LUFUNJISHO 34
Tumwesha Byepi Amba Twatemwa Yehoba?
Nanchi aluno butemwe bwenu pe Lesa bwabayilako kufuma po mwatendekejile kufunda Baibolo nyi? Abya mwakebesha kutwajijila kukosesha bulunda bwenu ne aye nyi? Umvwe byobyo mwafuukulapo, yukai’mba Yehoba ukemutemwa bingi ne kwimuta muchima mambo anweba mwatwajijila kumutemwa. Mwafwainwa kuba byepi kumwesha’mba mwamutemwa Yehoba?
1. Tumwesha byepi amba twatemwa Yehoba?
Tumwesha’mba twatemwa Yehoba inge ketukookele mikambizho yanji. (Tangai 1 Yoano 5:3.) Lesa kechi ukanjikizha bantu kuba’mba bamukookelenga ne. Pakuba witupa luusa atweba bene kusalapo kumukookela nangwa ne. Mambo ka o aubila bino? Mambo Yehoba ukeba atweba ‘kumukookela na muchima yense.’ (Loma 6:17) Akino kibena kulumbulula’mba Yehoba ukeba’mba tumukookelenga kechi na mambo a kuba’mba witubuula kuba bino ne. Bino tumukookela mambo twamutemwa. Bipungu 3 ne 4 biji mu uno buku bebinemba kuba’mba bimukwashe byo mwafwainwa kumwesha’mba mwamutemwa Yehoba pa kubanga bintu bimutokesha ku muchima ne kubula kuba bintu bimufichisha ku muchima.
2. Mambo ka o kikatezha kumwesha byo twatemwa Yehoba?
“Makatazho amwekela muntu waoloka avula bingi.” (Salamo 34:19) Atweba bonse kitukatazha bingi mambo kechi twaoloka ne. Kabiji tupita mu makatazho nabiji kubula mali, nshiji ne makatazhotu akwabo. Inge tubena kupita mu makatazho, kitukatazha bingi kukookela bintu bitukambizha Yehoba. Kintu kitupeelela kuba ke kubula kukookela Yehoba. Pano bino, inge mwaikala bakishinka ne kukookela bintu byonse bimubuula Yehoba kuba, mumwesha’mba mwamutemwa kukila bintu byonse. Kabiji mukamwesha kuba’mba mwi bakishinka kwi aye. Yehoba naye ukekala wakishinka kwi anweba. Kabiji kechi ukemusha ne.—Tangai Salamo 4:3.
FUNJILAIPO BIKWABO
Yukai ene mambo Yehoba o kimutokesha ku muchima inge mwamukookela. Kabiji fundai pa bintu byafwainwa kwimukwasha kutwajijila kwikala bakishinka kwi aye.
3. Satana ubena kwimupamo mambo
Mu buku wa Yoba tutangamo kuba’mba Satana wapeelemo mambo Yoba ne bantu bonse bengijila Yehoba. Tangai Yoba 1:1, 6–2:10, ne kwisamba ano mepuzho:
Kwesakana na byambo byaambile Satana, mambo ka Yoba o akookelanga Yehoba?–Monai Yoba 1:9-11.
Ñanyi byambo byaambile Satana pa bantu bonse kuvwangakotu ne anweba?–Monai Yoba 2:4.
Tangai Yoba 27:5b, ne kwisamba buno bwipuzho:
Yoba waubile byepi kumwesha’mba watemenwe bingi Yehoba na muchima yense?
Yoba wamwesheshe’mba watemwa Yehoba byo atwajijile kwikala wakishinka kwi aye
Tumwesha byo twatemwa Yehoba inge twatwajijila kwikala bakishinka kwi aye
4. Sangajikainga muchima wa Yehoba
Tangai Byambo bya maana 27:11, ne kwisamba ano mepuzho:
Yehoba umvwa byepi ku muchima inge mwaikala na maana ne kumukookela? Mambo ka o mwakumbwila byobyo?
5. Mwafwainwa kwikala bakishinka kwi Yehoba
Kutemwa Yehoba ko kwitulengela kusapwila bantu kuba’mba bamuyuke. Kabiji bukishinka bwetu bo bwitulengela kuba bino nangwa kya kuba kechi kyapeela ne. Tambai VIDYO, ne kwisamba ano mepuzho.
Nanchi kimukatazha kubuulako bakwenu bintu byo mwaitabilamo pe Yehoba nyi?
Mu vidyo ye mwatamba, ñanyi kintu kyakwashishe ba Grayson kushinda moyo?
Kipeela bingi kwikala bakishinka kwi Yehoba inge twatemwa bintu byo atemwa ne kushikwa bintu byo ashikwa. Tangai Salamo 97:10, ne kwisamba ano mepuzho:
Kwesekana na bintu byo mwafunda, ñanyi bintu bimo byatemwa Yehoba? Kabiji ñanyi bintu bimo byo ashikwa?
Mwafwainwa kuba byepi pa kuba’mba mutemwe bintu byawama ne kushikwa bintu byatama?
6. Tumwenamo bintu byawama bingi inge twakookela Yehoba
Kukookela Yehoba kwawama bingi. Tangai Isaya 48:17, 18, ne kwisamba ano mepuzho:
Nanchi mwashiinwa’mba Yehoba kine wayuka bintu byafwainwa kwitukwasha nyi? Mambo ka o mwakumbwila byobyo?
Ñanyi bintu byawama byo mwamwenamo kufuma kimye kyo mwatendekele kufunda Baibolo ne pe Lesa wa kine aye Yehoba?
BANTU BAMO BEPUZHA’MBA: “Nanchi byubilo byami bitokesha Lesa ku muchima nyi”?
Ñanyi kinembelo kyo mwafwainwa kwingijisha kumwesha’mba byo tuba byakonsha kutokesha nangwa kufichisha Yehoba ku muchima?
ÑANYI BISHINKA BYO MWAFUNDA?
Tumwesha’mba twatemwa Yehoba inge ketumukookele ne kutwajijila kwikala bakishinka kwi aye nangwa kya kuba tubena kupita mu makatazho.
Mepuzho a kupitulukamo
Ñanyi bintu byo mwafunjilako kwi Yoba?
Ñanyi bintu byo mwafwainwa kuba kumwesha’mba mwatemwa Yehoba?
Ñanyi bintu bisakwimukwasha kutwajijila kwikala bakishinka kwi Yehoba?
KEBAI BISHINKA BIKWABO
Yukai bintu byafwainwa kwimukwasha kwikala bakishinka kwi Yehoba ne ku kipwilo.
Funjilaipo bikwabo pa bubela bwa kwa Satana bo abepela bantu.
“Yoba Watwajijile Kwikala Wakishinka” (Mu Baibolo, Ñanyi Byambo Bijimo? kipungu 6)
Monai nangwatu banyike byo bafwainwa kumwesha’mba batemwa Yehoba.
Banyike bakonsha kwikala byepi bakishinka kwi Yehoba inge bakwabo babena kwibakanjikizha kuba bintu byatama?