Yehoba Wapeele Samisonyi Bulume

Bena Isalela bavula batendekele kupopwela bankishi jikwabo. Onkao mambo, Yehoba waswishishe bena Filishitiya kwibamanyika. Bino kwajinga bena Isalela bamo batemenwe bingi Yehoba. Umo pa bano wajinga Manowa. Aye ne mukazhanji kechi basemenepo mwana ne. Juba jimo Yehoba watumine malaika kwi muka Manowa. Malaika wamwambijile’mba: ‘Ukasema mwana wamulume. Uno mwana ye ukapokolola bena Isalela ku bena Filishitiya. Ukekala Munazili.’ Banazili wibayuka nyi? Bajinga bakalume ba Yehoba bapusene bingi na bakwabo. Banazili kechi bebaswishishe kutenda nsuki ne.

Byo papichile moba, Manowa ne mukazhanji baikele na mwana wa mulume, kabiji wamutumbile’mba Samisonyi. Bino Samisonyi byo akomene, Yehoba wamupeele bulume bukatampe. Juba jimo waipaile bokwe na maboko kwa kubula kilwilo. Kabiji pa kimye kikwabo, waipaile bena Filishitiya 30 bunke bwanji. Kino kyalengejile bena Filishitiya kumushikwa bingi ne kukeba’mba bamwipaye. Juba jimo bufuku Samisonyi saka alaala mu muzhi wa Gaza, bena Filishitiya bayile ku kibelo kya muzhi ne kumubelamina’mba bakamwipaye lukelo. Bino pakachi ka bufuku, Samisonyi wabuukile ne kuya ku kibelo kya muzhi ne kutupula binzhilo. Wasendele bino binzhilo pa bipuzhi ne kwibikanjizha pa mutumba uji kwipi na muzhi wa Hebulona.

Palutwe kacheche, bena Filishitiya bayile kwi Delila, ye akebelenga kusongola Samisonyi, ne kumwambila’mba: ‘Inge umwipuzhe Samisonyi akubuule ko afyumya ngovu yanji kabiji witubuule, tusakukupa mali a siliva avula bingi. Tukeba kumukwata ne kumutaya mu kaleya.’ Na mambo a kuba’mba Delila wakebelenga mali, waswile kuba bino. Kimye kitanshi, Samisonyi wakaine kumubuula kwafumanga ngovu yanji. Bino Delila watwajijiletu na kumukatazha kufikatu ne Samisonyi byo amubujile ko afumya ngovu. Wamubuujile’mba, ‘Nkyangye kutendapo nsuki yami ne, mambo ne Munazili. Inge nsuki yami beitenda, ngovu yami yonse ikapwa.’ Samisonyi walubankenye bingi kubuula Delila bino, ke ibyo nenyi?

Ponkapotu, Delila wayile na kubuula bena Filishitiya amba: ‘Nayuka kimulengela kwikala na ngovu!’ Walaajikile Samisonyi pa maulu anji ne kumulengela kuponena mu tulo twine, kepo aambijile muntu kumutenda nsuki. Delila wabijikile’mba: ‘Ba Samisonyi, bena Filishitiya baiya!’ Samisonyi wabuukile, bino kechi wajinga na ngovu ne. Bena Filishitiya bamukwachile, kabiji bamusabile meso ne kumutaya mukaleya.

Juba jimo bena Filishitiya bavula bingi bakonkene mu kishimikwa mo bayanga na kupopwela lesa wabo aye Dagona. Baambile’mba: ‘Uno lesa wetu ye walengela’mba tukwate Samisonyi! Muletai kuno Samisonyi, kuba’mba etusekesheko.’ Kabiji bamwimikile pakachi ka mashiki abiji, ne kutendeka kumuba mukeyu. Kepo Samisonyi abijikile’mba: ‘Anweba Yehoba napopwela nkoseshai.’ Pa kino kimye nsuki ya kwa Samisonyi saka yakoma jikwabo. Washinjikile mashiki a kino kishimikwa na bulume bwanji bonse. Kino kishimikwa kyakulukile, ne kwipaya bantu bonse bajingamo, ne aye mwine Samisonyi wafwile.