Yosiya Wajinga na Balunda Bawama

Nanchi ulanguluka’mba kyakatazha kuba byawama nyi?— Bantu bavula balanguluka’mba kyakatazha. Baibolo witubuula kuba’mba kyamukatezhe bingi nsongwalume Yosiya kuba byawama. Pano bino, wajinga na balunda bawama bingi bamukwashishe. Twaya tufunde byavula pe Yosiya ne pa balunda nanji.

Shanji Yosiya wajinga mfumu wa bena Yuda. Jizhina janji wajinga Amonyi. Amonyi waubilenga bintu byatama kabiji wapopwelanga bankishi. Kimye Amonyi kyo afwile, Yosiya waikele mfumu wa bena Yuda. Pano bino, wajingatu na myaka 8. Walanguluka’mba Yosiya waubilenga byatama byonka byaubilenga bashanji nyi?— Ine, kechi waubilenga byatama ne.

Nangwa kya kuba Yosiya wajingatu mwanyike, bino wakebelenga kukokela Yehoba. Onkao mambo, wasajile bantu batemenwe Yehoba kwikala balunda nanji. Kabiji bano balunda nanji bamukwashishe Yosiya kuba byawama. Bañanyi bamo bajinga balunda nanji Yosiya?

Mulunda nanji umo wajinga Zefwaniya. Zefwaniya wajinga ngauzhi wajimwineko bena Yuda amba inge ke bapopwele bankishi, bintu byatama bikebamwekela. Yosiya waumvwine byambo byaambile Zefwaniya kabiji wapopwelanga Yehoba, kechi bankishi ne.

Mulunda nanji mukwabo wajinga Yelemiya. Kyamweka baesakene mu myaka kabiji baikalangatu mu mpunzha imo byo bakomenenga. Bajinga balunda bawama bingi kya kuba Yosiya byo afwile, Yelemiya wanembele lwimbo wa kumuvulukilako. Yelemiya ne Yosiya bekwashanga kuba byawama kabiji bakokelanga Yehoba.

Wakonsha kufunjilako ka kwi Yosiya?— Nangwa kya kuba Yosiya wajingatu mwanyike, bino wakebelenga kuba byawama. Wayukile kuba’mba wafwainwe kusala bantu batemenwe Yehoba kwikala balunda nanji. Ne obewa wafwainwa kumona kuba’mba wasala bantu batemwa Yehoba kwikala balunda nobe, kabiji bakakukwasha kuba byawama.