Kitango 22

Kechi Twafwainwa Kubepa Ne

TWAMBE amba kashimbi waambila bainanji amba: “Inge nkotoketu ku sukulu, nsa kubwela ku nzubo.” Pano bino panyuma ya kukotoka wabwela ke akaye na bakwabo, kabiji waiya kubula bainanji amba: “Bafunjishi bami bo bambanzha.” Nanchi kyawama kwamba bino nyi?—

Nangwa kampe kalombwana waambila bashanji amba: “Ine, kechi naji kupamina mpila mu nzubo ne.” Pano kyakonsha kwikala byepi umvwe kya kine waji kupama? Nanchi kyawama kukana amba kechi ye waji kupama nenyi?—

Mufunjishi Wayukisha witubujile byo twafwainwa kuba. Waambile’mba: ‘Kwamba kwenu kwikaletu amba, Ee, Ee; Ine, Ine; mambo kyakila pa bibye kifuma ku bubi.’ (Mateo 5:37) Bino byambo Yesu wibitazhizhe mwepi?— Waambilenga’mba twafwainwa kuba bintu byo twamba.

Mu Baibolo muji jishimikila jaamba pa buneme bwa kwamba bya bukine. Jaamba pa bantu babiji betelanga amba baana ba bwanga ba kwa Yesu. Twaya tumone byo kyajinga.

Byo papichile bañondo babiji panyuma ya lufu lwa kwa Yesu, bantu bavula kufuma mu mapunzha a kwalepa baishile ku Yelusalema ku kijiilo kyanema bingi kya Bayudea kitelwa’mba Pentekosita. Mutumwa Petelo waambile jashi jawama bingi ku bantu jaambilenga pe Yesu, awo Lesa ye asangwile mu bafu. Kino kyo kyajinga kimye kitanshi bantu bavula baishile ku Yelusalema kyo bamuyukile Yesu. Kabiji bakebelenga kuyuka byavula. Pano baubilepo byepi?

Baikeleko moba avula bingi. Bamo mali o baishile nao apwile kabiji bakebelenga bukwasho bwa mali kuba’mba bapotemo kajo. Baana ba bwanga ba mu Yelusalema bepaine amba basa kwibakwasha. Onkao mambo, bavula bapoteshe bipe byabo ne kuleta mali ku batumwa ba kwa Yesu. Kabiji batumwa nabo bapainenga ano mali ku bakajijilwe.

Ananyasa ne mukazhanji, aye Safila, bapwilanga mu kipwilo kya bwina Kilishitu mu Yelusalema, bapoteshe bujimi bwabo. Kafwako wibakambizhe amba poteshai ne. Bene bo befuukwijile. Baubile bino kechi na mambo a kuba’mba batemenwe baana ba bwanga bakatataka ba kwa Yesu ne. Ananyasa ne Safila bakebelenga amba bantu bayuke’mba bawama bingi. Onkao mambo baambile’mba babena kupana mali onse a kukwashishamo bakwabo. Bapainetu acheche babwela kebambe amba bapanatu onse. Nanchi baubiletu bulongo nyi?—

Ananyasa wayile ku batumwa ne kukebapa mali. Bino, Lesa wayukile’mba kechi wapana onse ne. Onkao mambo, Lesa wayukishe kino ku mutumwa Petelo amba bibena kwamba Ananyasa kechi bya kine ne.

Petelo waambile’mba: ‘Ananyasa, mambo ka o walekela Satana ku kulengela kuba kino? Bujimi bwajinga bobe. Kechi wafwainwe kwibupotesha ne. Kabiji nangwatu byo wapotesha bujimi, obe mwine wafwainwa kuyuka mwakubila na mali obe. Nga mambo ka o ubena kubepela’mba wapana mali onse saka wapanatu acheche? Kechi wabepatu atweba yenka ne, wabepa ne Lesa.’

Ano ajinga mambo akatampe. Ananyasa wabepele! Kechi waubile bintu byo aambilenga ne. Baibolo witubula byamumwekejile. Waamba’mba: ‘Ponkapo Ananyasa pa kumvwa byaambile Petelo, waponene panshi naku, ne kufwa wafwa.’ Lesa waitabizhe’mba afwe! Kabiji bakamuzhikile.

