Kitango 38

Ene Mambo O Twafwainwa Kumutemenwa Yesu

FWANYIKIZHA kuba’mba uji mu bwato bubena kuloba. Abya wakonsha kutemwa kuba’mba mukwenu akwabulemo nyi?— Ibyepi inge kya kuba muntu umo wipana amba obe bino?— Byo byaubile Yesu Kilishitu. Byonka byo twafunjile mu Kitango 37, wapaine bumi bwanji ke bukuzhi kuba’mba etukule.

Pano bino, Yesu kechi witwabula pa mema inge ke tukebe kutomena ne. Nanchi ubena kukivuluka bintu byo etukulako nyi?— Witukula ku bundengamambo ne lufu byo twaswana kwi Adama. Nangwatu kya kuba bantu bamo boba bintu byatama bingi, nabo Yesu wibafwijile. Abya ne obewa wakonsha kupana mweo obe kuba’mba upulushe bantu ba uno mutundu nyi?—

Baibolo waamba’mba: “Mambo muntu kampe kechi amufwile mololoketu ne: kana muntu wa lusa kampe umo usakuchinchika ne kumufwila.” Baibolo walondolola’mba Yesu wafwijile bantu “babula kwakamwa Lesa.” Pa bano bantu paji ne boba babula kwingijila Lesa! Baibolo wanungapo amba: “Byo twakijinga bandengamambo [saka tukyuba bintu byatama], Kilishitu witufwijile.”—Loma 5:6-8.

Nanchi wayukapo muntu umo waubanga bintu byatama saka akyangye kwikala mutumwa nyi?— Uno mutumwa wanembele’mba: ‘Kilishitu Yesu waishile panopantanda mu kupulusha bandengamambo; mwi abo amiwa yami mwine wakilamo kulenga mambo.’ Mutumwa waambile bino byambo wajinga Paulo. Waambile’mba kala ‘wajinga wakosama’ kabiji wajinga ‘wa lupato.’—1 Timoti 1:15; Titusa 3:3.

Kine Lesa uji bingi na butemwe mambo watumine mwananji kwiya na kufwila bantu baji na byubilo byatama! Akitola Baibolo obe umvwe byaamba Yoano kitango 3, kyepelo 16. Panembwa amba: “Mambo Lesa byo ebatemwisha ba panopantanda, wapaine mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.”

Yesu wamwesheshetu patoka amba witutemwa byonka bitutemwa Shanji. Kampe wakonsha kuvuluka byo twafunjile mu Kitango 30 kya uno buku, twafunjile pe Yesu byo amanaminenga pa juba jo bamukwachile. Bamutwajile ku kipango kya Ñanga Mukatampe aye Kaifasa na kumutotolwesha. Batumonyi ba bubela bamushinawijilenga bya bubela, kabiji bantu bamushachilenga binkonyi. Kyo kimye kyamukaine Petelo. Pano fwanyikizha kuba’mba ne atweba tuji ponka kimye kibena kubiwa bino bintu.

Ke kimye kya lukelo. Yesu ubalabengatu bufuku bonse. Mambo a kuba’mba byo bajikumutotolweshanga kimye kya bufuku kechi byailamo ne, bañanga bashonkena jibiji mu kije kya Saniedilini, nangwa amba kije kikatampe kya Bayudea, ne kutendeka kumutotolwesha. Bamupamo mambo amba wamulenga mambo Lesa.

Bañanga babwela bamukasa Yesu, ke bamutwale ne kwi Pilato, ndamakyalo wa Loma. Byo bafika kwi Pilato bamwambila’mba: ‘Yesu walala muzhilo wa kafulumende. Wafwainwa kwipaiwa.’ Pano bino Pilato wamonatu patoka’mba bañanga babena kubepa bubela. Pilato wibambila’mba: ‘Amiwa mu iwe muntu kafwamo kyatama kyonamonamo ne. Mbena kumulekako ayenga.’ Bino bañanga ne kiombe babijika amba: ‘Ine byo ne! Mwipayai!’

Palutwe kacheche, Pilato wabwelele waamba’mba ubena kumulekako Yesu. Pano bino bañanga balengejile mabumba kubijika amba: ‘Umvwe mumulekeko, nenuwa ko kumvwa’mba mwasatukila kafulumende! Mwipayaitu!’ Jibumba jaubilenga bingi kyongo. Nanchi wayuka byaubile Pilato nyi?—

Waumvwijile. Patanshi wakambizhizhe’mba Yesu bamuzhipaule. Kabiji wabwela wamupana ne ku bashilikale amba bamwipaye. Bamuvwikile munchinya wa miba ku mutwe ne kutendeka kumwendeleka byo bamufukamijilenga. Kabiji kepo Yesu bamupele kichi kikatampe amba senda ne kumutangizhako kuya kunsa ya muzhi ku mpunzha itelwa’mba Kuntu kwa Kiboyongolo. Byo bafikile kokwa, bapopele maboko ne maulu a kwa Yesu pa kichi. Babwela bekimika ne kwikimika, Yesu saka akobama ponka. Mashi anji apokomokelengatu. Kabiji waumvwine bingi kukola.

