Nanchi Kimye Kimo Umvwa Moyo ne Kumona Nobe Ujitu Bunke Nyi?

Akimona mwanyike uji pa kipikichala. Ubena kumweka nobe ujitu bunke kabiji waumvwa ne moyo, ke ibyo nenyi? Nanchi ne obewa wakyumvwapo kala bino nyi?— Bantu bonse kimye kimo byobyo bomvwa. Baibolo waambapo pa balunda na Yehoba baumvwinenga nobe bajitu bunke ne kuba moyo. Umo pa bano ke Elaija. Twaya tufunde byavula pe aye.

Elaija waikalanga mu Isalela kala kene Yesu saka akyangye kusemwa. Ahaba ye wajinga mfumu wa bena Isalela pa kyo kya kimye, kabiji kechi wapopwelanga Lesa wa kine, Yehoba ne. Ahaba ne mukazhanji Yezebeli bapopwelanga lesa wa bubela watelwanga’mba Baela. Onkao mambo, bena Isalela bavula batendekele kupopwela Baela. Inamfumu aye Yezebeli wakanamine bingi kabiji wakebelenga kwipaya bantu bonse bapopwelanga Yehoba, kubikapotu ne Elaija. Abya wayuka byaubile Elaija nyi?—

Elaija wanyemene. Wanyemejile mu kiselebwa ne kukafyama mu kibwe. Walanguluka’mba kika kyalengejile Elaija kunyema?— Ee, waumvwine moyo. Pano bino, Elaija kechi wafwainwe kuba moyo ne. Mambo ka? Mambo wayukile’mba Yehoba wakonsha kumukwasha. Kino saka kikyangye kumweka, Yehoba wamwesheshe Elaija bulume bwanji. Kimye kimo, Yehoba wakumbwile lulombelo lwa kwa Elaija kupichila mu kutuma mujilo kufuma mwiulu. Onkao mambo, ne pa kikye kimye Yehoba wakonsheshe kukwasha Elaija.

Kimye Elaija kyo ajinga mu kibwe, Yehoba wisambile nanji ne kumwambila’mba: “Kika kyo ubena kuba kuno?” Elaija wakumbwile’mba: ‘Amiwa yami yenka nashalapo na kwimupopwela. Njitu bunke, kabiji naakamwa’mba basa kungipaya ne amiwa.’ Elaija walangulukilenga’mba bakwabo bapopweshi ba Yehoba bonse bebepaya. Pakuba Yehoba wabuujile Elaija amba: ‘Ine, kechi bonse bo baipaya ne. Mukiji bantu 7,000 bampopwela. Chinchika. Kuji mingilo yavula yo wafwainwa kwingila.’ Nanchi ubena kulanguluka’mba Elaija watemenwe pa kumvwa bino byambo nyi?—

Wakonsha kufunjilako ka ku byamwekejile Elaija?— Kechi wafwainwa kumonanga nobe ujitu bunke ne kuba moyo ne. Uji na balunda nobe batemwa Yehoba kabiji bakutemwa ne obewa. Kikwabo, Yehoba uji bingi na ngovu, kabiji ukakukwashanga kimye kyonse. Abya waumvwa bulongo pa kuyuka kuba’mba kechi ujitu bunke nenyi?—