Byo papichiletu maawala asatu, Safila naye watwelele. Kechi wayukile byamwekejile mwatawanji ne. Petelo wamwipwizhe’mba: ‘Nanchi bonse bubiji bwenu mwapoteshe bujimi na oa mali o mwitupele nyi?’

Safila wakumbwile’mba: ‘Ee, byo byo twapoteshe.’ Buno bwajinga bubela bwafitatu bwii! Balaminepo mali amo o bapoteshe bujimi. Lesa waitabizhe’mba Safila naye afwe.—Byubilo 5:1-11.

Ki ka kyo twakonsha kufunjilako ku kyamwekejile Ananyasa ne Safila?— Lufunjisho ke lwa kuba’mba Lesa kechi ukeba bubela ne. Ukeba atweba kwamba bya kine kimye kyonse. Bino, bantu bavula bamba’mba kubepa kechi kwatama ne. Ne obewa byo byo ulanguluka nyi?— Bino wayuka’mba bubela bo bwalengela misongo ne lufu panopantanda nyi?—

Vuluka kuba’mba Diabola wabepele mwanamukazhi mutanshi, aye Evwa. Wamubujile’mba kechi ukafwa ne, umvwe wasatukila Lesa ne kuja ku kipangwa kyo bamukanyishe. Evwa waumvwijile bya mubujile Diabola ne kuja wajile ku kipangwa. Kabiji walengejile ne mwatawanji Adama naye kujako. Byo baubile bino, baikele ke bandengamambo kabiji ne baana babo bonse nabo baikele ke bandengamambo. Mambo a kuba bajinga bandengamambo, baana bonse ba kwa Adama bayanda ne kufwa. Buno buyanji bonse ne makatazho byatendekele byepi?— Byatendekele na mambo a bubela.

O ene mambo Yesu o aambijile’mba Diabola “ye wa bubela, ye shanja bubela”! Ye wajinga muntu mutanshi kubepa. Umvwe muntu wabepa, ko kuba’mba ubena kuba byaubile Diabola pa kutendeka. Twafwainwa kulangulukangapo pa kino umvwe twaesekwa kuba’mba twambe bubela.—Yoano 8:44.

Wakonsha kwesekwa byepi kuba’mba ubepe?— Abya kanatu wauba kintu kyatama nyi?— Kimye kimo wakonsha kulala kintu na mapuso. Umvwe bakwipuzha, nanchi wafwainwa kwamba’mba kolojobe nangwa nkasobe ye walala nyi? Abya wafwainwa kwibepekezha’mba kechi wayuka walala nenyi?—

Twambe amba waji kwingilanga mwingilo wobe ye bakupele ku sukulu pano kechi wapwisha ne. Nanchi wafwainwa kwamba’mba wapwisha nangwa kechi wamupwisha nenyi?— Vuluka byamwekejile Ananyasa ne Safila. Kechi baambile bya kine ne. Kabiji Lesa byo ebepayile kyamwesheshetu patoka’mba kubepa kwatama.

Onkao mambo, nangwa twauba kintu kya byepi, bintu byakonsha kutama umvwe twabepa, kabiji kechi twafwainwa kubepa nangwa pachechetu ne. Baibolo waamba’mba: ‘Ambai bya bukine.’ Kabiji watwajijila amba: “Kechi mwibepe anwe bene na bene ne.” Yehoba kimye kyonse wamba bya bukine, netuwa byo byo twafwainwa kubanga.—Efisesa 4:25; Kolose 3:9.

Kimye kyonse twafwainwa kwambanga bya kine. Byo byaamba ne Kulupuka 20:16; Byambo bya Mana 6:16-19; 12:19; 14:5; 16:6; ne Bahebelu 4:13.

[Kipikichala pa jipa 117]

Awe mwanyike ki ka kyo atamisha?

[Kipikichala pa jipa 118]

Ananyasa ubena kubepa kwi Petelo amba ka?

[Kipikichala pa jipa 119]

Ki ka kyamumwekejile Ananyasa byo abepele?

[Kipikichala pa jipa 120]

Yesu waambile’mba ñanyi watendekele bubela, kabiji ki ka kyafuminemo?

[Kipikichala pa jipa 121]

Wakonsha kwesekwa byepi kuba’mba ubepe?