Kitango 33

Yesu Wakonsha Kwituzhikijila

YESU byo akomene ne kuyuka byo bamuzhikijile kimye kyo akijinga mwanyike, nanchi walombele kwi Yehoba ne kumusanchila nyi?— Nga Yesu byo ayukile amba ba Maliya ne Yosefwa bamuzhikijile kupichila mu kumunyemeshesha ku Ijipita waubilepo ka?—

Pa kino kimye, Yesu kechi lukeke ne. Kabiji kechi ubena kwikala panopantanda byonka byo aubile ne. Pano bino ano moba nanchi wayuka kuba’mba bantu bamo bamuvuluka Yesu nobe mwana uji mu kijilamo banyama nyi?— Kino kyubiwa kimye kya Kiminshiminshi mambo mu mapunzha avula bamwesha bipikichala bya kwa Yesu bya bulukeke.

Nangwa kya kuba Yesu kechi uji panopantanda ne, nanchi wayuka kuba’mba mumi nyi?— Ee, wasangwilwe mu bafu, kabiji luno ke mfumu wa bulume mwiulu. Yesu wakonsha kuba ka pa kuba’mba azhikijile boba bamwingijila?— Yesu byo ajinga panopantanda wamwesheshe byo akonsha kuzhikijila boba bamutemwa. Akitwaya tumone byo aubile juba jimo byo ajinga mu bwato na baana banji ba bwanga.

Kyajinga kimye kya mute. Lukelo lonse Yesu wafunjishenga ku kizhiba kya Ngalilea, kyalepele makilomita 20 kabiji mu bwipi mwajinga makilomita 12. Waambijile baana banji ba bwanga amba: “Twayai ku bushiya bwa kizhiba.” Kepo bashinjikile bwato ne kutendeka kwabuka kuya bushiya bwa kizhiba. Yesu wakokele bingi, onkao mambo waile kunyuma ya bwato ne kulaala pa kya kushaminako. Waponejile mu tulo twine tukatampe.

Baana ba bwanga balabilengatu saka bavuwa bwato. Bayilengatu bulongo, olo ko kyakayanga kwaishile kipupu kikatampe. Kyapupilenga bingi, kabiji kwaubilenga bingi manyaki. Manyaki asampaukijilenga mu bwato, kabiji bwato bwatendekele kuyula mema.

Baana ba bwanga baumvwine bingi moyo amba basa kwibila. Bino Yesu kechi waumvwine moyo ne. Wajinga mu tulo twine kunyuma ya bwato. Baana ba bwanga bamubushishe, ne kumwambila’mba: ‘Mufunjishi, Mufunjishi, tupulushai; twavila na mambo a kino kipupu.’ Yesu wabukile ne kwambila kipupu ne manyaki amba: “Zhindama; Talala!”

Ponkapotu kipupu kyalekele, kabiji kalunga kazhindamine. Baana ba bwanga bakuminye bingi. Kechi bamwenepo kintu kya uno mutundu ne. Batendekele kwiambisha bene na bene amba: “Lelo uno ye ñanyi? Ukambizha ne luvula ne mema, nabyo byamukokela.”—Luka 8:22-25; Mako 4:35-41.

Nga obewa wamuyuka Yesu nyi?— Abya wayuka ko afumishe bulume bwanji nyi?— Baana ba bwanga kechi bafwainwe kumvwa moyo ne, mambo bajinga ne Yesu uji na bulume bwa kukumya. Wakonsha kuba bintu bya kukumya kya kuba muntu kechi wakonsha kwibyuba ne. Leka nkubule kikwabo kyo aubile pa kalunga pajinga lubesha lwabaya bingi.

Jino najo jajingatu juba jingi. Byo kyaubile ke mabanga, Yesu waambijile baana banji ba bwanga amba patamai mu bwato mutangilepo kubushiwa bwa kizhiba. Aye mwine wayile peulu ya mutumba bunke bwanji. Wayile kwa bunke bwanji kwazhindama bulongo kuba’mba alombe kwi Shanji, Yehoba Lesa.

