Kitango 31

Ko Twafwainwa Kutana Lutekenesho

NANCHI kimye kimo umvwa bulanda ne mukose nyi?— Abya wilangulusha’mba kana bakutemwa nyi?— Banyike bamo byo byo boba. Bino Lesa walaya’mba: ‘Amiwa kechi nkakuvulama obewa ne.’ (Isaya 49:15) Kino kintu kyawama bingi, ke ibyo nenyi?— Ee, Yehoba Lesa kine witutemwa bingi!

Nembi umo wa Baibolo waambile amba: “Batata ne bamama umvwe bandekelela, ponkapo Yehoba ukantola.” (Salamo 27:10) Kino kitutekenesha bingi, ke ibyo nenyi?— Ee, Yehoba witwambila’mba: ‘Kuba moyo ne, mambo amiwa nji nobe. . . . Kine, nkakukwasha.’—Isaya 41:10.

Pano bino, kimye kimo Yehoba umuswisha Satana kuba’mba etukatazhenga. Kabiji Yehoba umuswisha Satana amba eseke bakalume banji. Kimye kimo Diabola wamumanyikile bingi Yesu kya kuba Yesu wabijikile na jiwi jikatampe kwi Yehoba amba: “Lesa wami, Lesa wami, wandekela ka?” (Mateo 27:46) Nangwa kya kuba Yesu wamanaminenga, wayukile amba Yehoba wamutemwa. (Yoano 10:17) Bino Yesu naye wayukile amba Lesa kimye kimo umuswisha Satana kweseka bakalume banji ne kwibamanyika. Mu kitango kiji kulutwe, tukesamba pa ene mambo Lesa kyo amulekelatu Satana na kuba bino.

Umvwe twibanyike, kimye kyonse tumvwa bingi moyo. Kya kumwenako, wakilubilamo kala nyi?— Nanchi waumvwine moyo nyi?— Banyike bavula bomvwa bingi moyo. Juba jimo Mufunjishi Wayukisha washimikizhepo jishimikila ja kulubilamo. Bino kechi mwana ye walubijilemo ne. Wajinga mukooko.

Ne obewa ujitu nobe mukooko. Mu ñanyi jishinda? Mambo mikooko kechi banyama bakatampe ne. Kabiji kechi yakosa ne. Onkao mambo ikebewa kwiilama ne kwiizhikijila. Muntu ulama mikooko utelwa’mba kafunga.

Mu jishimikila janji, Yesu waambile pa kafunga wajinga na mikooko kitota kimo. Pano bino paelekele mukooko umo. Kampe uno mukooko wakebelenga kumona kubushiya bwa mutumba. Uno mukooko washajiletu kwa bunke bwanji. Pano waumvwine byepi byoashajiletu bunke bwanji?—

Nga kafunga waubilepo byepi byo amwene amba mukooko umo waeleka? Nanchi waambile amba mwine mambo yanji wajikushajilanga ka nyi? Nangwa abya washile aya mikooko 99 pa mpunzha pawama ne kuya na kukeba awa walubijilemo nyi? Nanchi kyakebewenga kuya na kukeba awa mukooko umotu nyi?— Umvwe yobe wajinga mukooko waelekele, nanchi wafwainwa kumvwa bulongo pa ku kukeba kwi kafunga nyi?—

Kafunga watemenwe bingi mikooko yanji, kubikapotu ne yewa waelekele. Onkao mambo waile na kumukeba awa waelekele. Uno mukooko waelekele wafwainwa waumvwine bingi bulongo pa kumona kafunga kasa eya! Kabiji Yesu waambile amba kafunga wasekejile bingi pa kutana mukooko waelekele. Wasekejile bingi pa uno mukooko umo kukila aya 99 yabujile kweleka. Nga uno kafunga mu jishimikila ja kwa Yesu ye ñanyi? Ñanyi witulama byonka byaubile yewa kafunga wayile na kukeba mukooko wanji?— Yesu waambile’mba Shanji wa mwiulu ye witulama. Kabiji uno Shanji ke Yehoba.