Yesu kechi wafikenejiletu kufwa ne. Wakikobaminetu pa kichi. Bañanga bakatampe bamwendelekelenga. Kabiji bantu bapichilenga baambilenga’mba: “Umvwe wi mwana Lesa, ikila ku kichi!” Pano bino Yesu wayukile kyamutumijile Shanji. Wayukile’mba wafwainwa kupana bumi bwanji pa kuba’mba twikale na bumi bwa myaka ne myaka. Byo kyatwajilenga pa kulemba juba, Yesu wabijikile na jiwi jikatampe kwi Shanji ne kufwa wafwile.—Mateo 26:36–27:50; Mako 15:1; Luka 22:39–23:46; Yoano 18:1–19:30.

Yesu wapusene bingi na Adama. Adama kechi watemenwe Lesa ne. Wasatukijile Lesa. Nangwatu atweba kechi witutemenwe ne. Mambo a kuba’mba walengele mambo, ne atweba bonse twasemwa na bundengamambo. Bino Yesu wamwesheshetu patoka’mba watemwa Lesa kabiji ne atweba witutemwa. Kimye kyonse wakokelanga Lesa. Wapaine bumi bwanji kuba’mba afumyepo bundengamambo bwaletele Adama kwi atweba.

Abya umvwa bulongo pa kino kintu kyawama kyaubile Yesu nyi?— Byo ulomba kwi Lesa, nanchi umusanchila pa kwitupa Mwananji nyi?— Mutumwa Paulo wasanchijile Kilishitu pa byo amubijile. Paulo wanembele amba Mwana Lesa “wantemenwe ne kwipana mwine na mambo a amiwa.” (Ngalatiya 2:20) Yesu witufwijile atweba bonse. Wapaine mweo wanji kuba’mba twikale na bumi bwa myaka ne myaka! Ee, kino ke kintu kyanema bingi kyakonsha kwitulengela kumutemwa Yesu.

Mutumwa Paulo wanembejile bena Kilishitu baikalanga mu muzhi wa Kolinda amba: “Butemwe bwa Kilishitu bo bwitwingijisha.” Butemwe bwa Kilishitu bwitwingijisha mu ñanyi jishinda? Walangulukapo’mba ka?— Paulo wakumbula’mba: ‘Kilishitu wibafwijile bonse, amba, bekala na bumi kechi bakikale na kwitokesha abo bene ne.’—2 Kolinda 5:14, 15.

Abya kujipo mashinda amo mo wakonsha kumweshesha’mba ubena kukeba kutokesha Kilishitu pa muchima nyi?— Jishinda jimo ke kubulako bakwenu bintu byo wayuka pe Kilishitu. Nangwa akilanguluka pa kino: Wakonsha kwikalatu bunke bobe, kabiji bashobe nangwa bainobe kechi bakonsha kumona byo ubena kuba ne, nangwatu muntu uji yense kuba wamona ne. Abya wakonsha kutamba mafilimu a pa Televizhonyi nangwa pa Intaneti byakonsha kumufichisha Yesu ku muchima nyi?— Yuka kuba’mba Yesu mumi, kabiji wakonsha kumonatu byonse byo tuba!

Kabiji kintu kikwabo kyo twafwainwa kumutemenwa Yesu ke kya kuba’mba tukeba kulonda Yehoba. Yesu waambile’mba: ‘Batata bantemwa.’ Nanchi wayuka Lesa kyo amutemenwa Yesu ne atweba kyo twafwainwa kumutemenwa nyi?— Mambo Yesu waelele mweo wanji kuba’mba kyaswa muchima wa Lesa kyubiwe. (Yoano 10:17) Onkao mambo, twafwainwa kubanga byaamba Baibolo amba: ‘Ikalai ba kulonda Lesa, byafwainwa baana bo atemwa; ne kwenda monka mu butemwe, byonka byo etutemenwe Kilishitu, ne kwipana mwine na mambo a atweba.’—Efisesa 5:1, 2.

Pa kuba’mba tumusanchilenga Yesu pa byo etubijile, tanga Yoano 3:35; 15:9, 10; ne 1 Yoano 5:11, 12.

[Bipikichala pa jipa 199]

Yesu wapichile mu ñanyi bintu byo etwelejile mweo wanji?

[Kipikichala pa jipa 200]

Pa kuba’mba tumweshe’mba twamutemwa Yesu, bi ka byo twakonsha kuba?

[Kipikichala pa jipa 201]

Ñanyi wakonsha kumona byonse byo tuba?