakebelenga kwilaala na banabakazhi ba buya panopantanda. (Ntendekelo 6:1, 2; Yuda 6) Nga kwilaala ko ku ka?—

Mwanamulume ne mwanamukazhi umvwe bemona masongola ko kwilaala. Panyuma ya bino mwana po po atendeka kulengeka munda mwainanji. Pano bino bamalaika kechi bafwainwa kuba bino ne. Lesa ukebatu kana mwanamulume ne mwanamukazhi besongola bo bafwainwa kwimona masongola. Umvwe basema mwana, bamulume ne mukazhi bo bafwainwa kumusunga.

Bamalaika byo bavwajile mibiji ya bantu ne kusongola banabakazhi panopantanda, basemene baana baikele ke babiyangala. Bano babiyangala batamine bingi michima, mambo bayanjishanga bantu. Onkao mambo, Lesa waletele muyulo kuba’mba onaune bano babiyangala ne bantu bonse batama. Bino waambijile Nowa kufiika bwato bwa kupulushishamo bantu bacheche baubilenga bintu byawama. Mufunjishi Wayukisha waambile’mba kyanema bingi kuvuluka byaubiwe kimye kya muyulo.—Ntendekelo 6:3, 4, 13, 14; Luka 17:26, 27.

Muyulo byo aishile, wayuka kyamwekele ku bamalaika batama nyi?— Balekele kwingijisha mibiji ya buntu yo bavwajile, kabiji babwelele jibiji mwiulu. Bino kechi baikele ke bamalaika ba kwa Lesa ne, baalukile ke bamalaika ba kwa Satana, nangwa’mba bandemona. Ki ka kyamwekejile baana babo, babiyangala?— Baonawinwe na Muyulo wa mema. Ne bantu bonse babujile kukokela Lesa nabo baonawinwe.

Kufumatu kimye kya Muyulo, Lesa kechi waswisha bandemona kwialula nobe bantu ne. Nangwa kya kuba kechi twibamona ne, bandemona ne lunotu bo babena kulengela bantu kuba bintu byatama. Babena kuleta bingi makatazho kukila ne byo kyajinga kala. Kiji bino mambo bebelele kufuma mwiulu kwiya pano panshi.

Nanchi wayuka kyo tubujila kumona bandemona nyi?— Mambo kechi bamweka ne. Bino twayuka amba kobaji. Baibolo waamba’mba, Satana ubena ‘kujimbaika bantu mwaya ntanda yonse,’ kabiji bandemona babena kumukwashako.—Lumwekesho 12:9, 12.

Nanchi Diabola ne bandemona bakonsha kwitujimbaika ne atweba nyi?— Ee, bakonsha umvwe twabula kujimuka. Bino kechi twafwainwa kuchina ne. Mufunjishi Wayukisha waambile’mba: ‘Diabola wabula ne kamo ka mwi amiwa.’ Umvwe twafwenya kwipi ne Lesa, uketuzhikijila kwi Diabola ne bandemona banji.—Yoano 14:30.

Kyanema bingi kuyuka bintu byatama bandemona byo bakonsha kwitujimbaika amba tube. Onkao mambo langulukapo pa kino. Bintu ka byatama bandemona byo baubile kimye kyo baishile panopantanda?— Muyulo saka akyangye kwiya, basongwele banabakazhi, kintu kyabula kufwainwa kuba bamalaika. Lelo jino, bamalaika batemwa bingi umvwe bantu ke babule kukokela mizhilo ya Lesa pa mambo a kwimona masongola. Nki kwipuzhepo, bañanyi bafwainwa kwimona masongola?—Wakumbula bingi bulongo, kanatu bonka besongola.

