BWIPUZHO 7
Nakonsha Kuba Byepi Inge Babena Kunkanji- kizha Kwilaala?
WAKONSHA KUBA BYEPI?
Fwanyikizha bino: Papitatu bañondo babiji kufuma kimye Jane ne Mike po batendekele kwifwalama. Bino kimwekatu nobe beyukile kala. Betumina tubyambo pa foni kimye kyonse ne kwisamba kimye kyabaya, kabiji bayuka bikeba kwamba mukwabo saka akyangye ne kupwisha kwamba. Pano luno, Mike kechi ukeba’mba kipelelengatu mu kwisamba ne.
Pa bañondo babiji bapitapo, Mike ne Jane bekwatatu ku maboko ne kwifyompa. Jane aye watondwa na byonka binotu kwapwa. Pano bino, kechi ukeba kuzhingijisha Mike ne, kuchina’mba wakamusha. Wamutemwa bingi Mike. Kabiji javula wamba’mba, ‘Amiwa ne Mike twitemwa bingi . . . ’
Umvwe wakoma kabiji wafikilamo kwisamba na mwanamulume nangwa mwanamukazhi, wakonsha kuba byepi inge yobe wajinga Jane?
AKITULUMANA NE KULANGU- LUKAPO!
Kwilaala ke bupe Lesa bo apa bantu besongola kwapwa. Kwilaala saka ukyangye kutwela mu masongola ke kulengulula buno bupe. Kijitu nobe kutola kivwalo kyawama kya kupeele mukwenu ne kwikingijisha kuwamisha mawindo
Inge wabula kulondela mizhilo, ukamona byatama. Kyo kimotu, wakonsha kumona byatama inge walengulula mizhilo nabiji wa kuba’mba: “Mwafwainwa . . . kuchina bulalelale.”—1 Tesalonika 4:3.
Ñanyi bintu bifumamo inge muntu walengulula uno muzhilo? Baibolo waamba’mba: “Awa uba bulalelale umulenga mambo mubiji wanji mwine.” (1 Kolinda 6:18) Mu ñanyi jishinda?
Bashayuka bataana kuba’mba bantu boba bulalelale saka bakijitu banyike bapita mu makatazho nabiji:
KWILANGULUSHA. Banyike bavula baubilepo bulalelale bamba’mba belangulusha bingi pa byo baubile.
KUBULA KWIKETEKELA. Panyuma ya kwilaala, bonse babiji batendeka kwishikisha bunke mu muchima amba, ‘Bañanyi bakwabo bo elaalapo nabo kala?’
KULEFULWA. Kishinka ke kya kuba’mba banabakazhi bakeba mwanamulume wa kwibazhikijila, kechi kwibakanjikizha kuba byo babena kubula kukeba ne. Kabiji banabalume bavula kechi bakeba mwanamukazhi uswatu ponkapotu ne.
Kishinka ke kino: Inge waswa kuba bulalelale saka ukiji mwane, ko kuba’mba ubena kwilengulwisha. (Loma 1:24) Kechi wafwainwa kupana mubiji wobe ku muntu ne, mambo wanema bingi.
Wafwainwa kumwesha kuba’mba uji na bulume bwa ‘kukana kuba bulalelale.’ (1 Tesalonika 4:3) Kabiji juba jo ukatwela mu masongola, ukekala na luusa lwa kulaala na mwina kobe. Ukeyowanga bya mu masongola saka wakasuluka, kwa kubula kwilangulusha nangwa kulefulwa. Kabiji kechi ukekala na milanguluko ya kubula kwiketekela ne.—Byambo bya Maana 7:22, 23; 1 Kolinda 7:3.
WALANGULUKAPO’MBA KA?
Nanchi muntu wakutemwa wakonsha kukukanjikizha kuba byatama ne kukulengela kutendeka kwilangulusha nyi?
Nanchi muntu wa kuta muchima wakonsha kukulengela konauna bulunda bobe ne Lesa nyi?—Bahebelu 13:4.