Nkalata Yafuma ku Jibumba Jitangijila

Ku Basapwishi Bakwetu ba Mambo Awama:

Kyawama bingi byo twakwatankana pamo kwingijila Lesa wa kine, aye Yehoba. Atweba twi “ba mwingilo” banji bo apa kwingila mwingilo wazhila kabiji mwingilo wa kusapwila ne kufunjisha mambo awama a Bufumu bwanji bwaikajikwa ukapulusha bantu. (1 Ko. 3:9; Mat. 28:19, 20) Pa kuba’mba twingile bulongo uno mwingilo wa ntanda yonse, twafwainwa kukwatankana.—1 Ko. 14:40.

Uno buku usakwimukwasha kuyuka bulongo kipwilo kya bena Kilishitu byo kingila lelo jino. Kabiji waamba ne pa mingilo yavula yo muji nayo byo muji Kamonyi wa kwa Yehoba. Inge mwatemwa mingilo yo bemupa ne kwiingila bulongo, ko kuba’mba ‘mukakosa mu lwitabilo.’—Byu. 16:4, 5; Nga. 6:5.

Onkao mambo, tubena kwimutundaika kutanga uno buku. Monaipo mashinda mo mwakonsha kwingijisha byambo bijimo mu bwikalo bwenu. Umvwe po po mwaikalatu musapwishi wabula kubatizhiwa, ñanyi bintu byo mwafwainwa kuba pa kuba’mba mwikale Kamonyi wa kwa Yehoba wabatizhiwa? Kabiji inge mwabatizhiwa kala, mwakonsha kuba byepi pa kuba’mba mukoseshe lwitabilo lwenu ne kwingilangako pakatampe mu mwingilo wa Yehoba? (1 Timo. 4:15) Mwakonsha kuba byepi pa kuba’mba mu kipwilo mwikale mutende? (2 Ko. 13:11) Kebai mikumbu ya ano mepuzho mu uno buku.

Inge mwi mulongo wabatizhiwa, mwakonsha kuba byepi pa kuba’mba mufikilemo kwikala nkwasho nangwa mukulumpe mu kipwilo? Bantu bavula byo babena kwiya mu jibumba ja Lesa, kubena kukebewa balongo bafikilamo ba kutangijila. Uno buku usakwimukwasha kuyuka bintu bikebewa pa “kukanamina mwingilo.”—1 Timo. 3:1.

Twaketekela kuba’mba uno buku usakwimukwasha kuyuka bintu byo mwafwainwa kubanga mu jibumba ja Yehoba ne kukookelanga mikambizho yanji. Twimutemwa bingi anweba bonse, kabiji tubena kulomba kuba’mba mwikale pa bantu bakatwajijila kwingijila Shetu wa mwiulu, aye Yehoba myaka ne myaka.—Sala. 37:10, 11; Isa. 65:21-25.