Masukulu a Bufumu​—Kufunjisha Bamwingilo ba Mfumu

MWAMWEMWESELA pa kumona ñambi pa mutuntamo. Ke mulongo mwanyike uji mu kipwilo kyenu kabiji jo jashi jitanshi jo abena kwamba pa kubuñana. Byo mubena kuteleka ku jashi janji, mwatendeka kulanguluka pe Lesa byo afunjisha bantu banji. Mwavuluka byo ebikileko kimye kitanshi kwamba jashi pa mutuntamo ne kwesakanya byo a bena kwamba bulongo pa kikye kimye. Wafunjile byavula byo apichile mu Sukulu wa Mwingilo wa Bupainiya. Katatakatu, aye ne mukazhanji bafumine ku Sukulu wa Basapwishi ba Bufumu. Byo mubena kupopwela ku jashi jawama jaamba mulongo, mwakenkenta ne kulanguluka pe Lesa byo afunjisha bantu banji.

Baibolo waambijile jimo amba bantu ba Lesa “bakebafunjisha kwi Yehoba.” (Isa. 54:13) Kino kyo kimye kyo tubena kwikalamo. Kechi witufunjisha kupichilatu mu mabuku etu ne, bino tufunda ne pa kupwila kwa kipwilo, pa kubuñana, kushonkena kwa nkambi ne mu masukulu apusana pusana etukwasha kwingila mingilo yapusana pusana mu jibumba ja Yehoba. Mu kino kipungu, tusakufunda pa ano masukulu byo amwesha kuba’mba Bufumu bwa Lesa bubena kulama lelo jino.