LUFUNJISHO 17
Ñanyi Byubilo Biji ne Yesu?
Inge twafunda bintu byaambile Yesu ne byo aubile kimye kyo ajinga pano pa ntanda, tukayuka byubilo byanji kabiji tukekala balunda nanji ne Shanji aye Yehoba. Ñanyi byubilo bimo byawama byajinga ne Yesu? Kabiji twafwainwa kwikala byepi byajinga Yesu mu bwikalo bwetu?
1. Mu ñanyi mashinda Yesu mo aikela byonka biji Shanji?
Pa myaka yavula bingi, Yesu wamona byuba Shanji kabiji wafunjilako bintu byavula bingi kwi aye. Onkao mambo, Yesu ulanguluka, kumona bintu ne kuba byonkatu byuba Shanji. (Tangai Yoano 5:19.) Kwambatu kine, Yesu umweshatu suka byubilo bijipo na Shanji. Kyo kyo aambijile’mba: “Awa wammona, wamona ne Batata.” (Yoano 14:9) Inge mwatwajijila kufunda pa byubilo bya kwa Yesu, mukamuyuka bingi bulongo Yehoba. Yesu byo atele muchima bantu kimwesha’mba Yehoba naye wimuta bingi muchima.
2. Yesu wamwesheshe byepi amba watemwa Yehoba?
Mwine Yesu waambile’mba: “Pa kuba’mba ba pano pa ntanda bayuke’mba natemwa Batata, mbena kuba byonka byankambizhe Batata.” (Yoano 14:31) Byo ajinga pano pa ntanda, Yesu wamwesheshe’mba watemwa bingi Shanji kupichila mukumukookela mu bintu byonsetu nangwatu kimye bintu kyo byakatezhe. Kabiji Yesu watemenwe bingi kusapwila pe Shanji ne kukwasha bantu kwikala balunda ne Yehoba.—Yoano 14:23.
3. Yesu wamwesheshe byepi amba watemwa bantu?
Baibolo waamba pe Yesu amba ‘watemenwe bingi bantu.’ (Byambo bya Maana 8:31) Butemwe bwa kwa Yesu bwamwekejile mu byo atundaikanga bantu ne kwibakwasha. Bya kukumya byo aubile kechi byamwesheshetu bulume bo aji nabo ne, bino byamwesheshe ne kuba’mba uji bingi na lusa. (Mako 1:40-42) Yesu wakwashanga muntu yense kabiji kechi wajinga na misalululo ne. Byo aambanga byatekeneshanga bingi bantu ne kukwasha bonse bamutelekanga bajinga na michima ya bukishinka. Yesu wipaine kumanama ne kufwa na mambo a kutemwa bantu. Pakuba aye watemwa bingi kikatakata bantu balondela byo afunjishanga.—Tangai Yoano 15:13, 14.
FUNJILAIPO BIKWABO
Funjilaiko kwi Yesu pa byubilo byanji. Kabiji monaipo ne mashinda amo o mwafwainwa kumwesheshamo butemwe ne kukwasha bakwenu byonkatu byaubanga Yesu.
4. Yesu watemwa bingi Shanji
Byaubile Yesu bitufunjisha ne atweba byo twafwainwa kuba kumwesha’mba twatemwa Lesa. Tangai Luka 6:12 ne Yoano 15:10; 17:26. Inge mwapwisha kutanga bino binembelo kimo kimo, isambai buno bwipuzho:
Twafwainwa kumwesha byepi amba twatemwa Yehoba byonkatu byajinga Yesu?
Yesu watemenwe bingi Shanji wa mwiulu kabiji walombanga kwi aye kimye kyonse
5. Yesu watele bingi muchima bantu bakajilwa
Yesu watele bingi muchima bintu bya bantu kukila bintu byanji. Nangwatu inge wakooka, waingijishanga kimye kyanji ne ngovu yanji kukwasha bantu. Tangai Mako 6:30-44, ne kwisamba ano mepuzho:
Mu jino jishimikila, ñanyi mashinda amo Yesu mo amwesheshe’mba watele bingi muchima bantu?—Monai kyepelo 31, 34, 41 ne 42.
Ñanyi kintu kyalengelanga Yesu kukwasha bantu?—Monai kyepelo 34.
Byo kiji kuba’mba Yesu wamweshanga byubilo bijipo na Shanji, abino byonse bibena kwitufunjishapo ka pe Yehoba?
Ñanyi mashinda amo mo twafwainwa kwikela na muchima wajingapo ne Yesu wa kuta muchima bakwetu?
6. Yesu wajinga mpanyi
Nangwa kya kuba Yesu kechi wajinga na bintu byavula ne, wapangapo bakwabo bintu byo ajinga nabyo. Kabiji witutundaika ne atweba kwikala bampanyi. Tangai Byubilo 20:35, ne kwisamba buno bwipuzho:
Twafwainwa kwikala byepi na lusekelo byonkatu byaambile Yesu?
Tambai VIDYO, ne kwisamba buno bwipuzho.
Mu ñanyi mashinda mo twakonsha kupaina bintu byo tuji nabyo nangwa kya kuba kechi tuji na bintu byavula ne?
Bishinka bikwabo
Baibolo witutundaika kulomba kwi Yehoba kwingijisha jizhina ja kwa Yesu. (Tangai Yoano 16:23, 24.) Inge ketulombe bino, tumwesha’mba twasanta pa bintu bitubila Yesu bitukwasha kwikala balunda ne Yehoba.
BANTU BAMO BAMBA’MBA: “Lesa kechi wituta muchima byo tubena kupita mu makatazho ne.”
Nanchi bintu byaubile Yesu byo ajinga pano pa ntanda bimwesha byepi amba Yehoba wituta muchima?
ÑANYI BISHINKA BYO MWAFUNDA?
Yesu watemwa bingi Yehoba ne bantu. Byo kiji kuba’mba aye ujitu byonka biji Shanji, ko kuba’mba inge mwamuyuka bulongo Yesu mukamuyuka bulongo ne Yehoba.
Mepuzho a kupitulukamo
Twafwainwa kumwesha byepi amba twatemwa Yehoba byonkatu byaubile Yesu?
Tumwesha byepi amba twatemwa bantu byonkatu byajinga Yesu?
Ñanyi byubilo bya kwa Yesu byo mwatemwa bingi?
KEBAI BISHINKA BIKWABO
Fundaipo byubilo bimo bya kwa Yesu byo twafwainwa kwikala nabyo.
Yukai ene mambo o twafwainwa kulombanga kwi Lesa kwingijisha jizhina ja Yesu.
“Mambo ka a Kulombela mu Jizhina ja Yesu?” (Kyamba kya Usopa, April 1, 2008)
Nanchi Baibolo waambapo pa byamwekanga Yesu nyi?