Baana banji ba bwanga bapatamine mu bwato, kebaye ne kuya bushiya bwa kizhiba. Mwela watendekele kupupa. Kabiji wapupilenga kyabaya bingi. Kyajinga kimye kya bufuku. Baana banji ba bwanga balakeshe kimiko. Pano bino kechi baendelenga kuya palutwe ne, mambo mwela wibabwezhezhenga lunyuma. Bwato bwasunkenenga bingi na mambo a manyaki, kabiji mema asampaukijilenga mu bwato. Baesekele kuvuwa na ngovu kuba’mba bafike ku kitulu, aa, bakankalwa.

Yesu wajingatu bunke bwanji ku mutumba. Wabanjile bingi. Pano bino wamwene amba baana banji ba bwanga baji mu kizumba. Wakunkulukile kufuma pa mutumba ne kwiya ku kitulu kya kizhiba. Yesu wakebelenga’mba akwashe baana banji ba bwanga, onkao mambo watendekele kwenda kuya ko bajinga pa kalunga paubile luvula bingi!

Ki ka kyakonsha kumweka umvwe ke wende pa mema?— Wakonsha kwibila ne kutomena. Pano bino Yesu, ke muntu ungi. Wajinga na bulume bwakila. Yesu waendele musinso walepa bingi bino wakafika ku bwato. Byo kyafikile ke ku makya baana ba bwanga bamumwene Yesu saka enda pa mema kwiya kobaji. Bino bakuminye bingi pa kumona kino. Baumvwine bingi moyo, kabiji batamine muteto. Yesu wibambijile amba: “Sekelai; ye amiwa bano; lekai kuba moyo.”

Yesu byo apatamine mu bwato, luvula lwalekele. Baana ba bwanga bakuminye bingi. Bafukamine ku maulu a kwa Yesu ne kwamba’mba: “Kine anweba mwi Mwana Lesa.”—Mateo 14:22-33; Yoano 6:16-21.

Kyawamine bingi kwikala mu oa moba ne kumona bintu bya uno mutundu byaubilenga Yesu, ke ibyo nenyi?— Nanchi wayuka Yesu kyo aubijilenga bino bya kukumya nyi?— Wibyubilenga mambo watemenwe bingi baana banji ba bwanga kabiji wakebelenga kwibakwasha. Kabiji waubilenga bino bya kukumya kumwesha’mba uji na bulume bwakila bo akengijisha kulutwe na lwendo byo akekala Mfumu wa Bufumu bwa Lesa.

Ne ano moba Yesu uzhikijila baana banji ba bwanga ku tukose twa kwa Satana twa kukeba kwibalekesha kwambanga pa Bufumu bwa Lesa ku bakwabo. Bino Yesu kechi wingijisha bulume bwanji mukuzhikijila baana banji ba bwanga ku bikola nangwa kwibabuka umvwe babela ne. Nangwatu batumwa ba kwa Yesu nabo bafwile. Mulongo wa kwa Yoano, aye Yakoba bamwipayile, kabiji Yoano naye bamutayile mu kaleya.—Byubilo 12:2; Lumwekesho 1:9.

Byo byo kiji ne ano moba. Bantu bengijila Yehoba nangwa babula kumwingijila bonse babela ne kufwa. Pano bino, kechi byo byo kikekala mu bukalama bwa kwa Yesu, Mfumu wa mu kafulumende wa Lesa ne. Kafwako ukomvwanga moyo ne, mambo Yesu ukengijisha bulume bwanji kuba’mba bantu bonse bamukokela bakamwenemo byawama.—Isaya 9:6, 7.

Binembelo bikwabo bimwesha bulume bwa kwa Yesu, awo Lesa ye aikajika ke mfumu mu Bufumu bwa Lesa, ke bino: Danyela 7:13, 14; Mateo 28:18; ne Efisesa 1:20-22.

[Bipikichala pa jipa 172]

Nanchi ulanguluka’mba Yesu Mfumu wa bulume nyi, inyi amba mwana wa lukeke?

[Kipikichala pa jipa 173]

Yesu ubena kwambila kipupu ne manyaki amba ka?

[Kipikichala pa jipa 174]

Mambo ka Yesu o aubilanga bya kukumya?

[Kipikichala pa jipa 176]

Ano moba Yesu uzhikijila byepi baana banji ba bwanga?