Ano moba banyike babalume ne babakazhi bemona masongola, pano bino kechi kibafwainwa kuba bino ne. Baibolo waamba’mba banabalume baji na “kyabulume.” (Bena Levi 15:1-3) Kabiji banabakazhi nabo baji na kya bwanabukazhi. Yehoba walengele bino bibese bya mubiji byafwainwatu kwingijisha bantu besongola kwapwa. Bandemona bomvwa bingi bulongo umvwe bantu ke bobe bintu byakanya Yehoba. Kya kumwenako, bandemona bomvwa bingi bulongo umvwe mwanyike wamulume ne wamukazhi ke bobe bya kukosama. Nanchi twafwainwa kwibasangajika bandemona nyi?—

Kuji kintu kikwabo bandemona kyo batemwa bingi, pano bino Yehoba wikishikwa. Wikiyuka nyi?— Bukapondo. (Salamo 11:5) Bukapondo ke byubilo byatama bya kukozha bakwenu. Vuluka byaubile babiyangala, baana ba bandemona.

Kabiji bandemona batemwa bingi kuchinya bantu. Kimye kimo bebepekezha kwikala bantu bafwa. Bakonsha ne kwingijisha mawi a bantu bafwa. Bandemona byo byo babepa bantu bavula’mba bafu kechi bafwa ne, kabiji amba bakonsha ne kwisamba na bantu bomi. Ee, bandemona balengela bantu bavula kwitabila mu bingelekezha.

Onkao mambo, twafwainwa kujimuka bingi kuchina twakajimbaikwa kwi Satana ne bandemona banji. Baibolo witujimuna amba: ‘Satana weseka kwialula aye mwine nobe malaika wawama, kabiji byo byuba ne bakalume banji pamo.’ (2 Kolinda 11:14, 15) Bino kwambatu kine, bandemona batama bingi. Twaya tumone byo bakonsha kwitulengela kwikala bantu batama nobe abo.

Kwepi ko bafunda bantu byubilo bya bukapondo, kwilaala kwakubula kwisongola, bya mipashi ne bingelekezha?— Nanchi kechi batamba bino pa televizhonyi ne mu mafilimu, makayo a pa kompyuta, pa Intaneti ne kutanga mabuku mwavula bipikichala nenyi? Nanchi kuba bino bintu kwitufwenyesha kwipi ne Lesa nyi, inyi kwitufwenyesha kwipi ne Diabola ne bandemona banji? Walangulukapo’mba ka?—

Ñanyi ukeba’mba tutelekenga ne kutamba bintu byatama?— Ee, Satana ne bandemona bobakeba’mba tubenga bino. Onkao mambo, obewa ne amiwa twafwainwa kubapo ka?— Twafwainwa kutanganga, kuteleka, ne kutamba bintu byawama byakonsha kwitulengela kwingijila Yehoba. Ñanyi bintu bimo byo twakonsha kuba?—

Umvwe ke tube bintu byawama, kechi twafwainwa kuchina bandemona ne. Yesu uji na bulume kukila bandemona, kabiji bamuchina bingi. Juba jimo, bandemona babijikile kwi Yesu amba: ‘Lelo mwaiya kwitonauna nyi?’ (Mako 1:24) Kimye Yesu kyo akonauna Satana ne bandemona banji nanchi kechi tukatemwa nenyi?— Pano bino pa kino kimye, twafwainwa kuketekela’mba Yesu uketuzhikijila ku bandemona umvwe twafwenya kwipi ne aye ne kwi Shanji wa mwiulu.

Twaya tutange pa bintu byo twafwainwa kuba, pa 1 Petelo 5:8, 9 ne Yakoba 4:7, 8.

[Kipikichala pa jipa 57]

Kintu ka kyatama kyaubile bano bamalaika?

[Kipikichala pa jipa 58]

Mambo ka panopantanda kyo pavujila makatazho kukila ne byo kyajinga kala?

[Bipikichala pa jipa 60]

Ki ka kyakonsha kumwekana umvwe ketutambe bya bukapondo?

[Kipikichala pa jipa 61]

Ñanyi kintu kyawama kyo twafwainwa kuba?