Bañanyi Lesa Bo Etako Ku Kijiilo?

Yesu wakijinga mu nzubo ya Mufaliseo kimye kyo abukile muntu wajinga na kikola kya butumbwevumo. Byo atajilenga bakwabo benyi saka bekala pa bipona bya buneme kimye kyo bajiilenga, Yesu wibafunjishe lufunjisho pa mambo a kwipelula.

Yesu waambile’mba: “Umvwe muntu wimwita ku kijiilo kya masongola, kange mwikale pa bipona bya buneme ne. Mambo kampe muntu wimukila naye bamwita. Kabiji awa wimwichile anweba bonse babiji ukeya ne kwimwambila’mba, ‘Fumaipo pekale babo.’ Ne anweba kikemulenga bumvu pa kutuntulukila pa kipona kyabula kya buneme.”—Luka 14:8, 9.

Kepo Yesu ebafunjileko’mba: “Umvwe bemwita, ikalai pa kipona kyabula kya buneme, kuba’mba umvwe wimwichile waiya, ukemwambila’mba, ‘Obewa mulunda nami, iya wikale pa kino kya buneme.’ Ne anweba mukanema ku bakwenu bonse baiya.” Kino kechi kyalumbulwilengatu kumwesha mushingi ne. Yesu walumbulwile’mba: “Mambo yense witumbijika aye mwine bakamupelula, pakuba yense wipelula mwine bakamutumbijika.” (Luka 14:10, 11) Pa kwamba bino, Yesu watundaikilenga bamutelekelenga kwipelula.

Kepo Yesu aambijile Mufaliseo wamwichile ne kulumbulula byo afwainwe kunengezha kijiilo kya mabanga kitokesha Lesa ku muchima. Waambile’mba: “Umvwe wanengezha kajo ka mute nangwa ka mabanga, kange wite balunda nobe, nangwa bakolojobe nangwa bankasobe ba balume nangwa balongo bobe nangwa banonshi bo wikala nabo kinkalankulo ne. Mambo kampe nabo kimye kimo bakonsha kukwitako, kabiji kino kyakonsha kwikala mfweto yobe. Bino umvwe wanengezha kijiilo ita bayanji, basunkuta, balemana ne bampofu; kabiji ukekala na lusekelo, mambo abo kafwako kyo bakakufweta ne.”—Luka 14:12-14.

Mwayilatu kisemwa, twatemwa kwita balunda netu, balongo betu nangwa bo twikala nabo kipikipi. Kabiji Yesu kechi waambile’mba kyatama kuba bino ne. Bino Yesu wakoseshe kishinka kya kuba’mba kunengezhezha kajo bakajilwa nabiji bayanji, balemana nangwa bampofu kulengela kwikala na lusekelo. Yesu walumbulwijile awa wamwichile’mba: “Obewa bakakufweta mu kimye kikasanguka baoloka.” Mwenyi mukwabo waswishishe byaambile Yesu ne kwamba’mba: “Watokwa awa uja mu Bufumu bwa Lesa.” (Luka 14:15) Uno waichile Yesu ku kijiilo wamwene buwame buji mu kuba bino. Nangwa byonkabyo, bachechetu banemeka luno lwito byonka byaambile Yesu mu kishimpi amba:

“Muntu umo wanengezhe kijiilo kikatampe kya mabanga, kabiji waichile bantu bavula. Watumine kalume wanji . . . kuya na kwita bo aichile amba, ‘Iyai, mambo byonse banengezha kala.’ Bino bonse batendekele kukeba mashinda mwa kukaina. Mutanshi wamwambijile’mba, ‘Napota bujimi kabiji mbena kukeba kuya na kwibumona; mwane ndekelaiko mambo kechi nsakukonsha kwiyako ne.’ Mukwabo naye waambile’mba, ‘Napota bañombe jikumi ba ku bikonkoji kabiji mbena kuya na kwibamona; mwane ndekelaiko mambo kechi nsakukonsha kwiyako ne.’ Kabiji mukwabo naye waambile’mba, ‘Amiwa po po nasongolatu, onkao mambo, kechi nsakukonsha kwiyako ne.’”—Luka 14:16-20.

Kuno kukana kwabo kechi kwayijilemo ne. Bujimi nangwa banyama bebimwenanga jimo saka bakyangye kwibipota, onkao mambo panyuma ya kuba kino, kechi kyakebewanga kuya na kwibimona jibiji ne. Muntu wa busatu kechi wanengezhezhenga masongola ne. Uno muntu bamwichile saka asongola kala, onkao mambo, kechi wafwainwe kukana luno lwito lwanema ne. Onkao mambo, byo aumvwine byo bakaine, awa nkambo wazhingijile bingi ne kukambizha kalume wanji amba:

“Pelawizha kuya mu mikwakwa ne mu mashinda a mu mizhi, ne kuleta kuno bayanji, basunkuta, bampofu ne balemana.” Kalume waubile byamukambizhe Nkambo yanji, bino mpunzha yakijingamo. Onkao mambo, nkambo yanji waambijile kalume jikwabo amba: “Yanga mu mikwakwa ne mu mashinda ne kwibambila beye kuba’mba bayuzhe nzubo yami. Nemwambila anweba namba kafwako nangwa umo pa boba bantu bo naji kwita patanshi usakujako ku kijiilo kyami kya mabanga ne.”—Luka 14:21-24.

Kino kishimpi kyaambile Yesu kimwesha Yehoba Lesa byo aambijile Yesu Kilishitu kwita bantu bakekala mu Bufumu bwa mwiulu. Bayudea ne bantangi ba bupopweshi bo bajinga batanshi kutambula luno lwito. Bantu bavula bakaine alwa lwito kimye Yesu kyo asapwijilenga. Bino luno lwito kechi lwapelejiletu pe abo ne. Yesu waambile’mba kulutwe kukekala lwito lwa bubiji lwa kwita Bayudea bepelwile ne bantu baalukile ke Bayudea. Apa bino, kukekale lwito lwa busatu lwapelako ku babujile kwikala Bayudea bamonwanga’mba Lesa kechi wafwainwa kwibobila lusa ne.—Byubilo 10:28-48.

Kya kine, byambo byaambile Yesu bimwesha bukine bwa byambo byaambile Mwenyi mukwabo bya kuba’mba: “Watokwa awa uja mu Bufumu bwa Lesa.”