LUFUNJISHO 25
Nanchi Lesa Ukeba’mba Twikalenga Byepi?
Baibolo waamba’mba bumi bwa bantu bwa ‘moba achechetu kabiji bwavula makatazho.’ (Yoba 14:1) Nanchi abino byo byakebelenga Lesa amba twikalenga mobatu acheche nyi? Inge kechi byo byo akebelenga ne, pano nanchi Lesa ukeba’mba twikalenga byepi? Nanchi kine tukekalapo myaka ne myaka nyi? Umvwai byaamba Baibolo.
1. Nanchi Yehoba ukeba’mba twikalenga byepi?
Yehoba ukeba’mba twikalenga bwikalo bwawama bingi. Byo alengele ba Adama ne Evwa, wibabikile mu paladisa wawama bingi ko kuba’mba bujimi bwa Edena. Kabiji “Lesa wibapesheshe ne kwibambila’mba: ‘Semainga ne kusemununa, muyuzhe ntanda ne kwiijima.’” (Ntendekelo 1:28) Yehoba wakebelenga’mba baseme baana ne kwalula ino ntanda kwikala paladisa ne kulama bulongo banyama. Onkao mambo, Yehoba wakebele’mba bantu bonse bakabulenga kupita mu makatazho kabiji bakekalenga myaka ne myaka.
Nangwa kya kuba kechi tubena kwikala bwikalo bwawamaa luno ne, bino Lesa ukafikizha mulaye wanji. (Isaya 46:10, 11) Yehoba ukeba’mba bantu bamukookela bakekalenga myaka ne myaka mu ntanda mwabula makatazho.—Tangai Lumwekesho 21:3, 4.
2. Pano twafwainwa kwikala byepi bwikalo bwawama luno?
Yehoba witulengele na “muchima wa kukeba kuyuka Lesa” ne kumwingijilanga. (Tangai Mateo 5:3-6.) Ukeba’mba twikale na bulunda bwa pa muchima ne aye, “kwenda mu mashinda anji onse, kumutemwa ne kumwingijila na “muchima [wetu] yense.” (Mpitulukilo ya mu Mizhilo 10:12; Salamo 25:14) Inge twauba bino, tukekala na lusekelo nangwa kya kuba tubena kupita mu makatazho. Kwingijila Yehoba kulengela bwikalo bwetu kuwama mambo tubena kuba kyaswa muchima wanji.
FUNJILAIPO BIKWABO
Fundai pa butemwe bukatampe bwamwesheshe Yehoba pa kulenga ino ntanda, ne Baibolo byo aamba pa ene mambo Lesa o etulengejile.
3. Yehoba ukeba bantu kwikala bwikalo bwawama
Tambai VIDYO, ne kwisamba buno bwipuzho:
Mambo ka Lesa o alengejile ino ntanda?
Tangai Musapwishi 3:11, ne kwisamba buno bwipuzho:
Akino kinembelo kimufunjishapo ka pe Yehoba?
4. Yehoba kechi ukabula kufikizha mulaye wanji ne
Tangai Salamo 37:11, 29 ne Isaya 55:11, ne kwisamba buno bwipuzho:
Twayuka byepi kuba’mba Yehoba ukafikizha bintu byonsetu byo etulaya?
Byonkatu byo kikala inge nzubo paji pafwafwafwa, bawamishapo. Kyo kimotu, ino ntanda nayo bantu beyonauna, pano bino Lesa ukeiwamisha pa kuba’mba pakekalenga bantu bonse bamutemwa
5. Kwingijila Yehoba kwitukwasha kwikala bwikalo bwawama
Kuyuka ene mambo Lesa o etulengijile kwituletela bingi lusekelo. Tambai VIDYO, ne kwisamba buno bwipuzho:
Ba Terumi bamwenejilemo byepi byo bayukile ene mambo Lesa o alengejile bantu?
Tangai Musapwishi 12:13, ne kwisamba buno bwipuzho:
Tumwesha byepi amba tusanta pa bintu byavula bitubila Yehoba?
BANTU BAMO BEPUZHA’MBA: “Ñanyi kintu muntu kyo afwainwa kuba pa kuba’mba ekale na lusekelo?”
Mwakonsha kumukumbula’mba ka?
ÑANYI BISHINKA BYO MWAFUNDA?
Yehoba ukeba’mba tukekalenga bwikalo bwawama myaka ne myaka pano ponka pa ntanda. Inge saka twingijila Yehoba na muchima yense, bwikalo bwetu bukawama bingi nangwatu luno lonka.
Mepuzho a kupitulukamo
Ñanyi kintu kine Yehoba kyo alengejile ba Adama ne Evwa?
Twayuka byepi kuba’mba Lesa ukafikizha bintu byonsetu byo etulaya?
Mwafwainwa kuba byepi pa kuba’mba mwikalenga bwikalo bwawama?
KEBAI BISHINKA BIKWABO
Monai bishinka byamweshamba bujimi bwa Edena kine bwajingako.
“Nanchi Bujimi bwa Edena—Jishimikilatu Nyi, Inyi Bwajingako?” (Kyamba kya Usopa, January 1, 2011)
Twayai tumone ene mambo o twafwainwa kushiinwa’mba ino ntanda ikatwajijila kwikalako myaka ne myaka.
Monai byaamba Baibolo pa bintu byafwainwa kwimukwasha kwikala bulongo mu bwikalo bwenu.
Umvwai byakwashishe uno mwanamulume wimonanga’mba uji na bintu byonsetu mu bwikalo bwanji. Pano bino wataaine’mba kuji kintu kimo kyanema kyo abula.
a Mu lufunjisho 26, tukafunda pa ene mambo o tubena kubujila kwikala bwikalo bwawama luno.