Yehoba Lesa ye Kafunga Wawama ulama bantu banji. Watemwa bingi aba bamwingijila, kubikapotu ne banyike byonka byo uji obewa. Kechi ukeba’mba twikozhenga nangwa kwitonauna ne. Kitekenesha bingi kuyuka’mba Lesa wituta bingi muchima!—Mateo 18:12-14.

Nanchi kine waitabila’mba Yehoba Lesa koaji nyi?— Nanchi ujitu nobe mulunda nobe wa pa muchima nyi?— Ee, kechi twakonsha kumumona Yehoba ne, mambo Yehoba mupashi. Pano bino koaji, kabiji witumona. Wayuka umvwe ke tukebe bukwasho. Kabiji twakonsha kwisamba nanji mu lulombelo byonkatu byo twisamba na bakwetu bantu. Yehoba ukeba’mba twisambenga nanji mu lulombelo.

Onkao mambo umvwe waumvwa moyo nangwa inge uji bunke, wafwainwa kuba ka?— Wafwainwa kwisamba ne Yehoba. Fwenya kwipi ne aye, kabiji naye ukakutekenesha ne ku kukwasha. Yuka kuba’mba Yehoba wa kutemwa bingi, nangwatu umvwe ke wiumvwe nobe ujitu bunke. Aki tola Baibolo. Salamo kitango 23 kutendeka kutanga pa kyepelo 1 paamba’mba: “Yehoba ye kafunga wami; kechi nkakajilwa ne. Mo mu nsono ya munyemvu mo andajisha; Mo mu misezho ya mema azhindama mo antangijila.”

Akimona byaamba nembi mu kyepelo 4. Waamba’mba: ‘Nangwa naenda mu mangawa a kimvule kya lufu, kechi nkachina kibi nangwa kya byepi ne; mambo anweba muji ne amiwa; kamama kenu ne mukombo wenu binzhindamika muchima.’ Abye byo biumvwa aba baketekela mwi Yehoba Lesa. Batekeneshiwa bingi umvwe baji na lukatazho. Nanchi ne obewa byo byo wiumvwa nyi?—

Byonka kafunga wa butemwe byo alama mikooko yanji, Yehoba naye ulama bantu banji. Wibabula jishinda mwakwenda, kabiji nabo baya monkamo. Nangwa kya kuba bapite mu makatazho a mutundu ka, kechi bachina ne. Kafunga wingijisha kamama nangwa mukombo pa kuzhikijila mikooko ku bijanyi. Baibolo waamba pa kafunga wa kyanyike aye Davida byo azhikijile mikooko yanji ku bokwe ne mbeyala. (1 Samwela 17:34-36) Ne bantu ba Lesa nabo bayuka’mba Yehoba ukebazhikijila. Beumvwa’mba bazhikijilwa mambo Lesa uji nabo.

Yehoba kine watemwa bingi mikooko yanji, kabiji wiilama bingi bulongo. Baibolo waamba’mba: ‘Uji nobe kafunga ujisha jitanga janji, ne kusenda baana ba mikooko mu maboko anji, kasa ebabukata mu kyaji kyanji.’—Isaya 40:11.

Nanchi kikusangajika kuyuka’mba Yehoba naye byo byo aji nyi?— Nanchi ne obewa ukeba kwikala mukooko wanji nyi?— Mikooko yumvwa jiwi ja kafunga wayo. Ifwenya kwipi na kafunga. Nanchi umumvwina Yehoba nyi?— Abya ufwenya kwipi ne aye nyi?— Kechi wafwainwa kuchina ne. Yehoba ukakulamanga.

Yehoba ulama boba bamwingijila mu butemwe. Twaya tutange ne byaamba Baibolo pa kino, pa Salamo 37:25; 55:22; ne Luka 12:29-31.

[Kipikichala pa jipa 163]

Nga awe mukooko walubilamo ubena kumvwa byepi?

[Kipikichala pa jipa 164]

Ñanyi uji nobe kafunga wakwasha mukooko wanji walubilamo?

[Kipikichala pa jipa 165]

Nanchi Yehoba kwi obewa ujitu nobe bashobe nyi?

[Kipikichala pa jipa 166]

Byonka kafunga byo azhikijila mikooko, ñanyi wakonsha kwitukwasha mu kimye kya makatazho?