LUFUNJISHO 08
Mwakonsha Kwikala Balunda ne Yehoba
Yehoba ubena kukeba anweba amba mumuyuke bulongo. Mambo ka? Mambo Yehoba wayuka’mba inge mwayuka byubilo byanji ne kuba kyaswa muchima wanji, kine ukekala mulunda nenu. Nanchi kine anweba mwafwainwa kwikala mulunda ne Lesa nyi? (Tangai Salamo 25:14.) Ñanyi kintu kyo mwafwainwa kuba pa kuba’mba mwikale mulunda ne Lesa? Mu Baibolo muji mikumbu ya ano mepuzho. Kabiji walumbulula ne ene mambo kwikala mulunda ne Yehoba kyo kwawamina.
1. Ñanyi kintu Yehoba kyo akeba anweba kuba?
“Fwenyai kwipi ne Lesa, ne aye ukafwenya kwipi ne anweba.” (Yakoba 4:8) Akino kyalumbulula ka? Yehoba ubena kwimwita’mba mwikale balunda nanji. Bantu bamo kyakonsha kwibakatazha bingi kuswa’mba bafwainwa kwikala balunda ne Lesa mambo kechi bamumona ne. Pano bino, Yehoba witusolwela bintu byonse mu Baibolo kuba’mba tuyuke byubilo byanji pa kuba’mba tufwenye kwipi ne aye. Nangwa kya kuba Lesa kechi tumumona ne, bino inge saka tutanga Baibolo, bulunda bwetu ne Yehoba bukakosa bingi.
2. Mambo ka Yehoba o afwainwa kwikela mulunda netu wa pa muchima?
Mambo Yehoba wimutemwa bingi kukila bimutemwa bakwenu bantu. Aye ukeba anweba kwikala na lusekelo kabiji ukeba’mba kimye kyonse mulombenga kwi aye kwimukwasha. Waamba’mba saka “mutaya bijikila byenu byonse pe aye.” (1 Petelo 5:7) Yehoba wipana kimye kyonse kwimukwasha, kwimutekenesha kabiji uteleka bimubuula balunda nanji.—Tangai Salamo 94:18, 19.
3. Ñanyi bintu byo twafwainwa kuba pa kuba’mba twikale balunda ne Yehoba?
Yehoba watemwa bantu bonsetu, “pakuba aba baoloka bo balunda nanji ba pa muchima.” (Byambo bya Maana 3:32) Yehoba ukeba’mba balunda nanji bebikeko kubanga bintu byo atemwa ne kushikwa bintu byo ashikwa. Bantu bamo balanguluka’mba kechi bakonsha kulondela mizhilo yonse ya Yehoba ne kuleka kuba bintu byatama ne. Pano bino, Yehoba wa lusa. Aye ukeba muntu yense wamutemwa kya kine kubanga bintu bimutokesha ku muchima.—Salamo 147:11; Byubilo 10:34, 35.
FUNJILAIPO BIKWABO
Funjilaipo bintu byavula byafwainwa kwimukwasha kwikala balunda ne Yehoba ne kuyuka ene mambo o aikela mulunda wawama bingi kukila bantu bakwetu.
4. Abalahama wajinga mulunda ne Yehoba
Jishimikila ja mu Baibolo jaamba pe Abalahama (utelwa ne kuba’mba Abulama) jitufunjisha bintu byo twafwainwa kuba pa kuba’mba twikale balunda ne Lesa ne bintu byawama Lesa byo apa balunda nanji. Tangai jino jishimikila jaamba pe Abalahama pa Ntendekelo 12:1-4, ne kwisamba ano mepuzho:
Ñanyi kintu Yehoba kyo abuujile Abalahama kuba?
Ñanyi bintu Yehoba byo alayile Abalahama?
Abahalama waubile byepi na byamukambizhe Yehoba?
5. Ñanyi bintu Yehoba byo akeba balunda nanji kubanga?
Atweba bonse tukeba balunda netu kwitubilapo bintu bimo.
Ñanyi bintu byo mukeba balunda nenu kwimubila?
Tangai 1 Yoano 5:3, ne kwisamba buno bwipuzho:
Ñanyi bintu Yehoba byo akeba balunda nanji kuba?
Pa kuba’mba tukookelenga Yehoba, patanshi twafwainwa kupimpula byubilo byetu. Tangai Isaya 48:17, 18, ne kwisamba buno bwipuzho:
Mambo ka Yehoba o akebela balunda nanji kupimpula byubilo byabo?
Mulunda wa kine witubuulako bintu byafwainwa kwituzhikijila ne kwitukwasha mu bwikalo bwetu. Yehoba naye byo byo oba na balunda nanji
6. Bintu Yehoba byo obila balunda nanji
Yehoba ukwasha balunda nanji kuyuka mwa kubila na makatazho. Tambai VIDYO, ne kwisamba buno bwipuzho.
Yehoba wakwashishe byepi mwanamukazhi ye twamona mu vidyo kuyuka mwa kubila na bijikila ne kulefulwa?
Tangai Isaya 41:10, 13, ne kwisamba ano mepuzho:
Ñanyi bintu Yehoba byo alaya kubila balunda nanji bonse?
Mwalanguluka’mba Yehoba wafwainwa kwikala mulunda nenu wa pa muchima nyi? Mambo ka o mwakumbwila byobyo?
Balunda ba pa muchima bakemukwasha inge mwakajilwa bintu. Yehoba naye ukemukwasha
7. Pa kuba’mba twikale balunda ne Yehoba twafwainwa kwisambanga nanji ne kuteleka ku byo abena kwamba
Kwisamba kukosesha bulunda. Tangai Salamo 86:6, 11, ne kwisamba ano mepuzho:
Twakonsha kwisamba byepi ne Yehoba?
Nga Yehoba naye wisamba byepi ne atweba?
Twisamba ne Yehoba mu milombelo kabiji naye wisamba ne atweba kwingijisha Baibolo
BANTU BAMO BAMBA’MBA: “Kyakatazha bingi kwikala mulunda ne Lesa.”
Ñanyi kinembelo kyo mwakonsha kwingijisha kyamwesha’mba twafwainwa kwikala balunda ne Yehoba?
ÑANYI BISHINKA BYO MWAFUNDA?
Yehoba ukeba’mba mwikale mulunda nanji kabiji ukemukwasha kufwenya kwipi ne aye.
Mepuzho a kupitulukamo
Yehoba ukwasha byepi balunda nanji?
Mambo ka Yehoba o abuujila balunda nanji kupimpula byubilo byabo?
Nanchi mulanguluka’mba kyakatazha kwikala mulunda ne Yehoba nyi? Inge kyakatazha mambo ka?
KEBAI BISHINKA BIKWABO
Kwikala mulunda ne Lesa kwafwainwa kwimukwasha byepi mu bwikalo bwenu?
“Kuyuka Yehoba Lesa Kwawama Bingi” (Kyamba kya Usopa, February 15, 2003)
Yukai byo mwafwainwa kuba pa kuba’mba mwikale balunda ne Lesa.
Tangai muyuke kyalengejile mwanamukazhi umo kwamba’mba bulunda bwanji ne Yehoba bwamukwashishe bingi.
Tambai uno vidyo mumvwe banyike bamo byo baambapo pa byo balanguluka pe Yehoba.